2 Sam. 7 - Ebaibul

Tocamunos Akuj ka Daudi

¹ Ani kedau erwosit akiboikin kai keŋ, kedau Ekapolon akisieŋar iŋes alomoe keŋ a daadaŋ a ŋulu edunyatar iŋes,

² tema erwosit neni a Nasan a ekadwaran, “Kiŋolik, eboi tokona ayoŋ alokai a ŋina edukitoe a ŋakito a cedar, nai eyai Asaduku ŋina ka Acamunet loeema.”

³ Tema Nasan neni ke erwosit, “Ape, kitiya daadaŋ ŋuna itami iyoŋ akitiyakin, anerae eyai Ekapolon kaapei ka iyoŋ.”

⁴ Nai abu Ekapolon kirwor neni a Nasan akoloŋit ŋin nakwaare tema,

⁵ “Ape tolimok Daudi eketiyan kaŋ atemar ebala Ekapolon, ‘Erae mono iyoŋ idukokini Akai ŋina ayakaun ayoŋ a?

⁶ Ameun akoloŋit ŋina ayaunia ayoŋ ŋituŋa a Isirael alo Ijipit, nyeyakauna ayoŋ Kai tari nakoloŋit na. Arae ca loeema ayai ayoŋ eboiyo ka Ŋisirael.

⁷ Anakiboisyo a daadaŋ a ŋuna ikipotu ayoŋ orukosi ka Ŋisirael daadaŋ, abu mono ayoŋ eŋit edio a ŋikatubok a ŋatekerin a Ŋisirael, ŋikatubok ŋulu abu ayoŋ ecik akiyok ŋituŋa kaŋ Ŋisirael atemar anukiro nyikidukokinitotor iyes ayoŋ Akai a ŋakito a cedar a?’

⁸ Aŋun nai, tolimok Daudi eketiyan kaŋ atemar, ebala Ekapolon ŋolo Etiron ebe, ‘Abu ayoŋ okolemu iyoŋ anacokor, anakiyok ŋamesekin aŋuna ka aruwor ekepukan a ŋituŋa kaŋ a Ŋisirael.

⁹ Arukitoe iwon ŋinapei aneni daadaŋ ibu iyoŋ tolot, ido amunya ayoŋ ŋimoe kon daadaŋ ŋulu eriwokina kiŋaren kon. Eturuwori ayoŋ ekiro kon ŋolo eyenen nooi, kikwaanikin ka ŋirorwa a ŋarwonita anakwap.

¹⁰ Aseuni ayoŋ akibois a ŋituŋa kaŋ a Ŋisirael, ido esiboik ikes nen, ikotere ikes eryamunete akibois ŋina erae ŋina kec, ŋina nyicanere ikes nabo. Nyemaikina ŋulu itiyaete ŋuna aronok kisicana ikes nabo, lopite ŋolo aponiata kisicaneta ikes ekiŋaren,

¹¹ etiyata ikes ŋun ameun anapakio a ŋuna araakar ŋikatubok epukato ŋituŋa kaŋ Ŋisirael. Ekesieŋari ayoŋ iyoŋ ejie ka ŋimoe kon daadaŋ. Ikilimokinit daŋ Ekapolon iyoŋ atemar, ikiinakini iyoŋ Ekapolon ŋiletok.

¹² Ani edaun ŋirwa kon anakwap a na, apaki ŋina ikinukere iyoŋ neni enukitae atapapaa kon, etopoloori ayoŋ eletonit kon kilunyokin lokicoloŋ kon, eletonit ŋolo erae iyoŋ elope iuruunit, ido etogogoŋi ayoŋ apukan keŋ.

¹³ Eletonit ŋol iŋes edukokini Akai aŋuna a ekiro kaŋ, ido etogogoŋi ayoŋ ekipukae keŋ torubak ŋikaru ka ŋikaru.

¹⁴ Aruwor ayoŋ papa keŋ, ido eruwor iŋes lokoku kaŋ. Ani kitiya iŋes aronis, adai ayoŋ iŋes lopite ŋolo edaya papa ikoku keŋ.

¹⁵ Nai erubakini amina kaŋ eyai neni keŋ, nyajoŋoe ayoŋ amina iŋes lopite ŋolo abunio ojoŋoo amina Saul ŋolo abu ayoŋ olema anaraakau erwosit, ikotere iyoŋ iruwor erwosit.

