2 Sam. 23 - Ebaibul

Ŋakiro a Daudi ŋuna esidyok

¹ Arae Daudi lokoku a Yese ekile ŋolo abu Akuj kitopoloo. Abu Akuj a Yakob toseu iŋes aruwor erwosit, ido Daudi iŋes abu totamununu ŋieosyo aŋuna a Ŋisirael. Ŋakiro a Daudi ŋuna esidyok ikes nu ebe,

² “Irworo etau a Ekapolon aneni kaŋ, eyai akirot keŋ naŋajep kaŋ.

³ Adau Akuj a Isirael akirwor neni kaŋ, akalimoki ayoŋ ataaba a Isirael ŋakiro ebe, ‘Ani kipuka ituŋanan ŋituŋa anakiyookino, ani kipuka anakitopoloorit Akuj,

⁴ ikwaan ituŋanan ŋin ka akica ŋina elomunia akoloŋ, ikwaan ka akica ŋina ecai taparacu emam ŋidouwon, ikwaan ka akica ŋina ecauni kedau akiru akilim, akica ŋina itolomuni ŋinya analup.’

⁵ “Nyiyookino mono ŋituŋa a ekal kaŋ aneni ka Akuj a? Nyikicamuna mono Akuj ka ayoŋ anacamunet a ŋina a ŋikaru ka ŋikaru, a ŋina etemokin ka emam ituŋanan elemari a? Mam mono nyisiyookini iŋes aiuno kaŋ, ido okoinak ayoŋ ŋuna eitanit daadaŋ a?

⁶ Nai emaikina kicenoi ŋulu aronok daadaŋ, kimasarae nariet ikwa ŋikukwa ŋulu nyegirao a ŋakan.

⁷ Ani ecamit ituŋanan atukokin ikes, emaikina kisitiya eroges, kori amorok ŋina ka akwara; ido kicunyak ikes anenipei etukokini a nen.”

Ŋikajiok a Daudi ŋulu arwok

⁸ Ŋirorwa a ŋikajiok a Daudi a ŋulu arwok ikes lu: Yosebibasebes ŋolo abunit alo Takemon. Arae iŋes apol alokidiŋ ŋikapolok ŋuluce ŋiuni. Abu iŋes akoloŋit apei toar ka akwara keŋ ŋimoe ŋamiae ŋakanikauni.

⁹ Ŋolo ewuapit iŋes arae Eleasar lokoku a Dodo a ŋolo arae lokoku ka Aoi, arae iŋes epei alokilyok a ŋuluuni a ŋulu arwok. Arukito iŋes ka Daudi apaki ŋina amunyaryata Ŋipilistin ŋulu acunakina Pas Damim ejie. Kedaut ikes akiar Ŋipilistin, a nen, apotu Ŋisirael ŋuluce toboŋosi,

¹⁰ nai abu Eleasar torubak eyai lokukusi keŋ. Kitiji Ŋipilistin toar akitodol ŋina aupya akan keŋ, kirum esimededek etiŋit ekileŋ. Abu Ekapolon inak ikes akiloun ŋimoe kec akoloŋit ŋin. Apotu Ŋisirael toboŋosi neni ka Eleasar, akilac ŋimoe ŋulu atwakito.

¹¹ Ŋolo ewuapit Eleasar arae Sama lokoku ka Agee a ŋolo alo Aar. Apaki ŋina abwaŋatar Ŋisirael aneni a Ŋipilistin alomanikor a ŋolo etatae emeret ŋolo enyaritae kao, atukokina Ŋipilistin Lei.

¹² Ani ebwaŋasi Ŋisirael ŋuluce, abu Sama torubak eyai lokukusi keŋ kidiŋ emanikor ŋol. Abu toiu emanikor ŋol, toar Ŋipilistin. Abu Ekapolon inak ikes akiloun ŋimoe kec akoloŋit ŋin.

¹³ Ani eapiyari ŋirwa ŋulu elemere, potu ŋikapolok ŋiuni alotooma ŋulutomoniuni potu neni a Daudi. Ayai Daudi apaki ŋin naturukan ŋina enyaritae Adulam. Ayakasi ŋajorei a Ŋipilistin apaki ŋin nakadipaalat ŋina enyaritae Repaim.

¹⁴ Ayai Daudi apaki ŋin naturukan ŋina a emoru, toyai ajore a Ŋipilistin Betelem.

¹⁵ Tonyam akure Daudi a nen, ido tema, “Okoe, kerae ca okookok ituŋanan idio ŋakipi anakare a ŋina idunyit epuke a Betelem omat!”

