2 Sam. 10 - Ebaibul

Kilou Daudi Ŋiamoni ka Ŋiarameani

¹ Ekaku ka apaki a ŋina auruwuana, totwana erwosit a Ŋiamoni, kilunyokin Anun lokoku keŋ lokicoloŋ keŋ kipuka Ŋiamoni.

² Tema Daudi, “Etiyae ayoŋ ŋuna ajokak neni Anun alokoku a Naas, lopite ŋolopei abunio papa keŋ kitiya ejok neni kaŋ.” Aŋun, abu Daudi kiyakiya ŋituŋa akisirworiun Anun; alimokin iŋes akiyaloloŋ a Daudi aŋuna ka atwanare a Naas a papa Anun. Ani edolete ŋituŋa ŋulu eyakit Daudi nakwap a Ŋiamoni neni Anun akisirworiun iŋes,

³ kiŋita ŋikapolok a Ŋiamoni Anun ekapolon kec temasi, “Itami kire iyoŋ atemar itopoloorit Daudi papa kon aŋuna eyakuunia ŋituŋa alimokin iyoŋ akiyaloloŋ keŋ aŋuna apapa kon a? Meere mono aripirip iyakuunitor Daudi ŋituŋa, ikotere erosete ejok, ido kikamasi akwap a?”

⁴ Aŋun, abu Anun kikama ŋituŋa ŋulu eyakit Daudi, tobanya epeiwae epenek a ŋinituŋanan a ŋul, totubo ŋilowi kec alokidiŋ anacirin, ido kirita ikes toloto nariet.

⁵ Ani elimokinio Daudi ŋakiro ŋun, kiyakiya ŋituŋa akisiryam ŋikilyok ŋul, anerae apotu ŋileec kiruma ikes nooi. Tema erwosit neni kec, “Kiboiyoto mono alo Yeriko, akitodol ŋina elomuniata ŋipeneka kus, ido nai toboŋut laalo.”

⁶ Ani eanyunete Ŋiamoni atemar aremokin daudi ikes, kiyakiyata ikes ŋituŋa akipaŋgaun ŋituŋa ŋice kiŋarakis ikes. Apotu ikes kipaŋgaut: Ŋiarameani ŋulu alo Bes-Reob ka Ŋiarameani ŋulu alo Soba; potu ŋul erae ŋasigarya ŋalipyo ŋatomoniarei ŋulu alosete a ŋakejen, kipaŋgaut ikes tari erwosit ŋolo a Maaka ka ŋasigarya keŋ aliput; kipaŋgaut ikes ŋikilyok ŋice ŋalipyo ŋatomon ka ŋiarei alo Tob.

⁷ Ani iirari Daudi ŋakiro ŋun, kiyakiya Yoab ka ŋasigarya daadaŋ ta ŋikilyok ŋulu apedorito ajiore.

⁸ Tolomut Ŋiamoni alotaun, kicodosi iwuapito erot epei akisyakin alopuke ke etaun; nai apotu Ŋiarameani ŋulu alo Soba ka ŋulu alo Bes-Reob ka ŋikilyok ŋulu alo Tob ta ŋulu alo Maaka, toriwo neni kec make neni alapat.

⁹ Ani iŋolikini Yoab atemar ekecodokis iŋes ŋimoe akitijikin alokicodi ka anabusya, abu iŋes toseu ŋikilyok daadaŋ ŋulu ajiok alo Isirael, kicodosi ikes akisiiryakin Ŋiarameani.

¹⁰ Inak Yoab lokaato keŋ Abisai apolokin ŋikilyok ŋuluce daadaŋ kicodosi ikes akisiiryakin Ŋiamoni.

¹¹ Tema Yoab, “Ani kegogoŋioto Ŋiarameani akilo ayoŋ, emaikina iyoŋ ibu akiŋarakin ayoŋ; nai ani kegogoŋioto Ŋiamoni akilo iyoŋ, abuni ayoŋ akiŋarakin iyoŋ.

¹² Togogoŋior, ido totitinyior eŋarakisi ŋituŋa yok, oiutu ŋitaunio ŋulu ka Akuj yok, elipa Ekapolon kitiya ŋuna ejokak aneni keŋ.”

¹³ Aŋun, apotu Yoab ka ŋikilyok ŋulu arukitotor, kicodosi akisiiryakin Ŋiarameani; ido apotu Ŋiarameani tobwaŋas alokiŋaren Yoab.

¹⁴ Ani iŋolikinete Ŋiamoni atemar abwaŋasi Ŋiarameani, tobwaŋas ikes daŋ alokiŋaren Abisai, tolomasi lotaun. Tojoŋo nai Yoab akisiirya Ŋiamoni, toboŋo tolot Yerusalem.

¹⁵ Nai ani eanyunete Ŋiarameani atemar elout Ŋisirael ikes, apotu tocunakinos iwapei.

¹⁶ Kiyakiya Adadeser ŋituŋa ayaun Ŋiarameani ŋulu eboiyete alokekwaye aŋolol ŋina enyaritae Eupurate. Potu Ŋiarameani ŋul neni enyaritae Elam, topolok ikes Sobak ŋolo arae ekarikon a ŋasigarya ka Adadeser.

¹⁷ Ani elimokinio Daudi ŋakiro ŋun, tocunak Ŋisirael daadaŋ, todokasi Kide Yorodan toloto Elam. Kicodosi Ŋiarameani akisiryam Daudi, kitijikis iŋes.

¹⁸ Nai apotu tobwaŋas alokiŋaren Ŋisirael, toara ata Daudi Ŋiarameani ŋajorei ŋakanikaarei ŋulu ameto ŋaŋolei ka ŋalipyo ŋatomoniomwon ŋulu alosete a ŋakejen. Apotu ata Daudi toara tari Sobak, ekarikon a ajore a Ŋiarameani, kidoŋok lokiryam nen.

¹⁹ Ani eanyunete ŋirwosi daadaŋ ŋulu ariito ka Adadeser atemar elout Ŋisirael ikes, apotu kisila ka Ŋisirael, toruwor Ŋisirael epukato ikes. Aŋun, apotu Ŋiarameani tokuryaketa akiŋarakin Ŋiamoni nabo.