2 Ŋirw. 5 - Ebaibul

Kitaŋaleunoe Naaman

¹ Arae Naaman ekarikiton ŋasigarya ŋuna ke erwosit a ŋolo ka Aram. Arwo iŋes nooi ka amina erwosit iŋes, anerae abu Ekapolon kisitiya Naaman, kilounia erwosit ka Aram ŋimoe keŋ. Nai abu arwonit todyakakin atapon.

² Akoloŋit apei eŋaarito ŋituŋa ka Aram ajore akirem Isirael, kepotu kikamasi apese alo Isirael, yaasi toruwor aketiyan ŋina ka aberu a Naaman.

³ Tolimok apese ŋin aberu a Naaman tema, “Kerae toyai epite ŋolo eanyunia ekapolon kaŋ Naaman ekadwaran ŋolo eyai Samaria, kitaŋaleu ekadwaran ŋol ekapolon kaŋ anadyak atapon.”

⁴ Abu nai Naaman tolot tolimok erwosit ŋolo ka Aram ŋakiro ŋuna erworo apese ŋina arikunio alo Isirael.

⁵ Tolimok erwosit Naaman tema, “Ape, akainakini ayoŋ iyoŋ abaruwa ŋina egirakini ayoŋ erwosit a Isirael.” Tolot Naaman, ya ŋitalantae ŋitomon ŋulu arae ŋisilipae ka ŋicekelya ŋalipyo ŋakanikapei, ŋulu arae egolid ta ŋilowi ŋarekia ŋatomon.

⁶ Ya iŋes abaruwa neni ke erwosit a Isirael, tosodi tosyom erwosit abaruwa ŋin ŋina abala, “Ani edoluni abaruwa na neni kon, toyenu atemar eyakuunit ayoŋ Naaman eketiyan kaŋ kitaŋaleu iyoŋ iŋes anadyak atapon.”

⁷ Ani irikakini erwosit a Isirael akisyom abaruwa ŋin, tocilicili ŋilowi keŋ tocelu tema, “Arae ayoŋ Akuj ŋina aari ŋituŋa kori ŋina eteyarununui a? Kaanukiro iyakunitor etuŋanan ŋol ekile lo neni kaŋ atemar etaŋaleu ayoŋ anadyak atapon? Toanyutu mono iyes epite ŋolo iwaritor iŋes ebura ka ayoŋ?”

⁸ Nai, ani iirari ekadwaran Elisa atemar acilicili erwosit ŋilowi, kiyakiya akirot lorwosit tema, “Kaanukiro iciliciliya iyoŋ ŋilowi kon? Kimyek Naaman bu neni kaŋ, ikotere eyenuni atemar eyai ekadwaran Isirael.”

⁹ Bu nai Naaman erukito ka ŋasigarya keŋ ŋuna adokito ŋaŋolei ka ŋagaari ŋuna eritae a ŋaŋolei, tosodo towua alokiŋaren ere ke Elisa.

¹⁰ Kiyakiya Elisa ituŋanan alimokin Naaman ebe, “Tolot kiloŋari anaŋolol Yorodan ŋakiloŋaret ŋakanikaarei tosodi tojokyar akuwan kon toŋaleu.”

¹¹ Nai abu Naaman toluŋakin, torotok ebala, “Atami sek ayoŋ atemar kori ebuni iŋes kiŋa towo a ne, tosodi tonyara ekiro ŋolo ke Ekapolon a Akuj keŋ, totap akuwan kaŋ eketaŋaleu anataponu!

¹² Nyejokak mono ŋaŋololin a Damasko ikwa Abana ka Paripar akilo ŋaŋololin a Isirael daadaŋ a? Nyapedori mono ayoŋ akiloŋari aina, ido oŋaleu a?” Kibelekin Naaman, tolot eŋoit nooi.

¹³ Nai toloto ŋiketiyak keŋ kisirworo iŋes temasi, “Aa papa, anibo kerae itolimokinite ekadwaran iyoŋ akitiya idiobore ŋini agogoŋon, pa mono kitiyat iyoŋ a? Inyoni mono etyono anakiro a ŋuna ebaakar iŋes iyoŋ tolot kiloŋari, ikotere toŋaleu?”

¹⁴ Aŋun abu iŋes tocamu atiyaar naŋolol Yorodan kiloŋari ŋakiloŋaret ŋakanikaarei lopite ŋolo kirworitor ekadwaran Elisa; tojokyar akuwan keŋ todeletet kikok ŋina a edya a ŋolo cici, toŋaleu.

