2 Ŋirw. 12 - Ebaibul

Tosubanakinae Akai ka Akuj

¹ Alokaru a ŋolo a ŋikanikaarei erae Yeu erwosit, kisyak Yoas akipuka, todol ŋikaru ŋatomoniomwon ipukat iŋes alo Yerusalem. Arae ekiro a toto keŋ Sibia ayaunitae iŋes alo Beeriseba.

² Anakiyar keŋ a daadaŋ, abu Yoas kitiya ŋuna etalakarito Ekapolon, anerae aris Yeoida ŋolo arae esacaradoti kitatam iŋes.

³ Tari kikote nen daŋ, aponi nyelemar neni elipeneneere ŋakujo; apotu ŋituŋa torubakis emuroete ka einanakinete ŋainakineta a nen.

⁴ Kirworik Yoas neni a ŋisacaradotin tema, “Kidyatakisi ŋisiliŋa daadaŋ ŋulu eyaununuyo Kai ka Akuj apaki ŋina emurore. Acunio ŋisiliŋa ŋul apaki ŋina imarere ŋituŋa, apaki ŋina ikoŋeneneere ka ŋulu eauni ituŋanan Kai ka Akuj anacamit keŋ.

⁵ Amaikina ŋolosacaradoti daadaŋ tolot neni a epei a ŋulu eŋadaete ŋisiliŋa, kijau ŋisiliŋa, yau kisitiyae asubakinia neni daadaŋ emunaara alo Kai ka Akuj.”

⁶ Nai abu todol ekaru ŋolo a ŋatomoniarei ka ŋiuni ipukat Yoas, eriŋa ŋisacaradotin nyesubanakina Akai ka Akuj.

⁷ Tosodi iŋes anyaraun Yeoida kaapei ka ŋisacaradotin ŋuluce kiŋit tema, “Kaanukiro nyesubanakinere iyes neni emunaara alo Kai ka Akuj? Tojoŋoto tokona nai akiŋad ŋisiliŋa ŋulu ikiinakinete ŋikeŋadak, itemokino kipotosi tosubanakinere Akai ka Akuj.”

⁸ Apotu nai ŋisacaradotin tocamut ŋun ka apotu tocamut atemar meere ikes esubakinete Akai ka Akuj.

⁹ Abu nai Yeoida ŋolo arae esacaradoti, tolemu asaduku ŋina iŋadatae ŋisiliŋa, tosodi toped asaduku alokidiama, kiwuak diyete Namuroet, alowae a ŋolo alo teten elomari ituŋanan Kai ka Akuj. Apotu nai ŋisacaradotin ŋulu eteok ekek, kiwuakis nasaduku ŋin ŋisiliŋa daadaŋ ŋulu alemununuyete ŋituŋa ŋulu aponeneete akilip Kai ka Akuj.

¹⁰ Apaki daadaŋ ŋina ilelebunotor ŋisiliŋa nasaduku ŋin, arukunete ekegiran ŋolo ke erwosit ka esacaradoti ŋolo apolon nooi, kimara ŋisiliŋa ŋul kiturakis locweei.

¹¹ Ani ŋisiliŋa ŋulu irikakinio akimarun, epotonokinio lotuŋa ŋulu awoikinito etic ŋolo ka Akai ka Akuj, tosodo ŋul totaca ŋituŋa ŋulu ecyete ŋabaoi, ŋikadukok ŋulu adukete Akai ka Akuj,

¹² ŋulu ayenete akiduk a ŋamoru, ŋulu eciete totubutubuyete ŋamoru, agyelia ŋabaoi ka ekokote ŋolo eboŋonokinere akiduk Akai ka Akuj ta atacia ŋiboro ŋuluce daadaŋ.

¹³ Nai amam alosiliŋa a ŋul ŋulu aponi togyelere ŋabakuli ŋuna a esilipa, ŋausi ŋuna inokere ŋitaae, ŋabakuli ŋuna ewuasere, kori ŋarupepe, kori idiobore ŋini itiyaunitae a egolid, kori a esilipa.

¹⁴ Arae ŋisiliŋa ŋul ŋulu atacere ŋikadukok ka agyelia ŋiboro daadaŋ ŋulu adukere.

¹⁵ Pa eŋiseneneo ŋulu ainanakinio ŋisiliŋa atacia ŋikadukok epite ŋolo esitiyaeta ikes ŋisiliŋa ŋul, anerae arae ikes ŋulu ekinyomitae.

¹⁶ Pa ayaununuyo Kai ka Akuj ŋisiliŋa ŋulu alemununuyo aŋuna ka alemarya ekaile aŋuna ka asecit ka ŋulu alemununuuyo aŋuna ka alemarya asecit, araakasi ŋisiliŋa ŋul ŋulu a ŋisacaradotin.

¹⁷ Alorwa a ŋul, abu Asael ŋolo arae erwosit ka Aram torem etaun ŋolo anyaritae Gas, kikama. Ani irikakin, kiitan akirem Yerusalem.

¹⁸ Abu erwosit Yoas ŋolo a Yudaya tocunak ŋainakineta daadaŋ ŋuna koloŋ keris ŋirwosi ŋulu ke ekiŋaren kitaleiyosi aruwor ŋuna einakinitae Akuj. Arae ŋirwosi ŋul Yeosapat ka Yeoram ta Aasia. Kiatak erwosit Yoas ŋainakineta keŋ neni a ŋuna a ŋirwosi a ŋul, kimorik kaapei ka egolid ŋolo ayai Kai ka Akuj ka ŋolo ayai kai ŋina ke erwosit. Tosodi kiyaki ŋituŋa ayaar ŋiboro ŋul daadaŋ neni ka Asael a erwosit ka Aram. Apotu nai Asael ka ŋasigarya keŋ toboŋosi kimyekis akirem Yerusalem.

Atwanare a Yoas

¹⁹ Ŋiticisyo a Yoas ŋuluce daadaŋ ka ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Yudaya.

²⁰ Apotu ŋikapolok ŋulu ewuapito Yoas anapolou totuko, tolukis iŋes, toarakis kai a Milo ŋina ayai lorot ŋolo elosere Sila.

²¹ Arae Yosakar lokoku a Simeas ka Yeosabab lokoku a Somer, ikes aarete iŋes. Tonukae iŋes neni anukitae atapapaa keŋ alotaun a Daudi. Kilunyokin lokoku keŋ ŋolo anyaritae Amasia lokicoloŋ toruwor erwosit.