2 Ŋirw. 2 - Ebaibul

Yaarae Eliya nakuj

¹ Ani eapuuni akoloŋit ŋina ayaaria Ekapolon Eliya nakuj alotooma ekuwuam ŋolo epiripiri idirisiyarit kidiama, tonyout Eliya ka Elisa alo Giligal.

² Ani eriŋa ikes elosete, tolimok Eliya Elisa tema, “Kidoŋ ne; anerae ekeyakit Ekapolon ayoŋ alosit Besel.” Nai abu Elisa kikoŋ tema, “Ikwaŋinapei eyaria Ekapolon ka ikwaŋinapei iyaria iyoŋ, nyakaesikini ayoŋ iyoŋ.” Torukosi nai ikes Besel;

³ a nen, abu atukot ŋina a ŋikadwarak a ŋulu alo Besel bu neni ke Elisa kiŋit atukot iŋes tema, “Iyeni iyoŋ atemar akoloŋit na eyaari Ekapolon ekapolon kon aneni kon a?” Toboŋok Elisa ikes tema, “Ee, ayeni; nai kililiŋiyaasi ŋakiro ŋun.”

⁴ Tolimok Eliya Elisa tema, “Kidoŋ ne; anerae ekeyakit Ekapolon ayoŋ alosit Yeriko.” Nai abu Elisa kikoŋ tema, “Ikwaŋinapei eyaria Ekapolon ka ikwaŋinapei iyaria iyoŋ, nyakaesikini ayoŋ iyoŋ.” Torukosi nai ikes Yeriko;

⁵ a nen, abu atukot ŋina a ŋikadwarak a ŋulu alo Yeriko bu neni ke Elisa kiŋit atukot iŋes tema, “Iyeni iyoŋ atemar akoloŋit na eyaari Ekapolon ekapolon kon aneni kon a?” Toboŋok Elisa ikes tema, “Ee, ayeni, nai kililiŋiyaasi ŋakiro ŋun.”

⁶ Tolimok nai Eliya Elisa tema, “Kidoŋ ne, anerae ekeyakit Ekapolon ayoŋ alosit naŋolol Yorodan.” Nai kikoŋ Elisa tema, “Ikwaŋinapei eyaria Ekapolon ka ikwaŋinapei iyaria iyoŋ, nyakaesikini ayoŋ iyoŋ.” Torukosi nai ikes ekwaakasi ŋiarei.

⁷ Toloto daŋ ŋikadwarak ŋatomonikan towua tocadaros aneni ke Eliya ka Elisa a ŋulu awuasi alokipetot a aŋolol Yorodan.

⁸ Tolacu nai Eliya ekaaso keŋ, tobilaki tosodi toramya ŋakipi. Totyakas ŋakipi alokidiŋ, totyeikis Eliya ka Elisa totuboros ekekwaye emeto neni aonit.

⁹ Kedaut ikes atubor ekekwaye, kiŋit Eliya Elisa tema, “Tolimokinae, inyoni icamit iyoŋ ayoŋ etiya aŋuna kon eriŋa nyeyaara ayoŋ aneni kon?” Toboŋok Elisa tema, “Kimyekinae ayoŋ oryamu apedori ŋina iyakar iyoŋ kiyatak ace ŋina etya nenipei.”

¹⁰ Tolimok Eliya iŋes tema, “Iŋita iyoŋ ibore ŋini agogoŋon, nai ani kikiŋolik iyoŋ ayoŋ apaki ŋina akayaarere aneni kon, ikiinakinio iyoŋ apedor ŋin, ani ca pa kikiŋolik, nyepedor.”

¹¹ Apaki ŋin, ŋina erworotor ikes tolosete, apotu ŋagaari ka ŋaŋolei ŋuna anepete ikwa arira totyaka ikes, ya ekuwuam ŋolo epiripiri idirisiriyarit kidiama Eliya nakuj.

