2 Sam. 17 - Ebaibul

¹ Ekaku a ŋirwa a ŋidi, tema Aisopel neni ka Abusalom, “Kimyekinae ayoŋ oseu ŋikilyok ŋalipyo ŋatomon ka ŋaarei, ido nai orotok akiwarit Daudi takae nakwaare.

² Esiiryakini ayoŋ iŋes eriŋa eupit ka ekadanakinit. Etuumikini ayoŋ iŋes etubul, ido toema ŋituŋa daadaŋ ŋulu erukitotor iŋes. Aari ayoŋ erwosit bon,

³ ido enyaku neni kon ŋituŋa ŋuluce daadaŋ. Eruwor atwanare a Daudi aboŋun a ŋituŋa a ŋuluce daadaŋ neni kon. Mam nyawani ayoŋ ŋituŋa ŋuluce daadaŋ.”

⁴ Kitalakasi ŋakiro ka Aisopel Abusalom ka ŋikasikou a Ŋisirael.

Ŋakiro a Usai

⁵ Tema nai Abusalom, “Tonyarautu Usai daŋ Earikait laalo, ido eirasi ŋuna elimuni iŋes daŋ.”

⁶ Ani ebuni Usai neni ka Abusalom, tema Abusalom neni keŋ, “Adau Aisopel alimun ŋakiro nu, ikitiyae ikwapei alimunio iŋes a? Ani kemam, tolimokinae isua.”

⁷ Tema nai Usai neni ka Abusalom, “Nyejokak apaki na ŋakiro ŋuna adau Aisopel alimun.”

⁸ Torubak Usai irworo tema, “Iyeni robo ca iyoŋ atemar ejioko papa kon ka ŋikilyok ŋulu erukitotor. Ededeŋ ikes ikote aŋatuny anariet ŋina edemaritae ŋitak keŋ. Nabo daŋ, eyeni papa kon ejie nooi; nyeperi iŋes neni epereneneete ŋasigarya keŋ.

⁹ Tari tokona daŋ eŋopit iŋes anaturukan, kori anakibois ka ace. Ani kisyak iŋes akitijikin ŋajorei kon, toar, elimunete ŋituŋa daadaŋ ŋulu iirarete ŋakiro ŋun ebe, ‘Aari ŋajorei ŋuna ka Abusalom.’

¹⁰ Tosodi nai tari ekile ŋolo ededeŋ anajore kon, ŋolo eryenyaana alotau ikwa eŋatuny, emini ekabule tomaranik, anerae eyenete Ŋisirael daadaŋ atemar erae papa kon ekajion ka ededeŋ ŋikilyok ŋulu erukitotor iŋes.

¹¹ Nai ŋuna alimuni ayoŋ ikes nu, ‘Emaikina tocunakinos Ŋisirael daadaŋ neni kon ameun alo Dan tari Beeriseba. Emaikina ikes elalak nooi ikwa asinyon alokipetot ka anam. Emaikina iyoŋ elope torik ikes iyai lojie.

¹² Aŋun, ikwaŋunio iwon Daudi anakibois a daadaŋ ikwaŋunere iwon iŋes. Etuumikisi iŋes, oburusiyasi lopite ŋolo eburusiyaryata ŋakopi akwap. Emam epite ŋolo ebucaror iŋes, kori ekile edio ŋolo erukitotor iŋes.

¹³ Ani kelot iŋes lotaun, eyaunete Ŋisirael daadaŋ ŋaunoi lotaun ŋol, kibwatarae etaun nakadipaalat akitodol neni emunyumunyaaror todaun ibore ipei daŋ.’”

¹⁴ Temasi Abusalom ka Ŋisirael daadaŋ, “Iyookino ŋakiro ŋuna alimu Usai Earikait akilo ŋuna ka Aisopel.” Alimunete ikes ŋun, anerae pa acamit Ekapolon kiyookinos ŋakiro ŋuna ajokak ŋuna alimunit Aisopel, ikotere Ekapolon isicani Abusalom.

Tolimok Usai Daudi akisi iwace

¹⁵ Tema nai Usai neni a ŋisacaradotin Sadok ka Abiasar, “Adau Aisopel alimokin Abusalom ka ŋikasikou a Ŋisirael akitiya ŋakiro nu ka nu, nai alimok ayoŋ iŋes akitiya nu ka nu.

