2 Sam. 11 - Ebaibul

Daudi ka Basiseba

¹ Ani ekaru ŋol iceere, apaki ŋina aminatar ŋirwosi aŋaanar ŋajorei, kiyakiya Daudi Yoab ka ŋikapolok ŋulu ewuapito Yoab anapolou ta Ŋisirael daadaŋ. Toloto ikes toara Ŋiamoni kikamasi Raba. Nai edoŋit Daudi apaki ŋin Yerusalem.

² Apeikoloŋit esoŋakini akoloŋ, tonyou Daudi alokitaada keŋ, tolot todoka kidiama akai keŋ neni alapat, ido ca elosi a nen irimit. Alokidiama a nen, kebu iŋes kiŋoliya kwap, kiŋolik aberu iloŋa. Ebus aberu ŋin nooi,

³ ido abu Daudi kiyakiya ituŋanan ayenun ejok ŋuna etapito aberu ŋin. Aponi tolimokinae Daudi ebe, “Erae aberu ŋin Basiseba nakoku ka Eliam, aberu a Uria a ŋolo erae Eititait.”

⁴ Aŋun, abu Daudi kiyakiya ŋituŋa aomere aberu ŋin, ido abu aberu ŋin bu neni a Daudi kiryamakinos ka iŋes. (Apaki ŋina eloŋar iŋes ŋin, etesega iŋes, anerae kerae akirikakin iŋes ayakau lolap ŋin.) Ani kedau iŋes akiryamakin ka Daudi, abu toboŋo kai keŋ.

⁵ Abu Basiseba towoiya, ido abu kiyakiya ituŋanan alimokin Daudi ŋakiro nu ebe, “Aryamu ayoŋ akook.”

⁶ Aŋun, abu Daudi kiyakiya ituŋanan neni a Yoab alimokin Yoab ebe, “Kiyaku Uria ŋolo erae Eititait neni kaŋ.” Aŋun, abu Yoab kiyakiya Uria neni a Daudi.

⁷ Ani edoluni Uria neni a Daudi, kiŋit Daudi iŋes neni ikote Yoab ka ŋituŋa ŋuluce ka epite ŋolo eyakar ejie.

⁸ Tema nai Daudi neni a Uria, “Ape, totiyaar kai kon kieŋu.” Toloma Uria alokai a erwosit, totupak ituŋanan ice iŋes, ŋini atiŋit ainakinet neni keŋ, aneni a erwosit.

⁹ Nai abu Uria toper lopuke ŋolo ka akai a erwosit, neni aperete ŋiketiyak a erwosit ŋuluce daadaŋ. Abu iŋes nyelot kai keŋ.

¹⁰ Ani elimokinio Daudi ŋakiro nu ebe, “Abu Uria nyelot kai keŋ,” Tema Daudi neni a Uria, “Ariŋa iyoŋ ibuni, kaanukiro pa ilosyo iyoŋ kai kon?”

¹¹ Toboŋok Uria Daudi tema, “Eriŋa Asaduku ka Ŋisirael ta ŋituŋa a Yudaya iboiyete aloeemae, nabo Yoab daŋ ekapolon kaŋ ka ŋiketiyak a ekapolon kaŋ, iboiyete aneni elapat anariet. Apedori mono ayoŋ alosit kai kaŋ akimuj ka akimat, ido eryamakinos ka aberu kaŋ? Ekoŋi ayoŋ atemar ani eriŋa iyoŋ iyari, nyetiyakini ayoŋ ŋakiro ŋun.”

¹² Tema nai Daudi neni a Uria, “Nyiboŋo a ne nakoloŋit na daŋ, eketoboŋori ayoŋ iyoŋ moi taparacu.” Aŋun abu Uria kiriya alo Yerusalem akoloŋit ŋin ka akoloŋit ŋina atupakini ŋin.

