2 Ŋirw. 25 - Ebaibul

Akilouno a Yudaya ka arikoro a ŋituŋa

¹ Alokaru a ŋolo a ŋikanikaomwon elap ŋolo a ŋitomon ŋirwa ke elap ŋitomon ipukat Sedekia, abu erwosit a Babilon ŋolo anyaritae Nebukadinesar toloto ka ŋasigarya keŋ daadaŋ akirikaun Yerusalem. Apotu ikes torekinos kiŋa etaun, toduko ŋadoketa kisiryama kiŋa etaun.

² Apotu ikes torubakis irikaunito etaun akitodol lokaru ŋolo a ŋitomon ka epei ipukat erwosit Sedekia.

³ Ani edoli ŋirwa ke elap ŋikanikaomwon, elap ŋolo a ŋiomwon, aris akoro kepuruu nooi alotaun, todaun ŋituŋa ibore ŋini imujete.

⁴ Aponi topedoi arwatata ŋina ke etaun, ido toema erwosit ka ŋasigarya daadaŋ nakwaare, kitoro ikes lopuke ŋolo apedokinete ikes kidiŋ ŋarwatatain ŋuna edunyasi ka emanikor ŋolo ke erwosit, tari daŋ ŋina erikaunitotor Ŋibabiloniyae etaun. Apotu ikes toema lowae ŋolo ka Araba.

⁵ Nai abu ajore ŋina a Ŋibabiloniyae kiwuap erwosit, ido toditasi anadipoe a Yeriko. Apotu ŋasigarya a Sedekia daadaŋ toema kielaros aneni keŋ

⁶ ka aponi kikamunae iŋes. Yaarae iŋes Ribila neni ayai erwosit a Babilon atubokin iŋes a nen.

⁷ Aponi toarae ŋidwe a Sedekia ite elope. Ani ekaku togoronoroe ŋakonyen keŋ toenae iŋes a ŋiriko, yaarae Babilon.

⁸ Ani edoli ŋirwa ke elap ŋikanikaarei, elap ŋolo a ŋikan, alokaru a ŋolo a ŋitomon ka ŋikanikaomwon ipukat erwosit Nebukadinesar Babilon, tolot Nebusaradan ekapoloniton a ŋasigarya a ŋuna eteete erwosit a Babilon Yerusalem.

⁹ Kicunyak Nebusaradan Akai ka Akuj ka akai ŋina a erwosit ta ŋakais daadaŋ ŋuna aya Yerusalem. Kicunyak iŋes ŋakais daadaŋ ŋuna a ŋikapolok.

¹⁰ Tolimok ekapolokiniton ŋasigarya ŋuna eyokiyete erwosit a Babilon ŋajorei keŋ daadaŋ akituwor arwatata a Yerusalem daadaŋ.

¹¹ Tosodi Nebusaradan toriko ŋituŋa ŋulu edoŋito lotaun kaapei ka ŋulu aris kecamut akiri ka erwosit a Babilon.

¹² Nai abu iŋes kimyek ŋituŋa ŋice ŋulu akulyakaka nooi anakwap a ŋin aŋuna ka akitub ŋikito ŋulu ke epiini ka akitare ŋimanikorin.

¹³ Apotu Ŋibabiloniyae tobwaŋabwaŋata ŋipirin ŋulu ke eburonis ŋulu alotooma Akai ka Akuj, toukosi daŋ ŋawoeta ŋuna a etorube a anam ŋolo ayai Kai ka Akuj ŋolo a etiyaunitae, ido yaasi eburonis daadaŋ Babilon.

¹⁴ Apotu daŋ Ŋibabiloniyae yaasi ŋamoti, ŋakijikoi ŋuna apolok, ŋileŋia ŋulu atubere ŋausi a ŋitaae, ŋakijikoi ŋuna apolok ka ŋiboro daadaŋ ŋulu esitiyaeneneo alo Kai ka Akuj.

¹⁵ Abu ekapolokiniton ŋasigarya ŋuna eyokiyete erwosit ya ŋasuwa ŋuna epuruyere ekinyate kaapei ka ŋabakulei ŋuna awatanakinere ŋituŋa ŋakipi; etiyaunitae ikes daadaŋ a egolid ka esilipa.

¹⁶ Pa apedoritae akipim apotis a eburonis a ŋolo etiyaunitor Solomon ŋiboro ŋulu a Akai ka Akuj ŋiboro ŋul ikes, ŋipirin ŋuluarei ka etorube ŋolo ka anam ta ŋawoeta ŋuna isiyotonoryo.

