2 Sam. 16 - Ebaibul

Daudi ka Siba

¹ Ani etiyaar Daudi iwadio alokiŋaren emoru, bu neni keŋ eketiyan a Mepiboses ŋolo anyaritae Siba. Amet Siba ŋisigirya ŋiarei ŋulu ewokito ŋasaaja ŋuna aya ŋamugati ŋamiae ŋaarei ŋaboboryo amiat ŋuna etiyatae esibit ŋamugati ka ŋaraito ŋuna imujio nakamu ta ebur ŋolo etiyaunitae a elou a ibarasit ŋolo eturitae epiini.

² Kiŋit erwosit Siba tema, “Kaanukiro iyaunia iyoŋ ŋiboro lu neni kaŋ?” Toboŋok Siba tema, “Erae ŋisigirya lu ŋulu emaikina ŋituŋa a ekal a erwosit todokakis, erae ŋamugati ka ŋaraito ŋuna emaikina kimuja ŋirukitos kon, ido erae epiini ŋolo iŋarakinere ŋini daadaŋ eupi analoŋisat.”

³ Kiŋit erwosit Siba tema, “Ai eyai lopapait a ekapolon?” Toboŋok Siba erwosit tema, “Idoŋit iŋes Yerusalem aŋuna etamya ebe, ‘Ekenyakakinete ayoŋ ŋituŋa a Isirael apukan ŋina paaran arae ŋina a papaa kaŋ.’”

⁴ Tema nai erwosit neni a Siba, “Ibore daadaŋ ŋini erae ŋini a Mepiboses, eruwor ŋini kon tokona.” Tema Siba, “Arae ayoŋ eketiyan kon, kimyekinae ayoŋ oruwor ŋolo ajok aneni kon ekapolon kaŋ erwosit.”

Kicen Simei Daudi

⁵ Ani edoluni erwosit Daudi neni anyaritae Baurim, bu neni keŋ ekile ece anateker ata Saul. Arae iŋes Simei lokoku a Gera. Ani elomuni Simei Baurim, kisyak akicen Daudi.

⁶ Kimasamasa Simei Daudi ka ŋiketiyak daadaŋ a ŋamoru, apaki ŋin awuasi aloteten ka alokedyeny a Daudi ŋajorei daadaŋ ka ŋiketeok a Daudi.

⁷ Tocelu Simei icenonor tema, “Tolot! Tolot kiŋa! Iyoŋ ekaaran! Iyoŋ ŋolo aronon!

⁸ Enyaŋa Ekapolon aneni kus a daadaŋ ŋaokot a ŋituŋa a ekal a Saul a ŋolo ilunyokina iyoŋ lokicoloŋ keŋ akipuka, adau Ekapolon ainakin apukan neni ka Abusalom a lokoku kon. Kiŋolik iryamu tokona iyoŋ ŋican, anerae idaunit iyoŋ akiar ŋituŋa.”

⁹ Kiŋit Abisai lokoku a Seruia erwosit tema, “Kaanukiro icenio eŋok ŋolo atwan lo ekapolon kaŋ erwosit? Kimyekinae ayoŋ olot neni keŋ otubo akou keŋ.”

¹⁰ Nai kiŋit erwosit Abisai tema, “Anukiro mono emaikina ayoŋ etiya neni kus ŋidwe a Seruia ŋulusapa? Ani kicenonor iŋes aŋuna alimokinia Ekapolon ebe, ‘Kicen Daudi’ ŋae nai epedori akiŋita ebe, ‘Kaanukiro icenio iyoŋ Daudi?’ ”

¹¹ Tema Daudi neni ka Abisai ka neni a ŋiketiyak keŋ a daadaŋ, “Erae lokoku kaŋ ke elope iŋes iwarit akiar ayoŋ, etya nai ai acamit ŋina acamitor Ebenjaminait lo akiar ayoŋ! Kimyekisi iŋes kitiya ŋuna ecamit, kimyekisi iŋes kicenonor, anerae adau Ekapolon alimokin iŋes akitiya ŋun.

¹² Acepaki epedori Ekapolon akiŋolikin ŋican ŋulu aryamunit ayoŋ, ido kinyaŋa Ekapolon ŋakiro kaŋ a ŋakiro aŋuna ajokak, nyisiyook ŋicen lu ŋulu ekecenere ayoŋ nakoloŋit na.”

¹³ Aŋun, abu Daudi ka ŋirukitos keŋ torotokis a nen tomekis erot, tosodi Simei kisibakiya ikes elosi inapakina emukura, icenonor elosi, imasanari ŋamoru ka ielanari ŋalup neni a Daudi.

¹⁴ Todolo erwosit ka ŋituŋa daadaŋ ŋulu arukitotor Yorodan eupit nooi, ido kiwuara erwosit a nen.

Ŋakiro ka Aisopel

¹⁵ Ani kerotoki Daudi alo Yerusalem, todolut Abusalom ka Ŋisirael daadaŋ Yerusalem, arukito Abusalom ka Aisopel.

¹⁶ Ani ebuni Earikait ŋolo anyaritae Usai, lokone a Daudi neni ka Abusalom, tema iŋes neni ka Abusalom, “Agasi ayoŋ torubak iyoŋ erwosit iyari!”

¹⁷ Kiŋit Abusalom Usai tema, “Epite ŋolo ikinyomitor iyoŋ lokone kon ŋol a? Kaanukiro pa irukoryata iyoŋ ka lokone kon?”

¹⁸ Toboŋok Usai Abusalom tema, “Mam, nai arubakini ayoŋ ikirukit ka ikiriit ka ŋini aseu Ekapolon ka ŋituŋa a Isirael daadaŋ ta ŋituŋa lu daadaŋ.

¹⁹ Nabo daŋ, ŋae emaikina ayoŋ etiyanak? Nyemaikina mono ayoŋ etiyanak lokoku keŋ a? Ikwapei abunio ayoŋ etiyanak papa kon, eketiyanakini ayoŋ iyoŋ.”

²⁰ Tema Abusalom neni ka Aisopel, “Tolimokinae isua ŋakiro ŋadi. Nyo emaikina isua kitiyae?”

²¹ Toboŋok Aisopel tema, “Ape kituruwo ŋaberu a papa kon ŋuna nyiitit ŋuna kon. Nakiro ŋun nai eanyuniata Ŋisirael daadaŋ atemar kimanakinosi iyoŋ ka papa kon, ido isimukekinosi ŋulu iriito ka iyoŋ daadaŋ.”

²² Aŋun, apotu ŋituŋa kigurokis eema ka Abusalom kidiama akai nenilapat, ido abu Abusalom kituruwo ŋaberu a papa keŋ ŋuna pa eitit ŋuna keŋ iteete Ŋisirael daadaŋ.

²³ Apaki ŋin, ajokak ŋakiro ŋuna alimuni Aisopel, ekwaan ka ŋuna elimokini Akuj ituŋanan. Apotu Daudi ka Abusalom kiwuapa ŋakiro keŋ.