2 Sam. 18 - Ebaibul

Akilouno ka atwanare ka Abusalom

¹ Abu Daudi tonyarau iwapei ŋikilyok ŋulu arukitotor iŋes, aŋun, abu toseu alokilyok a ŋul ŋikapolok ŋulu epolokinito ŋatukon a ŋikilyok a ŋulu emaranaritae a ŋalipyo ka a ŋamiae.

² Totyak Daudi ajore keŋ toruwor ŋajorei ŋauni. Abu Yoab topolok ajore apei, topolok Abisai lokoku a Seruia lokaato a Yoab apei ka apei topolok Itai ŋolo arae Egititait. Tema, erwosit neni a ŋajorei, “Ikirukori ayoŋ kaapei ka iyes.”

³ Nai temasi ŋajorei neni keŋ, “Nyemaikina iyoŋ orukosi ka isua lojie, ani acepaki kebwaŋae isua, nyemitakinete ŋimoe akiwuapit isua. Tari daŋ keara ikes atutubet apei alokidiŋ kosi, mam ŋuna apolok nooi, nai epol akiyar kon iloit ŋina a ŋikilyok a ŋalipyo a ŋatomon alokidiŋ kosi. Ejok iyoŋ arubakin iboi alotaun, kiyakuununuye akiŋarakinet neni kosi.”

⁴ Tema erwosit neni kec, “Etiyae ayoŋ ŋuna ikitalakarito iyes.” Aŋun, abu Daudi towo alodiyete epuke apaki ŋina alomaryata ŋajorei daadaŋ kiŋa, etukonoro a ŋamiae ka a ŋalipyo.

⁵ Kicik erwosit Yoab ka Abisai ta Itai tema, “Aŋuna kaŋ, nyiryenyaanikis esorokit ŋol, Abusalom.” Apotu ŋajorei daadaŋ kiirasi erwosit iciki ŋikapolok kec ŋakiro ka Abusalom.

⁶ Aŋun, torotokis ŋajorei nariet neni ayakasi Ŋisirael; toyakaun ekiryam namoni ŋina alo Epuraim.

⁷ Tobwaŋa ŋirukitos a Daudi Ŋisirael a nen, toarakinae Ŋisirael ŋulu alalak nen akoloŋit ŋin. Arae ekimar a Ŋisirael a ŋulu aponi toarae ŋalipyo ŋatomoniarei.

⁸ Topetakin ejie ŋol akwap ŋin daadaŋ, toar amoni akoloŋit ŋin ŋituŋa ŋulu alalak akilo ŋulu aaryo ke ekileŋ.

⁹ Kiryamun Abusalom apaki ŋin ka ŋirukitos a Daudi. Adokit iŋes aŋole-sigirya, toloma aŋole-sigirya tooma ŋaten ŋuna ke ekuyon a ŋolo apolon nooi. Kikamut ŋaten akou ka Abusalom, kidoŋ Abusalom ineno anaten a ŋun iyeliyelo. Toem aŋole-sigirya nariet.

¹⁰ Kebu ekile ece kiŋolik ŋuna apotu kitiyakin neni ka Abusalom, ido tema neni a Yoab, “Eŋolikinit ayoŋ Abusalom ineno alokuyon.”

¹¹ Kiŋit Yoab ekile ŋol tema, “Ibala iyoŋ ai? Iŋolikinit iyoŋ iŋes a? Kaanukiro pa icumya iyoŋ iŋes a nen tocakun kwap? Kalakara ayoŋ nooi, okoinak iyoŋ ŋisilipae ŋitomon ka arokoba.”

¹² Nai tema ekile ŋol, “Ee, tari kerae kikiinakinete iyes ayoŋ ŋisilipae aliput, pa kacamu ayoŋ akiar lokoku a erwosit. Abu erwosit ikipupi isua ikicik iyoŋ ka Abisai ta Itai tema, ‘Aŋuna kaŋ, nyiar esorokit Abusalom.’

¹³ Ani nai kerae oarite ayoŋ a akan kaŋ iŋes, (anerae mam ŋakiro amaikina kimunonoe aneni a erwosit), pa robo ca kicamu iyoŋ daŋ atemar ikirukit ka ayoŋ.”

¹⁴ Tema Yoab, “Nyecanicani ayoŋ apaki ŋina ikoni na ikirworo ka iyoŋ.” Abu Yoab tolemu ŋakwaaras ŋauni, kirusokinia Abusalom lotau, eriŋa eyari ineno alokuyon.

¹⁵ Kirikaut Abusalom ŋisorok ŋitomon ŋulu aryoŋito ŋiboro a Yoab ŋulu ke ejie, kicumucuma iŋes toara.

¹⁶ Tokutak nai Yoab arupepe, ido toboŋut ŋajorei, kimyekis akiwuapit Ŋisirael, anerae abu Yoab tonyara ikes toboŋut.

¹⁷ Todakasi ikes akuwan ka Abusalom kimasakis nadui ŋina ayai namoni, ido tocakakis ŋamoru ŋuna alalak kidiama keŋ. Toema Ŋisirael daadaŋ ŋinituŋanan lore keŋ.

