2 Ŋirw. 13 - Ebaibul

Kipuka Yeowas Isirael

¹ Alokaru a ŋolo a ŋatomoniarei ka ŋiuni ipukat Yoas lokoku ka Aasia Yudaya, kisyak Yeowas lokoku a Yeu akipuka Isirael alo Samaria. Arae ŋikaru ŋulu epukator iŋes ŋitomon ka ŋikanikaarei.

² Etiyae iŋes ŋakiro ŋuna aronok aneni ke Ekapolon. Abu iŋes nyeki akitiya ŋasecisya ŋuna ekote ŋuna arikokinia Yeroboam, lokoku a Nebat, Ŋisirael nasecit.

³ Abu Ekapolon tolili nooi neni a Ŋisirael, tosodi tocamak Asael erwosit ka Aram ka Benadad lokoku keŋ akilounun Ŋisirael a ŋina paki.

⁴ Nai abu Yeowas erwosit kikalou neni ke Ekapolon, kiira Ekapolon akilip keŋ, anerae abu kiŋolik ŋican ŋulu arukaunito Ŋisirael aŋuna esicanitor erwosit ka Aram ikes.

⁵ Aŋun, inak Ekapolon Ŋisirael ekaiunan ikotere ikes eiunosi aneni a ŋituŋa ka Aram; toboŋosi akiboi emam ŋace lorerya kec, nenipei sek eboiyoto ka aŋorot.

⁶ Tari kikote nen, daŋ apotu ikes nyekiwa asecenen asecit ŋina ekoni ŋina a ekal a Yeroboam a ŋolo arikokini Ŋisirael nasecit. Apotu torubakis eseceneneete, torubakis itowoito epir ŋolo a Baal alo Samaria.

⁷ Aŋun, aponi tomunyarae ŋasigarya a Yeowas, topuunos ŋasigarya ŋuna ameto ŋaŋolei erae ŋatomonikan ka ŋagaari ŋatomon ta ŋulu alosete a ŋakejen ŋalipyo ŋatomon, ŋul bon apotu topuunos, anerae abu erwosit ka Aram toar ikes nooi kilou.

⁸ Ŋiticisyo a Yeowas ŋuluce daadaŋ ka ŋuna daadaŋ etiyat iŋes kaapei ka arwonu keŋ, igiritae lokitaabo ŋolo a ŋakiro a ŋirwosi a Isirael.

⁹ Abu Yeowas totwana, tonukae akuwan keŋ Samaria, tosodi Yeoas ŋolo arae lokoku keŋ kilunyokin lokicoloŋ keŋ kipuka Isirael.

Kipuka Yeoas Isirael

¹⁰ Alokaru a ŋolo a ŋatomoniuni ka ŋikanikaarei ipukat Yoas Yudaya, kisyak Yeoas lokoku a Yeowas akipuka Isirael alo Samaria. Kipuka iŋes ŋikaru ŋitomon ka ŋikanikapei.

¹¹ Etiyae iŋes daŋ ŋuna aronok aneni ke Ekapolon. Abu nyeki akitiya ŋasecisya ŋuna ekote ŋuna arikokinia Yeroboam a lokoku a Nebat Ŋisirael nasecit. Torubak iŋes itiyae aronis.

¹² Ŋiticisyo a Yeoas ŋuluce daadaŋ ka daadaŋ ŋuna etiyae iŋes kaapei ka arwonu keŋ ŋina ajioto ka Amasia erwosit ŋolo a Yudaya, igiritae lokitaabo ŋolo a ŋakiro a ŋirwosi a Isirael.

¹³ Abu Yeoas totwana, tosodi Yeroboam kilunyokin lokicoloŋ keŋ kipuka Ŋisirael. Aponi tonukae akuwan a Yeoas Samaria neni anukitae ŋirwosi a Isirael.

Atwanare ŋina ke Elisa

¹⁴ Abu Elisa ŋolo arae ekadwaran todyakakin edeke ŋolo abu toar iŋes. Tolot Yeoas erwosit a Isirael neni keŋ togeu akigworo tema, “Aa papa! Aa papa! Iyoŋ ipolokinit ŋajiorei a Ŋisirael!”

¹⁵ Tolimok Elisa iŋes tema, “Tolemu akau a ŋikaleŋeleŋe ka ŋikaleŋeleŋe.” Tosodi iŋes tolemu.

¹⁶ Kirworik nai Elisa neni ke erwosit tema, “Kiketak akau a ŋikaleŋeleŋe.” Tosodi erwosit kiketak, kidokok Elisa ŋakan keŋ kidiyama ŋuna ke erwosit.

¹⁷ Tema nai Elisa, “Toŋaa edirisa ŋolo alowae a ŋolo alo Kide.” Abu erwosit toŋaa. Tema Elisa, “Toguma.” Tosodi erwosit toguma ekaleŋeleŋet. Kirworik nai Elisa tema, “Erae ŋol ekaleŋeleŋet ŋolo ilounia Ekapolon ŋituŋa ŋulu ka Aram! Ilosi iyoŋ ejie ka ŋituŋa ka Aram aneni enyaritae Apek akitodol ŋina imunyarya ikes.”

¹⁸ Torubak Elisa irworo ebala, “Tolemu ŋikaleŋeleŋe.” Tolemu erwosit. Tema Elisa, “Togumak ikes kwap.” Togumak erwosit ŋikaleŋeleŋe kwap ŋagumaret ŋauni tojoŋo.

¹⁹ Toŋo Elisa neni ke erwosit kisibura iŋes tema, “Amaikina iyoŋ togumak ŋagumaret ŋakan kori ŋakanikapei, ikotere kilou jik ŋituŋa ka Aram. Nai tokona ilosi iyoŋ akiloun ikes ŋakilouneta ŋauni make.”

²⁰ Abu nai Elisa totwan, tonukae. Ŋirwa ŋul anaito ŋajiorei a ŋituŋa a Moab aponenen akirem akwap a Ŋisirael apaki ŋina ka akicereet a akiporo.

²¹ Akoloŋit apei, apotu ŋituŋa yaasi akinuk ituŋanan ŋini atwani, ani eriŋa ikes edakito ituŋanan ŋin, toanyuwasi ajiore, tosodo tosuros ŋituŋa, tocakakis ekile ŋolo atwan nalyal ŋina ke Elisa. Ŋinapei atapakinor akuwan a ekile a ŋolo atwan nakoyo ke Elisa, toyaru ekile ŋol towo.

Todemut Ŋisirael Aram ŋitaunio ŋulu sek ekamaritae

²² Ŋirwa daadaŋ ŋulu epukator Yeowas, arukaunito Ŋisirael ŋican aneni ka Asael a ŋolo arae erwosit ka Aram.

²³ Nai, abu Ekapolon tominak ikes kisyonik. Totamu Ekapolon ikes aŋuna ka acamunet keŋ ka Aburaam ka Isaka ta Yakob, toesik amunyar ikes. Akitodol tari tokona, eriŋa Ekapolon nyiritara ikes aneni keŋ.

²⁴ Ani etwani Asael ŋolo arae erwosit ka Aram, abu Benadad ŋolo arae lokoku keŋ, kilunyokin lokicoloŋ keŋ kipuka.

²⁵ Abu nabo Yeoas lokoku a Yeowas todema Benadad ŋolo arae lokoku ka Asael ŋitaunio ŋulu sek kikamaritae aneni a Yeowas a papa keŋ. Abu Yeoas kilou iŋes ŋakilouneta ŋauni, todemu ŋitaunio ŋulu a ŋituŋa a Isirael.