3 Yoa. 1 - Ebaibul

Emalas

¹ Abaruwa aneni ke ekatukon, neni a Gaio a ŋolo amina ayoŋ kire.

² Ekaakone ŋolo minat, elipit ayoŋ atemar tomameete ŋace ŋuna aronok aneni kon, ka toŋalee iyoŋ ejok; ayeni ayoŋ atemar iŋale iyoŋ alotau kon.

³ Abu ayoŋ olelyan nooi apaki ŋina adolunioto ŋikaitotoi ŋice, ido okolimokis ayoŋ anupit kon ŋina a ŋakiro a ŋuna a kire, ikwapei irubakinitor iyoŋ anakiro a ŋuna a kire.

⁴ Emam alelyan ace ŋina aryamunit ayoŋ akilo akiirar atemar iwuapito ŋidwe kaŋ ŋuna a kire.

Kipuroe Gaio

⁵ Ekaakone ŋolo minat, irae iyoŋ ŋolo ajokan alotooma ŋuna itiyae iyoŋ neni a ŋikaitotoi, tari kerae ikes ŋigelae.

⁶ Eteyenikis ikes Ŋikristo ŋulu a ne ŋuna ka amina. Okoe! Kiŋarak ikes torubakis itiyaete alorot kec alopite a ŋolo itemokino aneni ka Akuj.

⁷ Anerae ŋuna ke ekiro a Kristo aponiata ikes kimyekis ŋirerya kec, pa acamununuyete akiŋarakino aneni a ŋulu nyenupito.

⁸ Aŋun, itemokino iwon Ŋikristo eŋarakisi ŋikilyok ŋul, ikotere ikitiyae kaapei ka ikes ŋuna a kire.

Doterepes ka Demetrio

⁹ Adau ayoŋ akigir ŋakiro ŋadi neni a Ŋikristo; nai Doterepes ŋolo ebobokinit akiŋarenikinit ikes, nyecamuni ŋakiro kaŋ.

¹⁰ Nai ani kabu ayoŋ, alimuni ŋakiro daadaŋ ŋuna etiya iŋes, ŋakiro ŋuna aronok nooi ŋuna ikirworor iŋes isua ka alyokonu a ŋina irworo iŋes. Meere ŋun bon itiyae iŋes, nyijaununui iŋes ŋikaitotoi, iretanakini daŋ ŋulu ecamito akijaun ŋikaitotoi ka iritanari ikes aneni a Ŋikristo.

¹¹ Ekaakone ŋolo minat, nyiroku ŋuna aronok, nai toroku ŋuna ajokak. Ituŋanan ŋini itiyae ŋuna ajokak, erae ŋini ka Akuj, ituŋanan ŋini itiyae ŋuna aronok, nyeanyuna iŋes Akuj.

¹² Iteyenunito ŋituŋa daadaŋ ŋuna ajokak aŋuna a Demetrio; ŋakiro ŋuna a kire daŋ iteyenunito aŋuna keŋ. Ikiteyenunit isua daŋ aŋuna keŋ, ka eteyenunit ayoŋ atemar erae kire.

Ŋimalasyo ŋulu esidyok

¹³ Ikiyakar ayoŋ ŋakiro ŋuna alalak ŋuna acamit akigirakin iyes, nai nyitemokino ayoŋ egir;

¹⁴ egeno ayoŋ abunore atipei aanyun ka iyes, erworo kaapei ka iyes. Toyai neni kus ekisil. Ikimalaete iyes ŋikonei. Kimalata ŋikonei yok daadaŋ.