¹⁸ Ani sek eriŋa Abusalom eyari, kebu tolemu epir ya todupak nakadipaalat ŋina enyaritae ŋina ke erwosit, anerae abu iŋes tema, “Emam ayoŋ ikoku ŋinisapat ŋini akalimokinio torubakinia ekiro kaŋ eyai” Aŋun, abu Abusalom tonyara ekiro ke epir a ŋol a ekiro keŋ. Enyaritae ekiro ke epir a ŋol aduketait ŋina ka Abusalom tari tokona.

Kiira Daudi ŋuna ka atwanare ka Abusalom

¹⁹ Apaki ŋin, tema Aimas lokoku a Sadok, “Kimyekinae ayoŋ oem olimok ŋakiro neni a erwosit, atemar ikiu iyoŋ Ekapolon alomoe kon.”

²⁰ Tema Yoab neni ka Aimas, “Nyemaikina iyoŋ tolot alimor ŋakiro ŋadi nakoloŋit na, kimyek tolot akoloŋit ace, nai nyilosi iyoŋ nakoloŋit na, anerae aari ikoku a erwosit.”

²¹ Ekaku abu Yoab tema neni a Ekusait a ece, “Ape tolimok erwosit ŋakiro daadaŋ ŋuna idau iyoŋ akiŋolikin.” Kijuuru Ekusait ŋol alokiŋaren Yoab, itopoloorit, ido toem neni eyakitae.

²² Bu nabo Aimas lokoku a Sadok neni a Yoab tema, “Kerokyata ŋakiro daŋ, kimyekinae ayoŋ daŋ oem otupak Ekusait.” Nai abu Yoab kiŋit iŋes tema, “Kaanukiro lokoku kaŋ icamitor iyoŋ akiem ama, toyeni bo iyoŋ atemar emam eropit iryamuni aŋuna ka alimor ŋakiro ŋun.”

²³ Tema Aimas, “Kerokyata ŋakiro daŋ, aemi ayoŋ ama.” Aŋun, abu Yoab tema neni keŋ, “Toem.” Toem nai Aimas kitor lorot ŋolo ka adipo a ŋimukura, ido kebu todepa Ekusait.

²⁴ Apaki ŋin, kiboi Daudi alokidiŋ ŋipukei ŋiarei ŋulu a etaun ŋolo alotooma ka ŋolo alokiŋa. Kebu eketen etaun todoka kidiama arwatata ŋina ke epuke akirerekin etaun, ani irereiyori iŋes kiŋa, kiŋolik ekile emotuno bon.

²⁵ Tonyara eketen etaun erwosit, tolimok ŋakiro a ekile a ŋolo amotuno. Tema erwosit, “Ani kerae epei bon emotuno, eyaunit ŋakiro ŋuna ajokak.” Tomotun ekile ŋol toapu jik.

²⁶ Ekaku kiŋolik eketen etaun ekile ece emotuno, tonyara eketen etaun ekile ŋolo ete epuke tema, “Kiŋolik ekile nabo ece ye, emotuno bon!” Tema erwosit, “Emaikina iŋes daŋ eyaunit ŋakiro ŋuna ajokak.”

²⁷ Tema eketen etaun, “Aneni kaŋ, ekeri ŋolo iŋareni esibit Aimas lokoku a Sadok.” Tema erwosit, “Erae Aimas ekile ŋolo ajokan, emina iŋes ayaunun ŋakiro ŋuna ajokak.”

²⁸ Kiworou Aimas neni ke erwosit tema, “Ejokak ŋakiro daadaŋ.” Toryedik iŋes alokiŋaren erwosit kijuuru todol ereet kwap, ido tema, “Kipuroe Ekapolon Akuj kon, ŋina ikiinak iyoŋ akiloun ŋituŋa ŋulu ikimanito iyoŋ erwosit ekapolon kaŋ.”

²⁹ Kiŋit erwosit iŋes tema, “Mam ba ŋace aneni a esorokit ka Abusalom?” Toboŋok Aimas tema, “Ani apaki ŋina ekeyakuunia Yoab ayoŋ eketiyan kon, abu ayoŋ eŋolik ŋituŋa iguryakina, nai nyeanyuna ayoŋ ŋakiro ŋuna eguryakinito ikes.”

³⁰ Tema erwosit neni keŋ, “Tori nawae, towo a ne.” Aŋun abu Aimas tori, torubak ewoi a nen.

³¹ Bu nai Ekusait neni a erwosit tema, “Ejokak ŋakiro ŋuna ayaunit ayoŋ neni kon ekapolon erwosit kaŋ! Ikiu iyoŋ Ekapolon nakoloŋit na aneni a daadaŋ a ŋulu ikimanito iyoŋ.”

³² Kiŋit erwosit Ekusait ŋol tema, “Mam ba ŋace aneni a esorokit Abusalom?” Toboŋok Ekusait ŋol tema, “Agasi ayoŋ kitiyakinos neni a ŋimoe kon a daadaŋ a ŋulu ikimanito iyoŋ ekapolon erwosit kaŋ, ŋakiro ŋuna etiyakinosi neni a esorokit a ŋol.”

Kigwor Daudi aŋuna ka Abusalom

³³ Tobul erwosit nooi, tolot todoka kidiama nalapatu ŋina alo kidiama epuke, kigwor a nen; ani elosi iŋes, abu tema, “Okoe lokoku kaŋ Abusalom, lokoku kaŋ, lokoku kaŋ Abusalom. Nyo pa araakar ayoŋ atwani akilo iyoŋ; okoe Abusalom lokoku kaŋ, lokoku kaŋ!”