¹³ Tonyarau nai Daudi Uria akimuj ka akimat kaapei ka iŋes, ido abu Daudi kitemerak Uria; ani ewari, tolot Uria akiper lokitaada keŋ neni aya ŋiketiyak a ekapolon keŋ ŋuluce, abu iŋes nyelot kai keŋ.

Kitaar Daudi ŋimoe Uria

¹⁴ Ani taparacu, kigir Daudi abaruwa neni a Yoab, inak Uria ya.

¹⁵ Ŋakiro egirit Daudi nabaruwa ikes nu ebe, “Kiyakiya Uria min kiŋaren neni ededeŋia ekiryam alojie, ani elosi iŋes nen, kikutukutoosi iyes kimyekis iŋes bon, ikotere eremyo toarae.”

¹⁶ Ani apaki ŋina ekamarya Yoab etaun, abu iŋes kiwuak Uria lokiryam ŋolo aji aneni ayeni iŋes atemar eya ŋimoe ŋulu ededeŋak.

¹⁷ Tolomut ŋikilyok a etaun a ŋol kitijikis Yoab; toara ikes ŋice a ŋiketiyak a Daudi ŋulu aya najore a Yoab. Apotu ikes toara Uria daŋ Eititait.

¹⁸ Abu nai Yoab kiyakiya ituŋanan neni a Daudi, alimokin iŋes ŋakiro ke ejie daadaŋ.

¹⁹ Tema iŋes neni a ituŋanan a ŋin, “Ani kidau iyoŋ alimokin erwosit ŋakiro ke ejie nu daadaŋ,

²⁰ ido acepaki kitoŋaa iŋes ŋun, ikiŋit iyoŋ tema, ‘Kaanukiro iapiyaryata iyes lotaun akitijiore ŋimoe? Pa iyenete iyes atemar epetunete ŋimoe ŋulu eyakasi kidiama arwatata ŋikaleŋeleŋe a?

²¹ Ŋae aari Abimelek lokoku a Yerubaal? Meere mono aberu ekokorikini iŋes amoru ŋinakiryeet anarwatata, kidoŋok iŋes Tebes a? Kaanukiro iapiyaryata iyes narwatata?’ emaikina iyoŋ toboŋok erwosit tema, ‘Aari Uria daŋ Eititait, eketiyan kon.’ ”

²² Aŋun, torotok ekiyakia a Yoab ŋol, todol neni a Daudi, tolimok iŋes ŋakiro daadaŋ ŋuna eyakitor Yoab iŋes.

²³ Tema ekiyakia ŋol neni a Daudi, “Apotu ŋimoe ikilout isua, tolomut kiŋa etaun, ikisiiryata isua anariet, nai aponi isua kiritarae ikes toboŋosi lopuke a etaun.

²⁴ Nai ŋimoe ŋulu aŋikaleŋeleŋe, ikes ikigumete isua ŋiketyak kon anarwatata, aari ŋice a ŋiketiyak kon erwosit, aari Uria daŋ Eititait eketiyan kon.”

²⁵ Tema Daudi neni a ekiyakia a ŋol, “Ape tolimok Yoab ŋakiro nu ebe, ‘Nyikikadak iyoŋ aŋuna a ŋakiro a ŋun; erae ajie neni epedorere aarya ituŋanan. Torubak itiji ŋituŋa a etaun ka agogoŋu, toreu ikes ka kikama etaun kec.’ Tolimok Yoab ŋakiro ŋun ka kisimukek iŋes.”

²⁶ Ani iirari aberu a Uria atemar aari lokile keŋ, abu kigwor iwololoe aŋuna alokile keŋ.

²⁷ Ani elunyar ŋirwa ŋulu ka akigworo lokile keŋ, kiyakiya Daudi ituŋanan ayaun aberu ŋin kai keŋ, ido abu iŋes toruwor aberu a Daudi, kidou ikoku a Daudi ŋinisapat. Nai apotu nyitalakasi Ekapolon ŋakiro ŋuna abu Daudi kitiya.