2 Ŋirw. 22 - Ebaibul

Kipuka Yosia Yudaya

¹ Arae ŋikaru a Yosia ŋikanikauni ŋina esyakinia akipuka. Kipuka iŋes Yudaya alo Yerusalem ŋikaru ŋatomoniuni ka epei. Arae ekiro a toto keŋ Yedida nakoku ka Adaia a ŋolo alo Bosikas.

² Abu iŋes kitiya ŋakiro ŋuna etalakarito Ekapolon ka ewuapit ŋipitesyo daadaŋ ŋulu a Daudi a papaa keŋ. Abu Yosia nyimyek akitiya ŋuna eyookino alokiŋaren Ekapolon.

Torukau Ilikia ekitaabo a Ŋikisila

³ Alokaru a ŋolo a ŋitomon ka ŋikanikauni ipukat Yosia, abu iŋes kiyakiya ekegirigiran ŋolo anyaritae Sapan lokoku ka Asalia a ŋolo arae lokoku a Mesulam a ekegirigiran alosit Kai ka Akuj. Tema Yosia neni a Sapan,

⁴ “Tolot neni a Ilikia a esacaradoti a ŋolo apolon nooi, tolimok iŋes kitemok ŋisiliŋa daadaŋ ŋulu adaun ayaun Kai ka Akuj, ŋisiliŋa ŋulu ecununuyete ŋiketeok a ŋipukei alotuŋa.

⁵ Tolimok ŋiketeok ŋipukei inakis ŋisiliŋa ŋul neni a ŋulu epolokinito etic ŋolo ka akiduk neni emunaara alo Kai ka Akuj, tosodo ŋul totaca ŋiketiyak ŋulu edukete Akai ka Akuj.

⁶ Inakisi neni a ŋikeciak ŋabaoi, a ŋikadukok ka neni a ŋulu iceete ŋamoru. Itemokino ikes kisitiyata ŋisiliŋa agyelia ŋabaoi ka ŋamoru ŋuna icietae, tosubakiniata Akai ka Akuj.

⁷ Nai nyiŋitakinio ikes akitoodiun epite ŋolo kisitiyaere ŋisiliŋa ŋulu aponi inakinae ikes, anerae ikinyoma ikes.”

⁸ Abu Ilikia esacaradoti ŋolo apolon nooi tolimok Sapan ekegirigiran tema, “Arukau ayoŋ Ekitaabo ŋolo a Ŋikisila alotooma Akai ka Akuj.” Ani einakini Ilikia ekitaabo ŋol neni a Sapan, abu Sapan tosyom iŋes.

⁹ Abu nai Sapan ekegiriran tolot neni a Yosia a erwosit tolimok tema, “Ekapolon, adaut ŋiketiyak kon ainakin ŋisiliŋa daadaŋ ŋulu aya Kai ka Akuj neni a ŋulu epolokinito etic ŋolo ka akiduku neni emunaara alo Akai ka Akuj.”

¹⁰ Tolimok nai Sapan ekegirigiran erwosit tema, “Akainaki ayoŋ esacaradoti Ilikia ŋolo apolon ekitaabo.” Tosyom nai Sapan ekitaabo ŋol alokiŋaren erwosit.

¹¹ Ani iirari erwosit Yosia ŋakiro ŋuna egiritae lokitaabo ŋolo a Ŋikisila, abu tocilicili ŋilowi keŋ.

¹² Abu erwosit kicik Ilikia esacaradoti ka Aikam lokoku a Sapan ka Acibor lokoku a Micaia ta Sapan ekegirigiran kaapei ka Asaia ekiyakitono ŋolo a erwosit tema,

¹³ “Toloto toanyutu aneni ke Ekapolon ŋakiro ŋuna ekekamunito ayoŋ kaapei ka ŋituŋa ta akwap a Yudaya daadaŋ anakiro a ŋuna igirir lokitaabo lo ŋolo arukaun. Ikiŋoikinit nooi Ekapolon iwon, anerae apotu atapapaa yok towout akiwuap ŋakiro ŋuna a ekitaabo a lo; nyitiya ikes lopite ŋolo ecamuna ka ŋuna daadaŋ igiritae tooma ne ŋuna ikitapito iwon.”

¹⁴ Apotu Ilikia ka Aikam ka Acibor ta Sapan kaapei ka Asaia toloto aanyun aberu ŋina anyaritae Ulida ŋina arae akadwaran, torae aberu a Sulam alokoku a Tikiba a ŋolo arae lokoku ka Arias a ŋolo edarit akabati a ŋilowi a ŋulu elipere. Eboi iŋes alo Yerusalem anatutubet a ŋina a ŋaarei alotooma ŋaomwon a akwap a Yudaya, aneni aloseneneete ŋituŋa aanyun iŋes.

¹⁵ Abu akadwaran ŋin tolimok ikes tema, “Ebala Ekapolon ŋolo erae Akuj a Ŋisirael ebe, ‘Tolimokisi ekile ŋolo ikiyakuunit iyes,

¹⁶ atemar ebala Ekapolon, kire jik, esicani ayoŋ akibois na ka ŋituŋa keŋ, lopite ŋolo igiritere lokitaabo ŋakiro daadaŋ ŋuna adau erwosit a Yudaya akisyom.

¹⁷ Aŋuna akaŋerioto ikes ayoŋ ka aŋuna ainanakiniata ŋainakineta neni a ŋakujo a ŋunace. adaut ikes akitoŋo ayoŋ nooi aloticisyo a daadaŋ a ŋulu itiyaete ikes. Aŋun, eyatakin aŋoit kaŋ nooi aŋuna a ŋituŋa a akibois a na, ido nyedaun aŋoit kaŋ jik.’

¹⁸ Nai tolimokisi erwosit a Yudaya ŋolo ikiyakuunit iyes akiŋitun ŋakiro aneni ke Ekapolon atemar ebala Ekapolon ŋolo erae Akuj a Ŋisirael, ikote ne ŋakiro ŋuna ibu iyoŋ kiira,

¹⁹ ‘Aŋuna ibunio iyoŋ toki alotau kon ka kitiditeun apaki ŋina iirarya ŋakiro ŋuna abu ayoŋ erwor etoroniyarit akwap na ka ŋituŋa keŋ ka aŋuna iciliciliya ŋilowi kon, ido ikikaloik ayoŋ, adau ayoŋ daŋ akiirar iyoŋ.

²⁰ Aŋun, akacunakini ayoŋ iyoŋ ka atapapaa kon, ikinukio iyoŋ emam ŋace. Nyiŋolikini iyoŋ akisicanio daadaŋ ŋina alosi ayoŋ ayaun nakwap na. Epote ŋun kitwana iyoŋ kerumor.’ ” Apotu nai ikes yaasi ŋakiro ŋun neni ke erwosit.