¹⁷ Aoyau ŋina ke epir a epei, arae ŋimitae ŋakanikauni, arae aoyau a akou a ŋina ke epir a ŋol, a ŋolo etiyaunitae a eburonis ŋimitae ŋiuni ka esibusitae a ŋitorubei a ŋaraito a ŋuna ikote ekacikicikit a ŋuna enyaritae pomegranate, ŋaraito ŋuna etiyatae a eburonis. Ekoni epir ŋoloce daŋ nenipei.

¹⁸ Abu ekapolokiniton a ŋasigarya a ŋuna eyokiyete erwosit a Babilon kikama Seraia esacaradoti ŋolo apolon nooi, Sepania ŋolo atupit Seraia anapolou ka ŋiketeok ŋiuni ŋulu eteete ŋikekia.

¹⁹ Tosodi alotaun, abu iŋes toriko ekile ŋolo arae ekarikiton a ŋasigarya ka ŋikilyok ŋikan ŋulu eŋarakinito erwosit akipuka ejok ŋulu aryamunio alotaun ta ekegirigiran a ekapolokiniton a ŋasigarya ŋolo apolokinit ŋasigarya daadaŋ anakwap keŋ kaapei ka ŋikilyok ŋatomonikanikapei ŋulu aryamunio alotaun.

²⁰ Abu nai Nebusaradan ekapolokiniton a ŋasigarya a ŋuna eyokiyete erwosit a Babilon ya ikes daadaŋ Ribila neni a erwosit a Babilon.

²¹ Abu erwosit a Babilon toar ikes alo Ribila alotaun a ŋolo ayai nakwap ŋina enyaritae Amas. Ekoni nen arikoro a ŋituŋa a Yudaya anakwap kec.

Inakinae Gedalia akipuka Yudaya

²² Abu erwosit Nebukadinesar ŋolo a Babilon toseu Gedalia lokoku ka Aikam a ŋolo arae lokoku a Sapan akipuka ŋituŋa ŋulu aponi toesikinae kidoŋo nakwap a Yudaya.

²³ Ani iirarete ŋikarikok a ŋajoresyo Yudaya atemar aseu erwosit a Babilon Gedalia aruwor ekepukan a Yudaya, potu ikes Misipa neni ayai Gedalia. Arae ikes Isimael lokoku a Nesania, Yoanan lokoku a Karea, Seraia lokoku a Tanumes a ŋolo alo Netopas ta Yaasania lokoku a Emaakesait kaapei ka ŋajorei kec.

²⁴ Abu Gedalia kikoŋ akikoŋiet akitunup ikes kaapei ka ŋajorei kec tema, “Nyikuryaketa aŋuna a ŋikapolok a Babilon, kiboiyoto anakwap yok, ido kitiyanakis erwosit a Babilon mam ŋuna aronok itiyakin neni kus.”

²⁵ Nai ani edoli elap ŋolo a ŋikanikaarei, abu Isimael lokoku a Nesania a ŋolo arae lokoku a Elisama a ŋolo anateker a erwosit, torukut ka ŋikilyok ŋitomon, toara Gedalia kaapei ka ŋikilyok ŋulu alo Yudaya ka ŋulu alo Babilon ŋulu arukito ka iŋes alo Misipa.

²⁶ A ŋakiro a ŋun, apotu ŋituŋa daadaŋ, ameun aneni a ŋulucaryo akitodol neni a ŋikarwok kaapei ka ŋikapolokinitok ŋasigarya toema toloto nakwap a Ijipit. Etiyaete ikes ŋun aŋuna akeritotor atemar ebuni Babilon akinyaŋar ŋun.

Tolakakinae Yeoakin alo Mabus

²⁷ Alokaru a ŋolo a ŋatomoniuni ka ŋikanikaarei ŋirwa ke elap ŋatomoniarei ka ŋikanikaarei, elap ŋolo a ŋitomon ka ŋiarei, eriŋa Yeoiakim erwosit a Yudaya erae emabus alo Babiblon, kisyak Ebilimerodak ŋolo alo Babilon akipuka Babilon, tolacak Ebilimerodak Yeoiakim erwosit a Yudaya alomabus.

²⁸ Abu iŋes torimaaniar aneni a Yeoiakim, kitopoloo iŋes adepar ŋirwosi ŋuluce ŋulu epukatotor iŋes alo Babilon.

²⁹ Aŋun abu Yeoiakim tolaca tari ŋilowi keŋ ŋulu sek alomabus ka abu toruwor ŋolo emujenene alokai ke erwosit jwi jwi anakiyar keŋ a daadaŋ.

³⁰ Abu erwosit inanak Yeoiakim ŋisiliŋa ŋidi a ŋinakoloŋit ikotere iŋarakinor ŋirwa daadaŋ ŋulu eboiyo iŋes alo Babilon.