2 Ŋikor. 8 - Ebaibul

Ainakinet a Ŋikorinto neni a ŋulu a ŋican alo Yudaya

¹ Ŋikaitotoi, ikicamit isua iyes toyenut ajokis ŋina ka Akuj ŋina adau iŋes ainakin ŋatukon ŋuna a Ŋikristo alo Makedonia.

² Aponi ikes kitemoe nooi alocan a ŋulu apotu ikes kitoro; nai abu alelyan kec ŋina alal kitirimaan ikes anainanakin, tari kekulyakaka daŋ nooi.

^3-4 Akalimokini ayoŋ iyes kire atemar apotu ikes inanakis alotyae a ŋolo apedoritotor ikes ka kitedepakis daŋ etyae ŋolo apedoritotor ikes ainanakinia. Anacamit kec a ŋilopeyek, apotu ikes ikidyeka ka ikimaimaa isua ainakin ikes daŋ arereŋu ŋina ruworet ŋipei ka ŋulu iŋarakinete ŋituŋa ŋulu ka Akuj alo Yudaya.

⁵ Apotu ikes kitiyata ŋun--ŋuna pa atamakinitae isua tari iwadio! Ŋina eŋarenon, apotu ikes inakinos neni ke Ekapolon; ani ekaku aŋuna ka acamit a ŋina ka Akuj, apotu ikes inakinos neni kosi.

⁶ Aŋun nai, aponi isua kiŋitakinae Tito ŋolo esyakini etic lo, torubak itiyae jik ka ikiŋarak iyes akirikakin etic ŋolo ajokan lo ŋolo ka amina.

⁷ Iyakatar iyes ŋakiro nu nooi adepar: anupit, erwor, ayenut, akiitanit akiŋarakin, ka amina kus isua; aŋun, ikicamit isua iyes torimaakiata alopite a lo daŋ a ŋolo ka amina.

⁸ Nyalimunit ayoŋ ŋun erae akiciket, nai acamit aanyun akikinyoma ŋina ka amina kus alotooma akisikwaanikin ka epite ŋolo iburitor ŋituŋa ŋulu a Makedonia ainanakin.

⁹ Kire iyenete iyes arimaanut ŋina ke Ekapolon yok Yesu Kristo, ŋolo abu aŋuna kus, tari ŋina abaritor, kituruwor bon ekulyakit aŋuna kus, ikotere nai toruworos iyes ŋikabarak aŋuna ka akulyako keŋ.

¹⁰ Anakiro a nu, atami ayoŋ atemar ejok iyes akirikakin etic ŋolo ipotu iyes ekaru ŋolo ŋoon kisyakis. Iyes ipotu toruworos ŋulu ke ekiŋaren akitiya etic ŋol, meere akitiya bon, nai acamit akitiya daŋ.

¹¹ Aŋun nai, toyakatar acamit ŋinakirikakinet etic ŋol lopite ŋolo iponiata iyes toyeuniata akisyakin ka inanakisi alotyae a ŋolo a ŋiboro a ŋulu iyakatar iyes tokona.

¹² Ani kiitanito iyes ainanakin, ecamuni Akuj ainakinet kus alotyae a ŋolo iyakatar iyes ŋiboro kus, meere alotyae a ŋolo nyiyakatar.

¹³ Nyabala ayoŋ esieŋa ŋuluce, ido tolalata ŋican kus, nai acamit toriyan iyes daadaŋ.

¹⁴ Nai tokona, aŋuna iyakatar iyes ŋiboro ŋulu alalak, kiŋarakisi ŋulu a ŋican, ikotere ani moi eryamunete ikes daŋ ŋiboro ŋulu alalak, ikiŋarakis iyes alocan kus, toriyanikin nai epite ŋolo iŋaranakinotor iyes.

¹⁵ Ikwapei ebaakatar Ŋakigireta ebe, “Ituŋanan ŋini kebu kirirau ŋuna alalak, pa ayakar ŋuna alalak nooi ka ŋini kebu kirirau ŋuna ekudyoko, pa ayakar ŋuna ekudyoko nooi.”

Tito ka ŋirukitos keŋ

¹⁶ Ikilakara neni ka Akuj aŋuna ewuakinia neni a Tito akiitanit ŋina ka akiŋaranakin ikwa isua daŋ aŋuna ka akiŋarakin iyes!

¹⁷ Anerae, nyecamuna iŋes ŋuna bon eŋitakinitae isua iŋes, nai acamu iŋes elope anakiitanit keŋ akiŋarakin iyes.

¹⁸ Ikiyakuunit isua iŋes ka lokaato ŋolo ipurito ŋatukon a Ŋikristo daadaŋ aŋuna ke etic keŋ a ŋolo a Ŋakiro a ŋuna Ajokak.

¹⁹ Meere ŋun bon, apotu nabo ŋatukon a Ŋikristo toseut iŋes arukor ka isua lotic lo ŋolo ka amina ŋolo itiyao isua aŋuna ka akitopoloorya Ekapolon ka akitoodiun epite ŋolo ikiitanitor isua akiŋarakin.

²⁰ Ikicoikinit atemar nyikirworore isua neni aronon alotooma epite ŋolo ikiricitor isua ainakinet na ŋina apolon.

²¹ Ikilosikinit isua akitiya ŋuna iyookino, meere alokiŋaren Ekapolon bon, nai alokiŋaren ŋituŋa daŋ.

²² Aŋun, ikiyakuunit isua lokaato kosi kaapei ka ikes; adaun isua akirot iŋes ŋarwa ŋuna alalak ka ikiryamu iitanit nooi akiŋarakin anakiro a ŋuna alalak. Nai tokona, eyatakin nooi akiitanit keŋ aŋuna ikikinyomitor iŋes iyes.

²³ Erae Tito erukitos kaŋ ŋolo ikitiyae kaapei ka ayoŋ akiŋarakin iyes; nai eraakasi ŋikaitotoi ŋuluce ŋikiyakia ŋulu a ŋatukon a Ŋikristo ka eyaunito akipuro neni a Kristo.

²⁴ Aŋun, kitoodikisi ikes amina kus, ikotere eyenunete ŋatukon a Ŋikristo daadaŋ amina kus ka toyenut atemar iyookino akituro kosi aŋuna kus.