¹⁶ Kiyakiyasi akirot atipei tolimokis Daudi ebe, ‘Nyipero lolo nakwaare lodoketa a ŋayona a ŋuna analoŋisat, totuboros a nen atipei nyiŋodiŋoda, acepaki emunyaryo erwosit kaapei ka ŋirukitos keŋ daadaŋ a nen.’ ”

¹⁷ Apaki ŋin awuasi Yonasan ka Aimas alocowa a ŋolo enyaritae Rogel, aya ikes nen, anerae pa acamakinito ikes idiotuŋanan kiŋolik ikes elomarete lotaun. Aŋun, eyakiyanaryo apese ŋina arae apito neni kec, ido toloto ikes alimokin erwosit Daudi ŋakiro.

¹⁸ Nai kebu esorokit epei kiŋolik ikes, ido tolot tolimok Abusalom. Aŋun, apotu ikes ŋuluarei ŋul torotokis a nen atipei toloto kai ke ekile ke ece a ŋolo alo Baurim. Ayakar ekile ŋol akare keŋ lore keŋ, ido apotu Aimas ka Yonasan todokasi kare ŋin.

¹⁹ Tolemu aberu a ekile a ŋol ibore, ya torapak nakituk a akare, ido tolok ŋikinyom kidiama arapet ŋin. Mam ituŋanan a nen ayeni ŋakiro ŋun ipei daŋ.

²⁰ Ani epote ŋirukitos ka Abusalom kai ka aberu a ŋin, kiŋita ikes temasi, “Ai eyakasi Aimas ka Yonasan?” Toboŋok aberu ŋin ikes tema, “Apotu todokasi ekekwaye ayonae.” Tosaka ŋikilyok ŋul Aimas ka Yonasan nen, nai apotu nyeryamut; aŋun, apotu toboŋosi Yerusalem.

²¹ Ani kerotokis ŋikilyok ŋul, todokut Aimas ka Yonasan alokare, toloto tolimokis Daudi ŋakiro ŋuna eyakitere ikes. Temasi, “Torotok, todoka ekekwaye aŋolol Yorodan atipei, anerae adau Aisopel alimokin Abusalom ŋakiro nu ka nu ŋuna nyejokak aŋuna kon.”

²² Aŋun, apotu Daudi ka ŋituŋa ŋulu arukitotor iŋes daadaŋ torotokis, todokasi ekekwaye Yorodan. Ani iwalari akwap, aris ŋituŋa daadaŋ kedokasi ekekwaye Yorodan.

²³ Ani eyenuni Aisopel atemar mam ituŋanan abu kiwuap ŋakiro keŋ, abu toenik esigirya keŋ toboŋo kai keŋ lotaun kec. Kitemok ŋiboro alokai keŋ, ido tomyedakin. Ani kedau iŋes atwanare, aponi yaarae akuwan keŋ tonukae neni anukitae papa keŋ.

²⁴ Ani edoluni Daudi Maanaim, todokarete Abusalom ka ŋikilyok ŋulu a Isirael daadaŋ ekekwaye Yorodan.

²⁵ Apaki ŋin, keris Abusalom keseu Amasa apolokin ŋasigarya keŋ, kilunyokin lorot a Yoab. Arae Amasa lokoku ke ekile a ŋolo anyaritae Isira a ŋolo arae Esiraelit, ŋolo eisit Abigail nakoku a Naas, ido arae Abigail nakaato keŋ a Seruia a toto a Yoab.

²⁶ Apotu Ŋisirael ŋulu arukito ka Abusalom kiboiyosi nakwap ŋina a Gilead.

²⁷ Ani edoluni Daudi Maanaim, apotu Sobi lokoku a Naas a ŋolo alo Raba alotaun a ŋolo alo Lodebar ta Barisilai ŋolo alo Gilead, ŋolo abuni aneni enyaritae Rogelim,

²⁸ yaut neni keŋ ŋiboro ŋuluperyet ka ŋabapwa ta ŋiboro ŋulukimujet ŋulu etiyaunitae ke elupe. Apotu daŋ ikes yaut ŋaganoi, ŋikinyom ŋulu ikwaan ka erau, ŋakirya, ŋikinyom ŋulu iwowatae ka ŋimare ta emaret ŋolo enyaritae ekao.

²⁹ Yaut ikes akimyet ka ao, akimyet, ŋamesekin ka elabo ŋolo a ŋakile a ŋaatuk, inakis Daudi ka ŋirukitos keŋ kimuja. Etiyaete ŋul ŋun, anerae apotu temasi, “Eupit ŋituŋa ka enyamit akoro ka akure ŋina atubunotor analoŋisat.”