2 Sam. 5 - Ebaibul

Toseunae Daudi aruwor erwosit a Isirael daadaŋ

¹ Ekaku a ŋun, tocunun ŋatekerin a Isirael daadaŋ Eburon neni a Daudi temasi, “Kiira, ikirae isua akuwan kon ka ŋaokot kon.

² Ani paaran eriŋa Saul ikipukat isua, iyoŋ ibu torik ŋajorei a Isirael, ido mam ituŋanan ibu iyoŋ tocaka. Abu Ekapolon tema neni kon, ‘Iyoŋ iruwor ekeyokon a ŋituŋa kaŋ a Ŋisirael, iyoŋ iruwor ekepukan kec.’ ”

³ Aŋun, tocunun ŋikasikou alo Isirael daadaŋ Eburon neni a Daudi, ido tocamunos erwosit Daudi ka ikes alo Eburon alokiŋaren Ekapolon. Toseut nai ikes Daudi kituruwosi erwosit a Isirael daadaŋ.

⁴ Arae ŋikaru a Daudi ŋatomoniuni apaki ŋina esyakinia iŋes akipuka, ido abu iŋes kipuka Isirael ŋikaru ŋatomoniomwon.

⁵ Abu iŋes kipuka Yudaya alo Eburon ŋikaru ŋikanikaarei ka ŋilapyo ŋikanikapei. Tosodi abu kipuka Isirael daadaŋ ka Yudaya alo Yerusalem ŋikaru ŋatomoniuni ka ŋiuni.

Toruwor Yerusalem etaun ŋolo apolon a Yudaya ka Isirael a ŋakwapin a ŋuna apotu kimorikin

⁶ Toŋaasi erwosit ka ŋirukitos keŋ ajore, akirem Yerusalem, etaun a Ŋiyebusi a ŋituŋa a ŋulu arae ŋulu ka akwap a ŋin. Temasi Ŋiyebusi neni a Daudi, “Nyipedorete iyes alomun ne, epedorete tari ŋimudukanotin ka ŋikaŋwalak akibwaŋ iyes.” Atamete ikes ebe, “Nyepedori Daudi alomun lotaun yok.”

⁷ Tari daŋ kelimunito ikes ikoŋina, abu Daudi kikama aduketait a Sion ŋinajiet. Enyaritae tokona etaun ŋol ebe “Etaun a Daudi.”

⁸ Aris Daudi kelimu akoloŋit ŋin ebe, “Ituŋanan daadaŋ ŋini iburit akiloun Ŋiyebusi, itemokino iŋes kisitiya akitelosit a ŋakipi tolomarya neni eya ŋikaŋwalak ka ŋimudukanotin ŋul ŋulu erae ŋimoe a Daudi.” Aŋun, arubakis ŋituŋa ebasi, “Nyepedorete ŋimudukanotin ka ŋikaŋwalak alomar kai.”

⁹ Kiboikin Daudi naduketait ŋinajiet, tolimok ekiro a aduketait a ŋin, “Etaun a Daudi.” Todukok arwatata a etaun a ŋol kisiryam, toluku tooma, toremokin kai ka apukan.

¹⁰ Kiyata a ŋinakoloŋit agogoŋu a Daudi, anerae arukito Ekapolon Akuj ŋina a ŋajoresyo ka Daudi.

¹¹ Kiyakiya Iram erwosit ŋolo a Tiro ŋituŋa neni a Daudi. Kitaya ikes ŋakito ŋuna a cedar ka ŋikeceak ŋabaoi ka ŋikadukok a ŋamoru, ido apotu ŋul toduko akai a Daudi ŋina ka apukan.

¹² Toanyu nai Daudi apaki ŋin atemar adau Ekapolon akiwuakin iŋes aruwor erwosit a Isirael daadaŋ, ido etopoloo apukan keŋ aŋuna a Ŋisirael a ŋituŋa a ŋulu ka Akuj.

¹³ Ani kedau Daudi akimyekin akiboi alo Eburon, abu toryamu ŋaberu ŋace alo Yerusalem, ŋuna abu kiit ŋace, ido nyiit ŋace. Touru iŋes ŋidwe ŋice ŋulusapa ka ŋulupesur.

¹⁴ Ŋirorwa a ŋidwe a ŋulu abu Daudi touru alo Yerusalem ikes lu: Samua, Sobab, Nasan, Solomon,

¹⁵ Ibar, Elisua, Nepeg, Yapia,

¹⁶ Elisama, Eliada ka Elipelet.

Tobwaŋae Ŋipilistin ŋulu a ŋaunito ajore

¹⁷ Ani iirarete Ŋipilistin atemar aseun Daudi aruwor erwosit a Isirael daadaŋ, toŋaasi Ŋipilistin daadaŋ ajore alosit akiwarit Daudi. Nai kebu Daudi kiira ŋakiro ŋun, tolot kiboikin naduketait ŋinajiet.

¹⁸ Apaki ŋin, keris Ŋipilistin kedolut kielakin nakadipaalat ŋina a Repaim.

¹⁹ Kiŋit Daudi Ekapolon ŋuna emaikina iŋes kitiya tema, “Alosi ba etipeiyo esiiryak Ŋipilistin? Ipedori iyoŋ ajalakin ikes neni kaŋ a?” Toboŋok Ekapolon Daudi tema, “Ape kitipeiyo; anerae akajalakini ayoŋ iyoŋ ikes.”

²⁰ Aŋun, abu Daudi tolot Baal-Perasim, kitiji Ŋipilistin a nen tobwaŋ, ido tema, “Esipuma Ekapolon ŋimoe kaŋ alokiŋaren kaŋ lopite ŋolo ipumaror akalele.” Aŋun, enyaritae ekiro ka akibois a ŋin Baal-Perasim.

²¹ Apotu Ŋipilistin kimyekis ŋitorubei a ŋakujo kec a nen, ido apotu Daudi ka ŋirukitos keŋ kidepasi ikes yaa.

²² Toboŋut nabo Ŋipilistin akirem Ŋisirael, kielakin nakadipaalat ŋina a Repaim.

²³ Ani iŋisi Daudi Ekapolon ŋuna emaikina iŋes kitiya, toboŋok Ekapolon iŋes tema, “Nyemaikina iyoŋ kitipeiyo totumeiyar neni kec, ape tomana kaku kec nabusya, ido kitoitoun alokito a ŋulu enyaritae Balsam.

²⁴ Ani iirari iyoŋ ŋakejen erwosi ikamete ŋikito a Balsam alokidiama, toten ejok; anerae apaki ŋin adau Ekapolon akiŋarenikin iyoŋ akiar ŋajorei a Ŋipilistin.”

²⁵ Abu Daudi kitiya ikwa alimokinitor Ekapolon iŋes; toar iŋes Ŋipilistin akisyakin alo Geba erot daadaŋ tari Geser.