2 Ŋirw. 20 - Ebaibul

Adyaka ŋina ke Esekia

¹ Ŋirwa ŋul, abu Esekia todyakakin edeke ŋolo adikino eari. Tolot ekadwaran Isaya lokoku ka Amos neni keŋ tema, “Ebala Ekapolon kitemonokin, anerae ilosi iyoŋ atwanare, nyiŋaleuni iyoŋ anadyaka kon.”

² Toboboŋiyo Esekia narwatata kilip neni ke Ekapolon tema,

³ “Ekapolon totamunite epite ŋolo ekekinyomitor ayoŋ iyoŋ a etau kaŋ a daadaŋ ka epite ŋolo etiyator neni kon ejok.” Kigwor Esekia nooi.

⁴ Ani eriŋa Isaya eyai nalapatu ŋina alokidiŋ ere ke erwosit, tolimok Ekapolon iŋes tema,

⁵ “Toboŋo tolimok Esekia ŋolo epolokinit ŋituŋa kaŋ atemar ebala Ekapolon ŋolo erae Akuj a papaa kon a Daudi ebe, ‘Adau ayoŋ akiirar akigworo kon ka aanyun ŋakiyo kon; eketaŋaleuni ayoŋ iyoŋ. Kelunyar ŋirwa ŋiuni ameun akoloŋit na, ilosi iyoŋ tooma Akai ka Akuj.

⁶ Ekatakini ayoŋ nakiyar kon ŋikaru ŋice ŋitomon ka ŋikan. Akalakuni ayoŋ iyes ka etaun lo aneni a erwosit a ŋolo ka Asiriya. Euriari ayoŋ etaun lo ikotere ipurore ekiro kaŋ ka elimitere Daudi eketiyan kaŋ.’”

⁷ Kirworik nai Isaya tema, “Tomunakisi ŋaboboryo, ido kiosakis lolepunoit keŋ.” Aponi kiosakinae ŋaboboryo lolepunoit keŋ, toŋaleu iŋes.

⁸ Kiŋit Esekia Isaya tema, “Nyo itoodiuni atemar eketaŋaleuni Ekapolon ayoŋ, ido olot Kai ka Akuj kelunyar ŋirwa ŋiarei?”

⁹ Toboŋok Isaya tema, “Akitoodikinet ŋina ikiinit Ekapolon iyoŋ toyenunia atemar itiyakini iŋes aŋuna adau akiikin iŋes na, ‘Icamit tokona iyoŋ etolim tolot kiŋaren ŋikilames ŋitomon, kori kikutukutoyo kaku ŋikilames ŋitomon?’ ”

¹⁰ Toboŋok Esekia tema, “Epatana sek etolim akiyotor kiŋaren ŋakiyotoret ŋatomon; kimiekisi kikutukutoiyo kaku ŋakikutukutooret ŋatomon.”

¹¹ Kilip nai ekadwaran Isaya neni ke Ekapolon, tosodi kisikutukutoo Ekapolon etorube kaku ŋakikutukutooret ŋatamon anadoket a ŋina koloŋ kebu erwosit Aas toduku.

Ŋituŋa ŋulu eyakiunio alo Babilon

¹² Ŋirwa ŋul, kiira erwosit a Babilon ŋolo anyaritae Merodak-baladan ŋolo arae lokoku a Baladan atemar kedyaka erwosit Esekia. Abu iŋes kiyaki ŋituŋa inasi Esekia ŋabaruwae ka ainakinet.

¹³ Abu Esekia kijau ŋipeyok ŋul, kitoodik ikes ebari keŋ daadaŋ ŋolo eŋadatae nakais: Esilipa, egolid, ŋiboro ŋulu itoboboete akimuj, akimyet ŋina epol egyelit, ŋiboro ŋulu ke ejie ka ibore daadaŋ ŋini eŋadat iŋes. Emam akai ŋina iŋadatae ebari keŋ tari apei ŋina abu kidoŋ nyitoodikina iŋes ŋipeyok ŋul. Kitoodik iŋes akai a erwosit ka akwap keŋ daadaŋ.

¹⁴ Bu nai ekadwaran Isaya neni ke erwosit Esekia kiŋit tema, “Ŋakiro anu irworosi ŋituŋa ŋul? Ai aponiata ikes?” Toboŋok Esekia tema, “Eponito ikes anakwap a ŋina alwanan nooi a ŋina enyaritae Babilon.”

¹⁵ Kiŋit Isaya erwosit tema, “Inyoni eŋolikis ikes alokai kon?” Toboŋok Esekia tema, “Eŋolikis ikes ibore daadaŋ. Emam ibore anakais aŋuna iŋadao ŋiboro ŋini nyitoodikina ayoŋ ikes.”

¹⁶ Abu Isaya tolimok erwosit Esekia tema, “Kiira akirot ŋina ke Ekapolon na ebe,

¹⁷ ‘Ebunit apaki ŋina ecunarere ibore daadaŋ ŋini eyai kai ke erwosit kaapei ka ŋiboro ŋulu eŋadaete atapapaa kon, ŋiboro ŋulu eya tari tokona. Iudaryo ikes daadaŋ Babilon, mam ŋini idoŋi;

¹⁸ tari ŋiletok kon ŋice ŋulusapa erikoryo kitokolupanae, toruworos ŋiketiyak alokai a erwosit a Babilon.’ ”

¹⁹ Abu erwosit tolimok Isaya tema, “Ejok akirot ŋina a Ekapolon ŋina ilimu iyoŋ.” Atamatamae Esekia ikona, “Abe ejok bo erae ca keyakaun ekisil ka akinapakina alorwa a ŋulu ayarya ayoŋ.”

Atwanare ke Esekia

²⁰ Ŋiticisyo a Esekia ŋuluce daadaŋ, arwonu keŋ ŋina abokia abwal ka acilakin erot a ŋakipi kwap ŋalup, ido todolut nabwal ŋina ayai lotaun, igiritae lokitaabo ŋolo a ŋakiro a ŋirwosi a Yudaya.

²¹ Abu Esekia totwan, tonukae neni anukitae atapapaa keŋ. Kilunyokin Manase ŋolo arae lokoku keŋ lokicoloŋ keŋ kipuka Yudaya.