2 Sam. 4 - Ebaibul

Toarae Isiboses

¹ Ani iirari Isiboses lokoku a Saul atemar aari Abiner alo Eburon, min akuryanu neni keŋ, tokadak Ŋisirael daadaŋ.

² Apaki ŋin, ayakar lokoku a Saul ŋol ŋikarikok ŋiarei ŋulu a ŋajorei keŋ a ŋaarei. Anyaritae epei Baana ka ŋoloce anyaritae Rekab; arae ikes ŋidwe a Rimon a ŋolo arae Ebenjaminait ŋolo alo Beeros, emaritae Beeros Benjamin eyai.

³ (Apaki ŋin, keris ŋituŋa a Beeros keema Gitaim, ido eriŋa iboiyete a nen tari nakoloŋit na erae ŋigelaanotin.)

⁴ Ayakar Yonasan lokoku a Saul ikoku keŋ ŋinisapat ŋini aŋwalito ŋakejen. Aŋwali iŋes erae ŋikaru ŋikan, apaki ŋina adolunioto ŋakiro alo Yesireel atemar aari Saul ka Yonasan. Kebu aberu ŋina erae akedaran iŋes toporunio iŋes toemya, nai anakikirikira kec akiem, kebu ikoku toramakin kwap towana, toŋwal. Arae ekiro a ikoku a ŋin Mepiboses.

⁵ Apotu ŋidwe a Rimon a Ebeerosait ŋulusapa Rekab ka Baana toloto lore a Isiboses. Ani eapiyari kidiŋ apaaran, todolut ikes kai a Isiboses, apaki ŋina kieŋunitor Isiboses ikwapei sek kieŋununuya.

⁶ Tolomut ikes kai esibit ecamito alemar ŋaganoi, ido apotu kicuma Isiboses nakook. Kedaut Rekab ka Baana akitiya ŋun, apotu toema nariet.

⁷ Kelomarete ŋituŋa ŋul kai apaki ŋina aperyo Isiboses a nagule keŋ alokitaada. Ani kedaut ikes akiar Isiboses, kepotu totubosi akou keŋ, yaasi, toloto akuwar kya emeto erot ŋolo itorit Araba.

⁸ Yaut ikes akou a Isiboses Eburon neni a Daudi, temasi neni ke erwosit, “Akou ke emoit kon na, a Isiboses alokoku a Saul, a ŋolo ewarit akiar iyoŋ. Ekapolon kaŋ erwosit, enyaŋa Ekapolon nakoloŋit na aronis a Saul ka aloletok keŋ.”

⁹ Toboŋok Daudi Rekab ka Banna ŋidwe a Rimon a Ebeerosait ŋulusapa tema, “Ekoŋi ayoŋ alokiro ke Ekapolon a ŋolo eyari, a ŋolo abu okoiu ayoŋ alomoe kaŋ a daadaŋ,

¹⁰ alimuni ebe, ‘Abu ituŋanan ice bu neni kaŋ alo Sikilag, okolimok ayoŋ ŋakiro a atwanare a Saul,’ tari ŋina atamya iŋes atemar erae ŋakiro ŋuna ajokak ayaunit iŋes, abu ayoŋ ekamu iŋes oar; ŋuna abu ayoŋ etiya neni a ŋol ŋun, aŋuna a ŋakiro keŋ a ŋuna ayauni iŋes.

¹¹ Etya nai aronis itiyakinio neni a ŋulu aronok, a ŋulu aar ituŋanan ŋini emam ibore esecit, ituŋanan ŋini arae lokitaada kai keŋ a elope aperyo ai? Aŋuna tokona ibukoryata iyes ŋaokot keŋ a ŋakan kus, nyemaikina mono ayoŋ okoar iyes toŋopiyasi anakwap a?”

¹² Aŋun, abu Daudi tolimok ŋirukitos keŋ akiar ŋikilyok ŋul, ido apotu ŋirukitos a Daudi toara ŋikilyok ŋul, totubonosi ŋakan ka ŋakejen, ido kinenekis ŋawat kec diyete akare ŋina ayai Eburon. Nai yaasi akou a Isiboses tonukakis Eburon, nalyal ka Abiner.