¹² Abu Elisa kiŋolik ka torubak itekinit, kigworo ebala “Papa! papa! Acanai ŋaŋolei a Isirael ka ŋikametok kec!” Nai ani eŋopiyari Eliya aneni keŋ, tolacu iŋes ŋilowi keŋ, kiberet alokidiŋ.

Kilunyokin Elisa lorot ke Eliya

¹³ Kidepu Elisa ekaaso ke Eliya ŋolo abu tocakun kwap aneni ke Eliya, tosodi Elisa toboŋo akiwo alokipetot ka aŋolol Yorodan.

¹⁴ Ya iŋes ekaaso ke Eliya ŋolo acakun toramya ŋakipi irworo ebala, “Nyali Ekapolon ŋolo erae Akuj ŋina ke Eliya?” Kedau iŋes akiram ŋakipi, totyakas ŋakipi alokidiŋ totyeikis Elisa totubori ekekwaye.

¹⁵ Kiŋolik atukot a ŋikadwarak a ŋulu a Yeriko Elisa elwana, tolimu tema, “Aryamu Elisa apedor ŋina ke Eliya.” Potu ŋikadwarak ŋul, kisiryama iŋes, kijuuroto a lokiŋaren keŋ.

¹⁶ Tolimokis ikes Elisa temasi, “Kiira, eyakae tokona isua ŋiketiyak kon ŋatomonikan ŋulu ikigogoŋ ne. Kimyekinae isua oloto akiwarar Ekapolon kon; acepaki eyait etau ŋolo ke Ekapolon iŋes tocakaki kidiama emoru edio, kori nakadipaalat.” Tema Elisa, “Mam, nyilot.”

¹⁷ Nai ani erubakinete ikes iŋisito iŋes, kiruma Elisa ŋileec tema, “Apesi toloto.” Toloto nai ikes eraakasi ŋikilyok ŋatomonikan, todol ŋirwa ŋiuni iwarito ikes Eliya, nai apotu nyeryamut.

¹⁸ Ani eboŋorete ikes Yeriko neni ke Elisa, tolimok iŋes ikes tema, “Pa akalimokinit ayoŋ iyes atemar nyilot a?”

Kitiya Elisa ŋakujuwuanisya.

¹⁹ Tolimokis ŋituŋa a Yeriko Elisa temasi, “Ekapolon, ejok nooi neni edukitoe etaun logo ikwaŋina iteo iyoŋ daŋ, nai nyejokak ŋakipi ka nyejokak ŋalup daŋ.”

²⁰ Kirworik Elisa tema, “Inunae ayoŋ atuba ŋina kitete, kiwuakisi acumbi tooma keŋ.” Inut ikes iŋes atuba.

²¹ Tolot nai iŋes lolelya a ŋakipi, tobukoki acumbi tooma kirworik tema, “Ebala Ekapolon, etojoku ayoŋ ŋakipi nu; ameun tokona, nyeriŋa ikes earete ŋituŋa, kori itesecununeete ŋaberu.”

²² Arubakis nai ŋakipi ŋun erae ŋuna ajokak tari tokona, lopite ŋolo abunio Elisa tolimunio.

²³ Abu Elisa torotok a nen kidir Besel. Ani elosi iŋes alorot, potu ŋidyain ŋice, ido ijutanarete iŋes ecelasi ebasi “Tolot ane, iyoŋ ŋolopalor lo! Tolot ane iyoŋ ŋolopalor lo!”

²⁴ Toboboŋ iŋes kitek ikes, tosodi kilamakin elimit ekiro ke Ekapolon. Tolomut anamoni ŋityaŋ ŋuluberu ŋiarei ŋulu adedeŋak; toara ŋityaŋ ŋul ŋidyain ŋul daadaŋ ŋatomoniomwon ka ŋiarei.

²⁵ Tolot Elisa lomoru ŋolo enyaritae Karimel, ani ekaku toboŋo Samaria.