2 Tim. 3 - Ebaibul

Ŋirwa ŋulu esidyok

¹ Totamunite rika atemar eyakaunosi ŋarwa ŋuna a ŋatyokisyo, ŋirwa ŋulu esidyok.

² Eruworosi ŋituŋa ŋulu eseguwaka, erorokaka alosiliŋa, ituroko ka isupaka; eruworosi ŋulu itoŋoyeneneete ŋuluce, ŋulu nyekerito ŋikauruunak kec, ŋulu nyetemarete alakara ka ŋulu nyesegak alotai;

³ eruworosi ŋulu emamukatar aminanar, ŋulu emam akitim, ŋulu irworotor ŋuluce, ŋulu ededeŋ ka eryenyaaka; eruworosi ŋulu eremokino ŋuna ajokak,

⁴ eruworosi ŋikalukinok, ŋulu enyamete ŋakiro emwaka, ŋulu ileleba akituro, ŋulu eminasi ekibure ŋolo ka akuwan bon, akilo amina Akuj;

⁵ ŋulu esibito iricito ŋakiro ŋuna ke edin, nai kitoodiunite akiyar kec atemar emam apedor ŋina ka Akuj alotooma kec. Toŋer ŋituŋa ŋulu ikote ŋul.

⁶ Anerae ŋice alokidiŋ kec eloloto anakais a ŋituŋa, ido kibatasi ŋaberu ŋuna epalag ananupit kec ŋuna ileleba ŋasecisya, ŋuna iriyarit ekibure a ŋinibore a daadaŋ,

⁷ ŋaberu ŋuna ikatakinito jwi jwi ayenun idiobore, nai nyepedorito jik ayenun ŋuna a kire.

⁸ Ikwaŋina aponiata Yane ka Yambure kitepega Moses, itepegete ŋikilyok ŋul daŋ ŋakiro ŋuna a kire--ŋikilyok ŋulu nyisitiyaete ŋatameta kec ka ŋulu enyasut anupit kec.

⁹ Nai nyerubakinete ikes itiyaete ŋun, anerae eyenunete ŋituŋa daadaŋ abaŋao kec. Ŋunapei ŋun apotu totakanikis neni a Yane ka Yambure.

Ŋakiro ŋuna esidyok

¹⁰ Nai ŋuna ikikamunito iyoŋ, idau akiwuap akitatam kaŋ, ŋipitesyo kaŋ ka ŋuna alosikinit ayoŋ anakiyar; idau iyoŋ akiwuap anupit kaŋ, atitinyikinit kaŋ, amina kaŋ, akidaŋidaŋ kaŋ,

¹¹ ŋakisicaneta ŋuna aryamunit ayoŋ ka ŋican kaŋ. Iyeni iyoŋ daadaŋ ŋuna apotu totakanut neni kaŋ alo Antiokio ka alo Ikonio ta alo Listra, ŋakisicaneta ŋuna aronok nooi ŋuna edaŋidaŋi ayoŋ! Nai abu Ekapolon okoiu ayoŋ aneni kec a daadaŋ.

¹² Kire, ŋulu daadaŋ ecamito akiboi anakiyar a ŋina ecamit Akuj anakimorikina ka Yesu Kristo, eryamunete ŋakisicaneta.

¹³ Nai ŋituŋa ŋulu aronok ka ŋulu a ŋisoswae erubakinete erae ŋulu aronok ka iyatakin aronis kec nooi, emodyanakinete ŋuluce ka emodikin ikes ŋilopeyek.

¹⁴ Nai ani eruwor iyoŋ, torubak anakiro a ŋuna a kire a ŋuna aponi ikitatami iyoŋ ka tonup ka agogoŋu. Iyeni iyoŋ ŋulu arae ŋiketatamak kon.

¹⁵ Itamunit iyoŋ atemar ameun ŋinapei eriŋa iyoŋ irae ikoku, iyeni iyoŋ ŋakiro ŋuna igiritae Nakigireta, ŋuna epedorete ainakin iyoŋ aosou ŋina ikirikori naiuno alotooma anupit Yesu Kristo.

¹⁶ Ŋakiro daadaŋ ŋuna igiritae Nakigireta erae ŋuna ieŋakinit Akuj Etau keŋ; ejokak ikes akitatamya ŋuna a kire, akitepegia ŋuna edyakara, arikinio ŋuna emunaara ka alimonokinia ŋakiro ŋuna ka akiyar a ŋina iyookino,

¹⁷ ikotere nai ituŋanan ŋini ka Akuj erae ŋini ilelebikina, ŋini etenit aŋuna a ŋiticisyo a ŋulu ajokak a daadaŋ.