2 Sam. 21 - Ebaibul

Kinyaŋa Daudi aronis ŋina etiyatae neni a Ŋigibeoni

¹ Alokaru a ŋulu araakar Daudi ekepukan, abu eron toropik eyai nakwap keŋ ŋikaru ŋiuni; aŋun, abu Daudi kiŋit Ekapolon ŋakiro a ŋironia a ŋul. Toboŋok Ekapolon iŋes tema, “Erae aŋuna iilitor Saul ka ekal keŋ aŋuna aponiata toara Ŋigibeoni.”

² Aŋun, abu erwosit tonyarau Ŋigibeoni kisirwor ikes. (Pa arae Ŋigibeoni ŋituŋa a Isirael, arae ikes ŋipiya alotuŋa a ŋulu anyaritae Ŋiamori. Tari daŋ ŋina sek aris Ŋisirael kikoŋ atemar nyikimunyari Ŋigibeoni, kebu Saul kikatak nooi amunyar ikes a nen, analelakinit keŋ aŋuna a Ŋisirael ka ŋituŋa a Yudaya.)

³ Kiŋit Daudi Ŋigibeoni tema, “Anukiro emaikina ayoŋ etiya aŋuna kus? Alipite alemarya ayoŋ asecit, ikotere iyes igatakinete ŋarereŋisyo neni a ŋituŋa a ŋulu erae ŋituŋa a Ekapolon?”

⁴ Toboŋokis Ŋigibeoni Daudi temasi, “Nyikiitanit isua esilipa, kori egolid aneni a Saul, kori alotuŋa a ekal keŋ, nyikiitanit isua toarae ituŋanan idio alo Isirael.” Kiŋit Daudi ikes tema, “Anukiro emaikina ayoŋ etiya aŋuna kus?”

⁵ Temasi ikes neni a erwosit, “Ani ca eruwor Saul ŋolo abu kikatak akirikar isua ka ŋolo abu toye amunyar isua, ikitiditeu isua todaunor isua neni erae neni kosi anakwap a Isirael a daadaŋ,

⁶ inakinae isua ŋidwe keŋ ŋulusapa ŋikanikaarei toarae alokiŋaren Ekapolon alo Gibeon, alomukura a ŋolo ke Ekapolon.” Abu erwosit tema, “Akainakini ayoŋ iyes ŋidwe a Saul a ŋulusapa ŋikanikaarei.”

⁷ Nai abu erwosit nyipoto Mepiboses lokoku a Yonasan a ŋolo arae lokoku a Saul. Aponi iŋes nyeari aŋuna ka akikoŋet a ŋina aris Yonasan lokoku a Saul ka Daudi kikoŋ make alokiŋaren Ekapolon.

⁸ Abu erwosit ya Arinoni ka Mepiboses ŋidwe ŋulusapa ŋulu a Risipa anakoku ka Aia. Arae Saul auruuni ŋidwe ŋul. Abu daŋ erwosit ya ŋidwe ŋikan ŋulusapa ŋulu anakoku a Saul a ŋina anyaritae Merab. Arae ŋidwe ŋul ŋulu auruuni Adiriel lokoku a Barisilai a ŋolo abunit alo Meola.

⁹ Inak erwosit ŋidwe ŋul ŋikanikaarei neni a Ŋigibeoni, ido apotu Ŋigibeoni toara ŋidwe ŋul alokiŋaren Ekapolon alomukura a ŋolo ke Ekapolon. Totwaka ikes daadaŋ ŋikanikaarei kaapei. Aaryo ikes ŋirwa ŋulu ka aet, ŋirwa ŋulu isyakinere akilem ŋikinyom ŋulu ikwaan ka erau.

¹⁰ Kedaun akiar ŋidwe a Risipa, abu Risipa nakoku ka Aia tolemu ŋiguniyae todukok erae neni iboikin iŋes. Kiboikin iŋes nen ŋinapei isyakinio akilem akitodol apaki ŋina elimya akiru. Eboi iŋes a nen ite ŋataruk naparan nyenyama ŋawat a ŋidwe keŋ ka ŋityaŋ nyenyama nakwaare.

