2 Ŋirw. 21 - Ebaibul

Kipuka Manase Yudaya

¹ Arae ŋikaru a Manase ŋitomon ka ŋiarei ŋina esyakinia iŋes akipuka Yudaya. Kipuka iŋes Yudaya alo Yerusalem ŋikaru ŋatomonikan ka ŋikan. Arae toto keŋ Episiba.

² Tosec Manase aneni ke Ekapolon, kiwuap ŋakiro ŋuna aronok nooi ŋuna sek etiyaete ŋituŋa a ŋakwapin ŋulu eritari Ekapolon alokiŋaren Ŋisirael.

³ Abu iŋes toduku nabo ŋakiboisyo nenimukur ŋuna koloŋ abwaŋabwaŋaari papa keŋ Esekia, ŋuna arae ŋakilipet ŋakujo. Toduku iŋes ŋamuroeta ŋuna ilipere Baal. Kitiyau iŋes etorube a akuj a ŋinaberu a ŋina anyaritae Asera, lopite ŋolo koloŋ etiyaa erwosit Aab ŋolo a Ŋisirael. Kilip Manase tari neni a ŋikacer ka abu kitiya aŋuna kec.

⁴ Toduk iŋes ŋamuroeta ŋuna ilipere ŋakujo ŋunagelae tooma Akai ka Akuj, neni koloŋ abala Ekapolon, “Yerusalem bon iŋes ekelipere ayoŋ.”

⁵ Toduku iŋes ŋamuroeta ŋuna elipere ŋikacer nalapatui ŋunaarei alo Kai ka Akuj.

⁶ Toar lokoku keŋ tope erae amuronot. Adwarenene iŋes, nabo torae emuron; alosenene lomurok ka lolilae. Tosec iŋes nooi aneni ke Ekapolon kitoŋo iŋes Ekapolon.

⁷ Abu kiwuak etorube ŋolo ecieunitae ŋolo ka akuj a ŋinaberu a ŋina anyaritae Asera tooma kai ka Akuj, neni koloŋ alimokinit Ekapolon Daudi ka lokoku keŋ Solomon ebe, “Kai ka Akuj na ane alo Yerusalem, iŋes aseu ayoŋ anakwap a daadaŋ a ŋina a ŋikabilae a ŋulutomon ka ŋiarei a Ŋisirael atemar ekelipere ayoŋ ŋikaru ka ŋikaru.

⁸ Ajoŋoe ayoŋ akisirimit Ŋisirael anakwap a ŋina abu oinak atapapaa kec, erae ca kiwuapa ikes ŋuna daadaŋ abu ayoŋ ecik ikes ka ŋikisila daadaŋ ŋulu ecikit Moses eketiyan kaŋ ikes kiwuapa.”

⁹ Nai apotu ikes towout akiirar. Abu Manase kibata ikes akitiya aronis ŋina eloit nooi ŋina a ŋakwapin a ŋuna abu Ekapolon kirita alokiŋaren Ŋisirael.

¹⁰ Tolimu Ekapolon ŋakiro alokadwarak a ŋulu arae ŋiketiyak keŋ tema,

¹¹ “Aŋuna etiyaa Manase erwosit a Yudaya asiilyo na, aronis ŋina iloit ŋina a Ŋiamori a ŋulu sek aya neni ipukat iŋes, ka nabo aŋuna arikokinia ŋituŋa a Yudaya nasecit ŋina ka akiwuapit ŋakujo keŋ,

¹² ebala tokona Ekapolon ŋolo erae Akuj a Ŋisirael ebe, ‘Ayauni ayoŋ Yerusalem ka Yudaya akisicanet ŋina ani iirari ŋinituŋanan, ebuli tolilimiyo akuwan.

¹³ Esicani ayoŋ Yerusalem lopite ŋolo abu esicania Samaria. Esicani lopite ŋolo esicania Aab ŋolo arae erwosit a Isirael kaapei ka ŋiletok keŋ. Ani ŋituŋa a Yerusalem, apyaari pye, kidoŋ Yerusalem eorori ikoni atuba ŋina ilotaryo, ido tobuburiyarae.

¹⁴ Ajali ayoŋ ŋituŋa ŋulu a Yerusalem ŋulu idoŋete, epoto oinak lomoe kec, ilounete ŋimoe ŋul ikes, kikamasi akwap kec.

¹⁵ Etiyae ayoŋ ŋakiro ŋun lotuŋa kaŋ, anerae etiyata ikes aronis alokiŋaren kaŋ ka eketoŋoa ayoŋ nooi, ŋinapei ameun akoloŋit ŋina aponiata atapapaa kec alo Ijipit akitodol tari tokona.’ ”

¹⁶ Tari nabo daŋ, aarit Manase ŋituŋa ŋulu alalak nooi alo Yerusalem pa esecito, toleleiyaasi ŋaokot ameun alowae a epei akitodol lowae ŋoloce. Kiyatakin ŋun nasecit ŋina arikokinia iŋes ŋituŋa a Yudaya nasecit kitiyata ŋuna aronok aneni ke Ekapolon.

¹⁷ Ŋiticisyo a Manase ŋuluce daadaŋ, ŋuna daadaŋ etiyae iŋes kaapei ka asecit keŋ, igiritae lokitaabo ŋolo a ŋakiro a ŋirwosi a Yudaya.

¹⁸ Abu Manase totwan, tonukae neni anukitae atapapaa keŋ, lamanikor ka apukan ŋolo arae ŋolo a Usa. Kilunyokin Amon ŋolo arae lokoku keŋ lokicoloŋ keŋ kipuka Yudaya.

Kipuka Amon Yudaya

¹⁹ Arae ŋikaru ka Amon ŋatomoniarei ka ŋiarei ŋina esyakinia akipuka. Kipuka iŋes Yudaya alo Yerusalem ŋikaru ŋiarei. Arae toto keŋ Mesulemes nakoku keŋ ka Arus a ŋolo alo Yosoba.

²⁰ Abu iŋes kitiya ŋuna aronok aneni ke Ekapolon lopite ŋolopei etiyator Manase ŋolo arae papa keŋ.

²¹ Ekwaan per ŋipitesyo keŋ daadaŋ ka ŋulu a papa keŋ, etiyanakini ŋakujo ŋunapei etiyanakini papa keŋ, elipi neni a ŋakujo a ŋun.

²² Abu iŋes toŋer Ekapolon, Akuj ŋina atapapaa keŋ, toesik akiwuapit ŋakiro keŋ.

²³ Apotu ŋikapolok ŋulu epukato ka Amon totuko, toara Amon alokai ka apukan.

²⁴ Nai apotu ŋituŋa a Yudaya ŋuluce toara ŋituŋa daadaŋ ŋulusek aarete erwosit Amon, tosodo kituruwosi Yosia lokoku ka Amon erwosit, kilunyokin lokicoloŋ a papa keŋ.

²⁵ Ŋiticisyo ka Amon ŋuluce daadaŋ, igiritae lokitaabo ŋolo a ŋakiro a ŋirwosi a Yudaya.

²⁶ Aponi tonukae iŋes lomanikor a Usa. Kiluny nai Yosia ŋolo arae lokoku keŋ lokicoloŋ keŋ kipuka Yudaya.