2 Ŋites. 2 - Ebaibul

Eketepegan ŋolo ka Akuj

¹ Ŋikaitotoi, ŋuna ikamunito abunore ŋina ke Ekapolon Yesu Kristo ka acunakin yok akisiryam iŋes, ikimaimai isua iyes

² nyiryaŋiryaŋakin atipei anatameta kus, nyikibul aŋuna elimuni ice atemar adolu Akoloŋit ŋina ke Ekapolon. Nyinupa ŋun, tari kikilimok daŋ idiotuŋanan atemar erae ŋakiro ŋun ŋuna edwaritae kori ŋuna alimunitoe kori egiritae isua.

³ Nyikimodik iyes idiotuŋanan alopite a edio daŋ, anerae nyebuni Akoloŋit ŋin, mati kedol mono apaki ŋina eŋeryoto ŋituŋa ŋulu alalak Akuj, ido totakanu nai Eketepegan ŋolo ka Akuj, ŋolo emaikina tocakakinae nakim ŋina nyeduŋe.

⁴ Itepegi iŋes ibore daadaŋ ŋini enyaritae akuj kori ibore daadaŋ ŋini isitiyaete ŋituŋa akitopoloonorya ŋakujo ka itopoloori iŋes bon akilo ŋakujo daadaŋ. Iboikin tari Kai ka Akuj, ido kitusubun bon Akuj.

⁵ Nyitamunito mono iyes atemar abu ayoŋ okolimok iyes ŋakiro ŋun daadaŋ apaki ŋina ikirukitor iwon a?

⁶ Iyenete iyes ibore ŋini iretakinit ŋakiro tokona. Isileereunio Eketepegan ŋolo ka Akuj edoli apaki keŋ.

⁷ Anerae adaut ŋapedorosyo ŋuna itiyaete aronis anakimunono ageun etic kec, nai nyisileereunio ikes mati mono kelemar iŋes alorot a ŋolo iretakinitor iŋes ikes.

⁸ Kisileereunoe nai Eketepegan Akuj; nai ani ebuni Ekapolon Yesu, eari Eketepegan ŋol a ekuwuam a ŋolo ka akituk keŋ ka inyasuni Yesu iŋes ka akica a ŋina enwakinwaki a ŋina ebunio iŋes.

⁹ Ebuni Eketepegan ŋolo ka Akuj ŋol ka apedor a ŋina a Satan, akitiya ŋakujuwuanisya ka ŋaumonokineta ŋuna alalak ŋuna ka amodiyo

¹⁰ ka isitiyae amodiyo daadaŋ ŋina ka aronis keŋ alotuŋa a ŋulu ebukoro. Ebukorosi ikes, anerae apotu ikes nyijaut ka nyeminakis ŋakiro ŋuna a kire, ikotere toiunos.

¹¹ Aŋakiro a ŋun, ejalakini Akuj ikes nakiro ŋuna nyiyookino, ikotere tonupa ŋakiro ŋuna ka amodiyo.

¹² Aŋun nai, etubokini Akuj ŋituŋa daadaŋ ŋulu pa apotu tonupa ŋuna a kire, ŋulu abobokinit asecenen.

Ikiseunitae iyes aŋuna ka aiuno

¹³ Ŋikaitotoi, itemokino isua olakaros neni ka Akuj ŋapakio daadaŋ aŋuna kus a ŋulu ikimina Ekapolon. Anerae abu Akuj itoseu iyes anakisyakinet aŋuna ka aiuno alotooma akiteseguno kus aneni ke Etau a ŋolo Asegan ka alotooma anupit kus ŋakiro ŋuna a kire.

¹⁴ Abu Akuj alotooma Ŋakiro ŋuna Ajokak ŋuna aponi isua itolimonokin iyes itonyar iyes naiuno, ikotere toryamut iyes daŋ apolou ŋina ke Ekapolon Yesu Kristo.

¹⁵ Aŋun ŋikaitotoi, kicata ka torubakisi ikamunito ŋakiro ŋuna a kire ŋuna aponi isua ikitatamyanakin iyes analimonokin ka anabaruwa kosi.

¹⁶ Ikilipi isua neni ke Ekapolon yok Yesu Kristo elope ka neni ka Akuj Papa yok, ŋolo abu itominak iwon ka ikiinak iwon anajokis keŋ atitinyu ŋina nyedaunun ka akigeno ŋina ajokan,

¹⁷ akisimukekin iyes ka akitogogoŋ iyes, ikotere kitiyata ka kirworo ŋakiro daadaŋ ŋuna ajokak.