2 Ŋikor. 4 - Ebaibul

Ayakau ŋina a Kristo tooma etic ŋolo a Ŋikiyakia

¹ Ikiinak Akuj isua anakisyon keŋ akitiya etic lo, aŋun, nyikiupi isua atitinyikinit.

² Aŋeri isua ŋiticisyo ŋulu ka amodiyo ŋulu iwuaitae; aŋeri isua amodiyanut ka akibatanar ŋakiro ŋuna ka Akuj. Nai ikiserae isua ŋuna a kire emam akuryanu, ikotere oryamuniata akikinyoma alotuŋa a daadaŋ alokiŋaren Akuj.

³ Ani tari kerapap Ŋakiro ŋuna Ajokak ŋuna ikilimonokini isua, erapap aneni a ŋulu ebukoro.

⁴ Adau ekepukan ŋolo ka akwap a na akitumudukan ŋatameta a ŋulu nyenupito, ikotere nyiŋolikiniata akica ŋina a Ŋakiro a ŋuna Ajokak, ŋuna ka apolou a Kristo, a ŋolo ikwaan ka Akuj per.

⁵ Nyikilimonokini isua ŋuna ikikamunito isua; nai ikilimonokini Yesu Kristo ikwapei Ekapolon, ka isua ikwapei ŋiketiyak kus aŋuna a Yesu.

⁶ Arae Akuj abu tema, “Tocau akica anakiryonut”, Akuj ŋinapei ŋin etacau akica keŋ alotai yok, ainakinia iwon akica ŋina ka ayenut ka apolou ŋina ka Akuj ŋina etacaun aloreet a Kristo.

⁷ Nai iwon ŋulu ikiyakar ebari ŋolo ebunit aneni ka Akuj, ikikoni iwon ŋamoti ŋuna eyeunitae a elupe, ikotere ikitoodiunia atemar nyerae apedor ŋina apolon ŋina ka Akuj ŋina yok.

⁸ Ikisilekio isua alowaetin a daadaŋ, nai nyibusokina ikes isua, nyikiyeni isua ŋuna kitiya, nai nyesaluni akigeno kosi.

⁹ Ikisicanitae isua, nai nyeesikina Akuj isua; ikiwanawanae isua, nai nyetwaka isua.

¹⁰ Ŋapakio daadaŋ iwokitae isua atwanare a Yesu anawat kosi, ikotere itoodiunere akiyar a Yesu anawat kosi daŋ.

¹¹ Anakiyar kosi a daadaŋ ikiyapikinit isua jwi jwi atwanare aŋuna a Yesu, ikotere itoodiunere akiyar a Yesu anawat kosi a ŋuna etwakete.

¹² Iŋes atemar itiyae atwanare aneni kosi, nai itiyae akiyar aneni kus.

¹³ Ebasi Ŋakigireta ebe, “Abu ayoŋ erwor, anerae abu onup”. Alonupitene a ŋolopei, ikinupit isua daŋ ka erae ŋakiro ŋun ikirworor.

¹⁴ Ikiyeni isua atemar, ŋolopei abu kiteyaru Ekapolon Yesu, iŋes pei ebuni akiteyarun isua daŋ kaapei ka Yesu, ido ikiya isua ka iyes kiŋaren keŋ.

¹⁵ Ŋun daadaŋ itiyasi aŋuna kus, ikotere ajokis ŋina iyata alokimar a ŋikanupak iyatakini akipuro ŋina ka alakara neni ka Akuj.

Akilocokinet ŋina a ŋawat yok alokwap tari nakuj

¹⁶ Aŋun, nyikiupi isua atitinyikinit. Tari kiyosete iwadio ŋawat kosi amunaar, nai iteteununuyo ŋitai kosi a ŋinakoloŋit.

¹⁷ Anerae ŋican ŋulu ikiryamunit iwon ŋulu esalunete, erae koŋin kisikwaani ka apolou ŋina ajokan nooi ŋina nyesaluni ŋina itemonokinete ŋican ŋul aŋuna yok.

¹⁸ Nyikiwuakinit isua ŋatameta kosi loboro ŋulu etakanete, nai loboro ŋulu nyetakanete; ibore ŋini ite iyoŋ, nyeropari, nai ŋini nyetakani, eropari ŋikaru ka ŋikaru.