2 Pet. 2 - Ebaibul

Ŋiketatamak ŋulu alyokonok

¹ Ayakasi koloŋ ŋikadwarak ŋulu alyokonok lotuŋa; ikwaŋinapei ikoŋin, etakanunete ŋiketatamak ŋulu alyokonok aneni kus. Irepunete ikes ŋakitatameta ŋuna alyokonok ŋuna eyaunete akinyasuno ka eŋerete Ekapolon ŋolo abu tolaku ikes. Aŋun, eyaunete ikes neni kec akinyasuno atipei.

² Iwuapete ŋikalalak ŋipitesyo kec ŋulu ka asiilyanut; aŋuna kec, iyanyete nooi ŋuluce erot ŋolo a kire.

³ Aŋuna ka arorokanut kec, eryamunete ŋiketatamak lu epoida aloemuto a ŋulu isudete ikes. Adol tokona apaki ŋina aoyan etenit ekatubokinan kec ka nyejotoe ekamunyaran kec!

⁴ Pa abu Akuj kimyek ŋimalaikan ŋulu apotu toseca, nai abu tocakak ikes nakiryonut ŋinakiryonon cuc, neni eenitere ikes a ŋiriko akitodol Akoloŋit ŋina ka atubokino.

⁵ Pa abu Akuj kimyek ŋituŋa ŋulu koloŋ, nai abu yau ŋakipi ŋuna apotu torapuwasi akwap ŋina a ŋituŋa a ŋulu aŋerete iŋes; ŋulu make abu iŋes tolaku ikes Noa ŋolo etatami akiyookino ka ŋituŋa ŋice ŋikanikaarei.

⁶ Abu Akuj totubok ŋitaunio ŋulu a Sodoma ka Gomora, tomunya ikes ka akim, kituruwo akitaanyikinet neni a ŋulu eŋerito Akuj.

⁷ Abu iŋes toiu Lot, ekile ŋolo eyookino, ŋolo aryeba nooi aŋuna a ŋulucetuŋa a ŋulu etiyaete aronis.

⁸ Eboi Lot ŋolo ewuapit epite ŋolo ecamit Akuj ka ikes, nai eyaloloŋi iŋes a ŋinakoloŋit a ŋakiro a ŋuna aronok, a ŋuna ete ka topupi itiyaete ikes.

⁹ Etakani nai atemar eyeni Ekapolon epite ŋolo iunet ŋulu eyarete, epite ŋolo ecamit Akuj anakikatanakineta kec ka eyeni epite ŋolo esikinet ŋikasecak akitodol Akoloŋit ŋina ka atubokino; kisicanae.

¹⁰ Erae ŋun kire nooi, ikotere ŋulu iwuapito ekibure kec ŋolo aronon ŋolo a ŋawat ka toŋerito akipukao. Erae ŋiketatamak ŋulu alyokonok ŋul, ŋulu nyeleecoko ka isupaka, nyekerito ikes ŋisubuna ŋulu itopolooritae, ŋulu eyakasi kidiama; nai iyanyete ikes.

¹¹ Tari ŋimalaikan ŋulu epol agogoŋu kec ka apedor kec akilo, nyisitanakinete ikes ŋisubuna ŋulu itopolooritae alokiŋaren Ekapolon.

¹² Irworosi ŋituŋa lu iyanyete ibore ŋini nyeyenete ikes apolou keŋ. Ikote ikes ŋityaŋ ŋulu ka ariet, ŋulu nyetamete, ŋulu euruunitae kisurumae, tomunyarae. Ikwapei ŋityaŋ ŋul, emunyarosi ikes daŋ.

¹³ Etacakinio ikes aronis aŋuna ka aronis a ŋina etiyata ikes. Alakara aneni kec iŋes akitiya ŋinibore daadaŋ naparan ŋini isimwoni ekibure a ŋawat kec. Ikote ikes aŋoryomom ka aaŋoryanut, anerae ejoikinit ikes jik akirworo alyokonu apaki ŋina imujata iyes ka ikes.

¹⁴ Emam icebore ŋini eminasi ikes akilo ŋaberu ŋuna emalaaka; nyedipanakin ekibure kec ŋolo ka asecenen. Icocoiyanarete ikes ŋituŋa ŋulu epalag alotai naloc. Itatamitae ŋitai kec arorokanut! Ilamit Akuj ikes!

¹⁵ Aesikis ikes erot ŋolo idiiri, aoliyosi alorot kec; atupakis erot a Balaam, a lokoku a Bior a ŋolo amina ŋisiliŋa ŋulu aryamununui iŋes alorotin a ŋulu aronok.

¹⁶ Nai aponi iŋes kiyayakinae aŋuna ka akisec keŋ; abu esigirya keŋ kirworik ikwa ituŋanan ka kiteesik ekadwaran ŋol ŋiticisyo ŋulu esikerepikinito iŋes.

¹⁷ Ikwaan ŋikilyok ŋul ka ŋilelyan ŋulu ejuwasi, ikwaan ka ŋidouwon ŋulu ekutanari ekuwuam. Adau Akuj akitemokin akibois kec tooma nenikiryonon cuc.

¹⁸ Irworosi ikes ŋakiro ŋuna apolok ŋuna ileleba abaŋao; isitiyaete ikes ekibure ŋolo ka akuwan ŋolo aronon, akisirumia ŋulu ariŋa sek ebucarosi alotuŋa a ŋulu eyarete anadyakarit.

¹⁹ Iiyanakinete ikes ŋituŋa ŋuluce alacakina, torae bo ikes ŋipi ŋulu a ŋipitesyo a ŋulu amunaarak; anerae erae ituŋanan epito a ibore a daadaŋ a ŋini adau akiloun iŋes.

²⁰ Ani kebucun ŋituŋa anapedorosyo a ŋuna aronok a ŋuna ka akwap, alotooma ayenut Ekapolon ka Ekaiunan yok Yesu Kristo, ido kikamut ka kilout ŋuna aronok ikes nabo, eruwor ŋituŋa ŋul ŋulu aronok nooi akilo eyakae kec ŋolo sek ke ekiŋaren.

²¹ Kitemokino sek ikes nyeyenunito erot ŋolo ka akiyookino, akilo ayenun ani ekaku toŋero akiciket ŋina ka Akuj ŋina aponi inakinae ikes!

²² Ŋuna apotu kitiyakin neni kec, itoodiunito atemar iyookino ŋakitadapeta nu, “Eboŋokini iiŋok akinyam ŋalyakan keŋ” ka “Epege ŋolo adaun akilotar, eboŋori akibelibelo alocoto.”