2 Sam. 8 - Ebaibul

Ŋijiesyo ŋulu eloununuya Daudi ŋimoe keŋ

¹ Ekaku ka apaki a ŋina auruwuana, kitijik Daudi Ŋipilistin kilou ikes, todemu Ŋipilistin akwap ŋina anyaritae Meseg-Ama.

² Abu Daudi kilou tari Ŋimoabi, kiperik ikes kwap, kimaru ŋilaino ŋiarei ŋulu a ŋulu emaikina toarae ka elain epei ŋolo a ŋulu emaikina kimyekinae toyara. Aŋun, apotu Ŋimoabi toruwor ŋiketiyak a Daudi, kisyakis akitac ocur neni a Daudi.

³ Abu daŋ Daudi toar erwosit ŋolo anyaritae Adadeser, lokoku a Reob a ŋolo a Soba. Etiyae iŋes ŋun apaki ŋina alosyo Adadeser akikamar akwap ŋina ayai diyete aŋolol ŋina enyaritae Eupurate.

⁴ Abu Daudi kikama aneni ka Adadeser ŋikilyok aliput ka ŋamiae ŋakanikaarei ŋulu adokito ŋaŋolei ka ŋulu alosete a ŋakejen ŋalipyo ŋatomoniarei. Kiŋwal Daudi ŋaŋolei kec ŋuna erito ŋagaari, toŋedeŋede ŋamori a ŋakejen kec; kimyek ŋuna iriyarete ŋagaari amiat bon.

⁵ Ani epote Ŋiarameani, ŋituŋa ŋulu alo Damasko akiŋarakin erwosit Adadeser ŋolo alo Soba, toar Daudi Ŋiarameani ŋalipyo ŋatomoniarei ka ŋiarei.

⁶ Kisiboik nai Daudi ŋasigarya keŋ Damasko, nakwap a Ŋiarameani; ido apotu Ŋiarameani toruworos ŋulu epukat Daudi, kisyakis akitac ocur neni a Daudi. Abu Ekapolon inak Daudi akilounun ŋimoe keŋ aneni daadaŋ abunio iŋes kitijikinio ikes.

⁷ Toŋatu Daudi ŋaupala ŋuna ke egolid ŋuna atiŋito ŋasigarya ka Adadeser. Yau Daudi ŋaupala ŋun Yerusalem.

⁸ Abu Daudi toŋatu eburonis ŋolo alalan alo Beta ka alo Berosai, alotaunio ka Adadeser.

⁹ Ani iirari Toi erwosit ŋolo ka Amas atemar elou Daudi asigar ka Adadeser daadaŋ,

¹⁰ Kiyakiya iŋes lokoku keŋ ŋolo anyaritae Yoram neni a Daudi a erwosit, akimala ka akitalakar Daudi aŋuna elounia Adadeser. Kenipit sek Adadeser Toi ka aŋorot kitiji jik. Ya Yoram neni a Daudi ŋiboro ŋulu etiyaunitae a esilipa, a egolid ka a eburonis.

¹¹ Abu Daudi inak ŋiboro ŋul daŋ neni ke Ekapolon, tocunak ka esilipa ta egolid ŋolo erirauni iŋes anakwapin aŋuna abu iŋes kilou; ŋolo aris sek iŋes keinaki Ekapolon.

¹² Kirirauni sek Daudi esilipa ŋol ka egolid ŋol anakwapin a nu: Alo Edom, alo Moab, aneni a Ŋiamoni, aneni a Ŋipilistin, aneni a Ŋiamaleki ka aloboro a ŋulu aŋatuni iŋes aneni ka Adadeser alokoku a Reob a ŋolo arae erwosit a Soba.

¹³ Torwoniar Daudi nooi kedau aboŋun alojie a ŋolo aarya Ŋiedomi ŋalipyo ŋatomon ka ŋikanikauni anakadipaalat a ŋina ka acumbi.

¹⁴ Kisiboik nai Daudi ŋasigarya keŋ Edom daadaŋ. Toruwor Ŋiedomi daadaŋ ŋiketiyak a Daudi. Inak Ekapolon Daudi akilounun ŋimoe keŋ aneni daadaŋ abunio iŋes kitijikinio ikes.

Ŋikapolok ŋulu epukatotor Daudi

¹⁵ Aŋun, abu Daudi kipuka Isirael daadaŋ, abu iŋes kitiya ŋuna ajoikinito ŋituŋa ka ŋuna eyookino alotuŋa keŋ a daadaŋ.

¹⁶ Yoab lokoku a Seruia iŋes apolokinit ŋasigarya daadaŋ, ido Yeosapat lokoku ka Ailud iŋes arae ekeŋadan ŋakiro ŋuna igirir.

¹⁷ Sadok lokoku ka Aitub ka Aimelek lokoku ka Abiasar ikes arae ŋisacaradotin; torae Seraia ekaran.

¹⁸ Benaia lokoku a Yekoiyada iŋes apolokinit Ŋikeresi ka Ŋipelesi; ido arae ŋidwe a Daudi ŋulusapa ŋisacaradotin.