¹¹ Ani elimokinio Daudi ŋakiro ŋuna etiyae Risipa nakoku ka Aia ŋina arae aberu a Saul ŋina pa eiitit,

¹² abu Daudi tolot kijau ŋakoyo a Saul ka ŋuna a Yonasan alokoku keŋ aneni a ŋituŋa a Yabes-Gilead a ŋulu kepotu tokokoiyasi ŋakoyo ŋun aneni atukonokin ŋituŋa alo Bes-San. Arae nen apotu Ŋipilistin kinenekis ŋawat kec akoloŋit ŋina aaryata ikes Saul alo Gilboa.

¹³ Yau Daudi ŋakoyo a Saul ka ŋuna a Yonasan alokoku a Saul; yau tari ŋuna a ŋulu keponi kinenekinoe nen ka totukokinae ŋakoyo kec nen.

¹⁴ Apotu nai ikes tonuka ŋakoyo a Saul ka ŋuna a Yonasan alokoku keŋ neni anukitae Kis papa a Saul, nakibois ŋina anyaritae Sela alo Benjamin. Apotu ŋituŋa kitiyata ŋakiro daadaŋ ŋuna ecikit erwosit ikes akitiya. Kedaut ikes akitiya ŋun, abu Akuj kiira ŋakiro ŋuna elipyata ŋituŋa ekiito ŋasecisya kec aŋuna ka akwap kec.

Toŋaanak Daudi Ŋipilistin ŋajorei

¹⁵ Apotu nabo Ŋipilistin toŋaasi ajore neni a Ŋisirael, tonyout Daudi ka ŋituŋa keŋ totiyaaros kwap, kitijikis Ŋipilistin aina, toup Daudi nooi.

¹⁶ Ayai etuŋanan epei ŋolo anyaritae Isibibenob, arae iŋes lopapait a Ŋirepai. Ayakar iŋes akwara ŋina etiyaunitae a eburonis, ŋina arae apotis ŋakiloi ŋuna eapiyarito ŋauni ka atutubet, ido ayakar Isibibenob ekileŋ ŋolokitete. Tolimu iŋes atemar aari Daudi.

¹⁷ Nai abu Abisai lokoku a Seruia toiu Daudi; kicum a Epilistait kimasak kwap toar. Kikoŋo nai ŋirukitos a Daudi neni a Daudi temasi, “Mam nabo jik nyikirukori iwon lojie, ikotere nyikiari iyoŋ ŋolo irae akoŋu a Ŋisirael.”

¹⁸ Ekaku a ejie a ŋol, abu ejie ece toyakaun ka Ŋipilistin aneni anyaritae Gob. Alojie a ŋol, abu Sibecai ŋolo arae Eusasait toar Sap, epei a ŋulu arae lopapait a Ŋirepai.

¹⁹ Alojie nabo a ece ka Ŋipilistin alo Gob, abu Elanan lokoku Yareoregim a ŋolo arae ŋolo alo Betelem toar Golias ŋolo alo Gitit, ŋolo ayakar akwara ŋina atya amorok ayokot a ŋimoŋin.

²⁰ Abu nabo ejie ece toyakaun kidiŋ Ŋisirael ka Ŋipilistin alo Gas, ayai ekile ŋolo aburon a ŋinerin nen, ayakar iŋes ŋimoyo ŋikanikapei a ŋinakan ka a ŋinakeju, arae ŋimoyo keŋ daadaŋ ŋatomoniarei ka ŋiomwon. Arae iŋes daŋ lopapait a Ŋirepai.

²¹ Ani itoŋoi ekile ŋol Ŋisirael, abu Yonasan lokoku a Simei ŋolo arae lokaato a Daudi toar ekile ŋol.

²² Arae ŋikilyok ŋuluomwon ŋul ŋipapae a Ŋirepai a ŋulu alo Gas; apotu Daudi ka ŋirukitos keŋ toara ikes.