¹⁶ Eturubakini ayoŋ ŋituŋa a ekal kon erae ŋirwosi ŋikaru ka ŋikaru ka apukan kon eyai ŋikaru ka ŋikaru, erubakinete ŋituŋa kon erae ŋirwosi ŋikaru ka ŋikaru.’ ”

¹⁷ Tolimok Nasan Daudi ŋakiro ŋun daadaŋ ŋuna esileerekini Ekapolon iŋes.

Akilip a Daudi

¹⁸ Toloma nai erwosit Daudi loeema ŋolo ka Akuj, kiboikin nen kiŋit Ekapolon ilipi tema, “Ŋae ayoŋ, okoe Ekapolon Akuj, ata ŋae ŋituŋa a ekal kaŋ itiyaa iyoŋ ŋakiro ŋuna ajokak ŋun daadaŋ neni kaŋ?

¹⁹ Meere ŋun bon isileereu iyoŋ, okoe Ekapolon Akuj, ilimu iyoŋ tari ŋuna itiyakini lotuŋa a ekal a eketiyan kon, alorwa a ŋulu epote. Okoe Ekapolon Akuj, itiya iyoŋ ŋuna ka aumokin neni a ituŋanan!

²⁰ Anukiro tokona ŋace ŋuna apedori ayoŋ alimokin iyoŋ? Anerae ikiyeni iyoŋ ayoŋ eketiyan kon, okoe Ekapolon Akuj!

²¹ Aŋuna ka akiikinet kon ka acamit a etau kon itiya iyoŋ ŋakiro ŋuna apolok nooi ŋun daadaŋ, ikotere ayoŋ eketiyan kon ayenuni ikes.

²² Aŋun, ipol iyoŋ, okoe Ekapolon Akuj; anerae mam ituŋanan ikwaanatar iyoŋ ka mam Akuj ace mati iyoŋ bon ikwapei eirarere isua ŋakiro daadaŋ a ŋaki kosi.

²³ Ata ŋae ŋituŋa ikwaan ka ŋituŋa kon, Ŋisirael? Eya mono ŋituŋa ŋice ikwaanatar ikes anakwapin a akwap ŋulu abu Akuj kec tolot alakun ikwapei ŋituŋa keŋ, ido toruunio ekiro keŋ a? Eya mono ŋituŋa ŋulu abu Akuj kitiya ŋuna ka aumokin neni kec anakiritanar ŋituŋa a ŋakwapin ka ŋakujo kec alokiŋaren kec a?

²⁴ Ituruwo iyoŋ Ŋisirael kire jik ŋituŋa kon a alope ŋikaru ka ŋikaru, okoe Ekapolon, idau iyoŋ aruwor Akuj kec.

²⁵ Ekapolon Akuj, alotooma ŋakiro daadaŋ ŋuna isileereu iyoŋ aŋuna a eketiyan kon ka ŋituŋa a ekal keŋ, kisiyook toruwor ŋuna a ŋikaru ka ŋikaru; kitiya lopite ŋolo idaunia iyoŋ akiikin,

²⁶ ikotere nai itopolooryo ekiro kon ŋikaru ka ŋikaru. Etemarete ŋituŋa, ‘Erae Ekapolon ŋolo a ŋajoresyo Akuj ŋina ipukat Isirael.’ Iturubakini iyoŋ ŋituŋa a ekal a Daudi a eketiyan kon erae ŋikepukak ŋikaru ka ŋikaru.

²⁷ Okoe Ekapolon ŋolo a ŋajoresyo, Akuj a Isirael, ikisileerek iyoŋ ayoŋ eketiyan kon ŋakiro nu ebe, ‘Akadukokini ayoŋ iyoŋ Akai’; aŋun, adau ayoŋ eketiyan kon aryamun akisimukekinet ŋinakilipet neni kon anakilip a na.

²⁸ Ekapolon Akuj, irae iyoŋ Akuj, erae ŋakiro kon ŋuna ikinyoma, idau iyoŋ akiikin ayoŋ eketiyan kon ŋakiro nu ŋuna ajokak.

²⁹ Kiterereŋ tokona anacamit kon ŋituŋa a ekal a eketiyan kon, ikotere erubakinete ŋikaru ka ŋikaru erae ŋulu kon ŋulu ikikinyomito iyoŋ. Idau iyoŋ okoe Ekapolon Akuj alimun ŋun, ido eyakaun arereŋu kon ŋin neni a ŋituŋa a ekal a eketiyan kon ŋikaru ka ŋikaru.”