2 Tim. 1 - Ebaibul

Emalas

¹ Ayoŋ Paulo ekiyakia a Yesu Kristo, aŋuna ka acamit a ŋina ka Akuj, ŋolo ekeyakitae akisera akiyar ŋina ikimori iwon anakimorikina ka Kristo, ŋina abu Akuj ikiik iwon

² egirit abaruwa na neni a Timoteo a ŋolo erae lokoku kaŋ ŋolo minat. Toyai neni kon ajokis, akisyon ka ekisil aneni ka Akuj Papa ka aneni a Yesu Kristo Ekapolon yok.

Kisimukek Paulo Timoteo

³ Alakara ayoŋ neni ka Akuj, a ŋina etiyae ayoŋ etic keŋ alotooma ŋatameta ŋuna ecayete, ikwaŋinapei aponiata atapapaa kaŋ kitiyaata. Alakara ayoŋ neni keŋ ikwapei akatamunitor ayoŋ iyoŋ jwi jwi anakilip kaŋ nakwaare ka naparan.

⁴ Atamunit ayoŋ ŋakiyo kon ka ekeburit ayoŋ nooi aanyun ka iyoŋ, ikotere nai alelyani ayoŋ nooi.

⁵ Atamunit anupit ŋina a kire ŋina iyakar iyoŋ, ŋina ikoni ŋina a tata kon Lois ka ŋina a toto kon Eunike. Ayeni ayoŋ jik atemar iyakar tari iyoŋ anupit ŋin.

⁶ Aŋuna a ŋakiro a ŋun, eketatamunit ayoŋ iyoŋ torubak isitiyae ainakinet ŋina ke Etau, ŋina abu Akuj ikiinak iyoŋ apaki ŋina edokokinio ayoŋ ŋakan kaŋ neni kon.

⁷ Anerae pa abu Akuj ikiinak iwon Etau ŋolo ka akuryanu, nai abu ikiinak Etau ŋolo ka apedor ka amina ta akiyapara.

⁸ Kiurya nyikirumito ŋileec aŋuna ka akisera ŋakiro ŋuna ke Ekapolon yok kori aŋuna kaŋ, a ŋolo arae emabus aŋuna a Kristo. Nai todaŋ ŋican aŋuna a Ŋakiro a ŋuna Ajokak, lopite ŋolo ikiinakinitor Akuj iyoŋ agogoŋu akitiya ŋun.

⁹ Abu iŋes ikiu ka ikinyara iwon aruwor ŋituŋa keŋ ka alope, meere aŋuna ikidau iwon akitiya, nai aŋuna ka acamit ka ajokis keŋ. Eriŋa akwap nyesubuna, abu iŋes ikiinak iwon ajokis ŋin alotooma Yesu Kristo,

¹⁰ nai tokona adau akisileerekin neni yok anabunore a ŋina ke Ekaiunan yok Yesu Kristo. Adau Kristo akiloun atwanare ka adau akisileereun alotooma Ŋakiro ŋuna Ajokak akiyar ŋina nyetwakere.

¹¹ Iŋes nai ekeyakuunere ayoŋ ikwapei ekeseran ka ekiyakia akitatam Ŋakiro ŋuna Ajokak ŋun;

¹² erae nai Ŋakiro ŋuna Ajokak ŋunapei ŋun ikes adaŋitor ayoŋ daŋ ŋican. Nai nyekerumito ayoŋ ŋileec, anerae ayeni ayoŋ ŋini ekinyomit ka ayeni kire atemar epedori iŋes akiyok ejok ŋuna adaun akicikakin ayoŋ akitodol Akoloŋit ŋina esidyon.

¹³ Kiric ejok ŋakiro ŋuna a kire ŋuna abu ayoŋ eketatam iyoŋ ananupit ka anamina ŋuna erae ŋuna yok alotooma akimorikina ka Yesu Kristo.

¹⁴ Alotooma Etau ŋolo Asegan ŋolo iboi alotooma yok, kiyok Ŋakiro ŋuna Ajokak ŋuna adaun akicikakin iyoŋ.

¹⁵ Iyeni iyoŋ atemar akaesikis ayoŋ daadaŋ ŋulu eyakasi Asia, akaesikis ayoŋ tari Pugelos ka Erimogene.

¹⁶ Elipit ayoŋ Ekapolon kisyonioto iŋes ŋituŋa ŋulu alokal a Onesiporo, anerae abu iŋes ekesimukek ayoŋ ŋarwa ŋuna alalak. Pa erumito iŋes ŋileec aŋuna ayakar ayoŋ mabus;

¹⁷ nai ŋinapei adolunio iŋes Roma, abu togeu akiwarit ayoŋ ka alelakinit akitodol ŋina akaryamunia.

¹⁸ Elipit ayoŋ Ekapolon kisyoni Onesiporo Akoloŋit ŋina esidyon! Iyeni iyoŋ nooi ŋuna abu iŋes kitiya aŋuna kaŋ alo Epeso.