¹⁵ Toboŋosi nai Naaman ka ŋisigarya keŋ neni ke Elisa. Towo Naaman alokiŋaren Elisa tema, “Ayenu tokona ayoŋ atemar mam anakwap a daadaŋ neni eyai Akuj mati Isirael bon; tocamu tokona ainakinet aneni kaŋ a eketiyan kon.”

¹⁶ Nai towou Elisa tema, “Ikwaŋinapei eyarya Ekapolon ŋolo etiyae ayoŋ etic keŋ, nyacamuni ayoŋ akiya idiobore!” Kimaima Naaman Elisa acamun, nai abu Elisa towou jik.

¹⁷ Kirworik nai Naaman tema, “Ani pa kicamit, inakinae ayoŋ eketiyan kon ŋalup ŋuna epedorete ŋaŋolei-sigirya ŋaarei akiwuok, anerae ameun tokona nyainakini nabo ŋainakineta ŋuna epeitoe, kori ŋamuronisya neni ka akuj a ace mati Ekapolon.

¹⁸ Nai elipit Ekapolon ekesyon ayoŋ apaki ŋina ikirukoria ke erwosit kaŋ ŋolo ka Aram kai a Rimon akilip neni ka akuj ka Asiriya. Ayeni ayoŋ jik atemar ekesyoni Ekapolon ayoŋ.”

¹⁹ Tolimok Elisa iŋes tema, “Tolot ke ekisil.” Nai ani eriŋa Naaman eapi,

Arorokanut ŋina a Geasi

²⁰ totamatam Geasi eketiyan ke Elisa ebala, “Emyek bare ekapolon kaŋ Naaman ŋolo ka Aram eboŋoria ŋainakineta ŋuna ayaunit. Ikwaŋinapei eyaria Ekapolon, ewuapi ayoŋ Naaman, ido ejau idiobore aneni keŋ.”

²¹ Toem nai Geasi aditar Naaman. Ani eanyuwari Naaman ituŋanan emotuno iwuapit iŋes, towo, todoku anagaari a ŋina eritae a ŋaŋolei, kisiryam kiŋit tema, “Eyai ibore esecec a?”

²² Toboŋok iŋes tema, “Mam, nai ekeyakuunit ekapolon kaŋ ayoŋ neni kon atemar, ‘Adolut neni kaŋ ŋituŋa ŋiarei ŋulu ka atukot a ŋikadwarak anakwap a Epuraim a ŋina a ŋikamukumukui; ekelipit iyoŋ etalantait epei ŋolo ke esilipa ta ŋilowi ŋiarei ŋulu ilocokinioto ikes ŋulu enapito.’ ”

²³ Tolimu Naaman tema, “Ya ŋitalantae ŋiarei.” Tocamu Geasi, tosodi Naaman aenikin ŋitalantae ŋiarei locweei ŋiarei kaapei ka ŋilowi ŋiarei ŋulu kiloconokinet, kikobaki ŋiketiyak keŋ ŋiarei ŋulu apotu kiŋarenikis Geasi iwokito ŋiboro ŋul.

²⁴ Ani edolunete ikes lore ke Elisa, kijaa Geasi ŋiboro, kiŋadaki tooma ere, tosodi kitolot ŋiketiyak a Naaman.

²⁵ Tolot Geasi tooma neni ayai ekapolon keŋ Elisa. Kiŋit Elisa iŋes tema, “Ai ilosit iyoŋ Geasi?” Toboŋok Geasi tema, “Ekapolon, mam jik neni alosit ayoŋ; ayai ayoŋ ne pei ne.”

²⁶ Nai kiŋit Elisa iŋes tema, “Ikwa pa ikirukit ayoŋ ka iyoŋ alotau apaki ŋina adokunia ituŋanan anagaari a ŋaŋolei akisiryam iyoŋ a? Erae mono na apaki ŋina emaikina kijaununeere ŋisiliŋa, ŋilowi, ŋimanikorin ŋulu a ŋikito ka akimyet, epiini, ŋamesekin, ŋimoŋin, ŋipi ka ŋapi a?

²⁷ Aŋun, ikitapakin tokona iyoŋ atapon a Naaman; etapakin daŋ loletok kon ŋikaru ka ŋikaru.” Abu Geasi torotoki ekwaŋ akuwan keŋ kia, ileleba atapon.