¹⁶ Apotu nai ŋikilyok ŋulu arwok ŋuluuni ŋul toemaros neni a Ŋipilistin, totubo alokidiŋ, toloto tookut ŋakipi anakare a ŋina edunyit epuke a Betelem, kiwokosi neni a Daudi. Abu Daudi nyemat ŋakipi ŋun; nai abu tobukok kiŋaren Ekapolon erae ainakinet.

¹⁷ Tema Daudi, “Nyikiryama ka akimat ŋakipi nu! Ikwaanikin nen ka akimat ŋaokot a ŋikilyok a lu a ŋulu apotu todaŋa abukor ŋaokot kec anakiom ŋakipi!” Aŋun, abu Daudi nyemat ŋakipi ŋun. Ŋakiro ŋun, ikes apotu ŋikarwok ŋul ŋiuni kitiyata.

¹⁸ Arae Abisai lokoku a Seruia lokaato a Yoab iŋes apolokinit ŋikapolok daadaŋ ŋulutomoniuni. Abu Abisai kitiji ŋimoe ŋamiae ŋauni toar ka akwara keŋ, torwoniar iŋes, kikwaanikin arwonu keŋ ka ŋina a ŋuluuni.

¹⁹ Abu Abisai torwoniar aneni a ŋulutomoniuni; ido abu toruwor ekarikon kec; nai pa etopolooritae iŋes ikwa ŋuluuni.

²⁰ Arae Benaia lokoku a Yeoiada ekajion ŋolo adedeŋan ŋolo abunit alo Kabiseel. Etiyae iŋes ŋakiro ŋuna ka aumokin. Abu iŋes toar ŋidwe ka Ariel ŋulusapa ŋiarei ŋulu arae ŋarwonita a Moab. Abu daŋ iŋes akoloŋit apei ŋina alalaata ŋakako, toloma nadui, toar eŋatuny.

²¹ Abu Benaia toar Ejipitanoit ŋoloti ebusan a akuwan. Atiŋit Ejipitanoit ŋol akwara, nai abu Benaia nyeker iŋes, abu totunar neni keŋ etiŋit abiro, tosodi tomojiriu akwara anakan a Ejipitanoit, toar Ejipitanoit a akwara keŋ pei.

²² Ekote nen ŋakiro ŋuna abu Benaia lokoku a Yeoiada kitiya, ido torwoniar iŋes kikwaanikin arwonu keŋ ka ŋina a ŋikajiok a ŋulu arwok a ŋuluuni.

²³ Abu Benaia torwoniar akilo ŋuluuni; nai pa etopolooritae iŋes ikwa ŋuluuni. Abu Daudi kituruwo iŋes ekapolokiniton ŋasigarya ŋuna eteete Daudi.

²⁴ Ŋice alotooma ŋulutomoniuni ikes lu: Asael lokaato a Yoab; Elanan lokoku a Dodo a ŋolo alo Betelem;

²⁵ Samas ŋolo alo Arod; Elika ŋolo alo Arod;

²⁶ Eles ŋolo alo Palit; Ira lokoku a Ikes a ŋolo alo Tekoa;

²⁷ Abieser ŋolo alo Anasos; Mebunai ŋolo alo Usa;

²⁸ Salimon ŋolo alo Aoi; Maarai ŋolo alo Netopa;

²⁹ Eleb lokoku a Baana a ŋolo alo Netopa; Itai lokoku a Ribai a ŋolo alo Gibea a ŋina alo Benjamin;

³⁰ Benaia ŋolo alo Pirason; Ididai ŋolo anakadipaalae a ŋuna a Gaas;

³¹ Abialibon ŋolo alo Araba; Asimapes ŋolo alo Baurim;

³² Eliaba ŋolo alo Saalibon; ŋidwe a Yasen ŋulusapa; Yonasan

³³ lokoku a Sama a ŋolo alo Ara; Aiam lokoku a Sarar a ŋolo alo Ara;

³⁴ Elipelet lokoku a Aasibai a ŋolo alo Maaka; Eliam lokoku a Aisopel a ŋolo a Gilon;

³⁵ Esiro ŋolo alo Karimel; Pa arae ŋolo alo Arib;

³⁶ Igal lokoku a Nasan a ŋolo alo Soba; Bani ŋolo alo Gad;

³⁷ Selek ŋolo alo Amon; Naarai ŋolo alo Beeros, ŋolo aryoŋit ŋiboro a Yoab alokoku a Seruia ŋulu ke ejie;

³⁸ Ira ŋolo alo Isir; Gareb ŋolo alo Isir;

³⁹ Uria ŋolo alo Itit; arae ikes daadaŋ ŋatomoniuni ka ŋikanikaarei.