2 Ŋikor. 11 - Ebaibul

Paulo ka ŋikiyakia ŋulu alyokonok

¹ Eitanit ayoŋ atemar itodaŋ iyes ayoŋ, tari kabaŋaana ayoŋ iwadio. Okoe, todaŋae ayoŋ!

² Ayakar ayoŋ arakao aŋuna kus ikwapei eyakar Akuj daŋ arakao aŋuna kus; ikote iyes apese ŋina nyiryamakina ka ekile, ŋina adau ayoŋ akiikin ekile epei bon akiit iŋes--Kristo elope.

³ Nai akuryanit ayoŋ ebe ikwaŋina abunio emun tomodikinia Epa ka aosou keŋ, itooliyoryo ŋatameta kus anakikinyomit ka ananupit Kristo.

⁴ Anerae iminasi iyes adaŋit ŋakiro a ituŋanan ca daadaŋ a ŋini ebuni neni kus alimonokin ŋuna a Yesu a ece, nai meere ŋuna a Yesu a ŋolo ikilimonokini isua iyes; icamut iyes etau ka ŋakiro ŋuna ajokak ŋace, ŋuna egelaaka alotau a ŋolo ka Akuj ka a Nakiro a ŋuna Ajokak a ŋuna ipotu iyes kijaut aneni kosi.

⁵ Atami ayoŋ atemar emam epite ŋolo ekeloitotor ayoŋ ŋituŋa ŋul, ŋulu ebookoi iyes “Ŋikiyakia ŋulu apolok nooi”.

⁶ Tari pa kayeni ayoŋ erwor, ayakar ayoŋ aosou ŋina a Ŋakiro a ŋuna Ajokak. Adaun isua akisileereun nu neni kus anapakio ka alorotin a daadaŋ.

⁷ Emam idiobore abu ayoŋ ekeŋit iyes ainakin ayoŋ apaki ŋina alimonokinia ayoŋ Ŋakiro ŋuna Ajokak ŋuna ka Akuj neni kus. Abu ayoŋ etiditeun bon, ikotere topolooros iyes.

⁸ Apaki ŋina etiyaa ayoŋ alokidiŋ kus, apotu ŋatukon ŋuna a Ŋikristo ŋunace okatac ayoŋ. Alimuni ayoŋ atemar abu ayoŋ odemana ikes ŋiboro kec aŋuna ka akiŋarakinia iyes.

⁹ Ani apaki ŋina arukitere iwon, ŋina ayakar akiitanit kaŋ, abu nyeŋit idiotuŋanan ŋisiliŋa, anerae apotu ŋikanupak ŋulu apote alo Makedonia okoinakis ayoŋ ŋiboro ŋulu eitanit ayoŋ daadaŋ. Aŋun, abu ayoŋ nyetogogoŋ akiyar kus apaki ŋin alopite ke edio.

¹⁰ Aŋuna a Kristo a ŋolo erae kire, a ŋolo alimonokini ayoŋ, eikinit ayoŋ atemar emam ituŋanan anakwap ka Akaia daadaŋ epedori akiretakin ayoŋ anakituro kaŋ.

¹¹ Alimunit mono ayoŋ nu anerae nyakamina ayoŋ iyes a? Eyeni Akuj atemar akamina ayoŋ iyes!

¹² Arubakini ayoŋ etiyae ŋuna tokona etiyae, ikotere etoŋopikinia “Ŋikiyakia ŋul” ibore ŋini iturotor ebasi itiyaete ikes daŋ lopite ŋolo itiyaere isua.

¹³ Nyeraakasi ŋikilyok ŋul ŋikiyakia ŋulu a kire, eraakasi ŋikiyakia ŋulu alyokonok, ŋulu emodyanakinete ŋituŋa a ŋuna etapito etic kec. Itusubuna ikes ŋikiyakia a Kristo.

¹⁴ Kire, eyenen ŋun nooi! Tari Satan daŋ epedori akitusubun bon emalaika ŋolo ka akica!

¹⁵ Aŋun, nyeumokinio erae kitusubun ŋiketiyak keŋ make ŋiketiyak ŋulu itiyaete ŋuna iyookino. Nai ani ekaku, eryamunete ikes ibore ŋini itemokino aŋuna a ŋiticisyo kec.

Ŋican a Paulo ikwapei ekiyakia

¹⁶ Aboŋokini ayoŋ: nyitemokino idiotuŋanan etami atemar arae ayoŋ ebaŋ. Nai ani ketami ituŋanan koŋina, eŋitakinit ayoŋ iŋes okocamu ayoŋ arae ebaŋaanot, ikotere nai oyakaunor ayoŋ daŋ ibore idio ŋini eturokinor.

¹⁷ Kire, ŋuna alimunit ayoŋ tokona, meere ŋuna ecamit Ekapolon ayoŋ alimun, nai anakiro a nu a ŋuna eturor ayoŋ, erworo ikwa ebaŋaanot.

¹⁸ Ikwapei eyakatar ŋulu alalak ŋulu iturosi aŋuna a ŋiboro a ŋulu ka akwap, ayoŋ daŋ etiyae ŋunapei.

¹⁹ Iosok iyes ŋilopeyek, aŋun idaŋito iyes ŋibaŋaanotin ka alakara!

²⁰ Idaŋito iyes ituŋanan ŋini ikitusubunit iyes ŋipi kori ŋini ikinipit kori ikilokit kori ikijamuwarit kori ikibapabapae iyes.

²¹ Ekerumito ayoŋ ŋileec acamun atemar ikitimit isua nooi akitiya ŋakiro ŋun. Ani kepedo ituŋanan idio akiturokin aŋuna a idiobore--erworo ayoŋ nu ikwa ebaŋaanot--apedori ayoŋ daŋ akitiya ikwaŋinapei koŋin.

²² Eraakasi ikes Ŋiburaniyae a? Ayoŋ daŋ arae. Eraakasi ikes Ŋisirael a? Ayoŋ daŋ arae. Eraakasi ikes ŋiletok ka Aburaam a? Ayoŋ daŋ arae.

²³ Eraakasi ikes ŋiketiyak a Kristo a? Erworo ayoŋ ikwa ŋolo a ŋikerep--eloit ayoŋ ikes anaraakau eketiyan! -- Abu ayoŋ etiya nooi adepar, aponi ekewuakin mabus ŋarwa ŋakalalak, ekebuŋatae ŋakibuŋa ŋuna nyimarun, ŋapakio ŋuna alalak adikino atwani.

²⁴ Ŋarwa ŋakan apotu Ŋiyudayan ekebuŋata ayoŋ a ŋadase ŋakibokoi ŋatomoniuni ka ŋakanikaomwon.

²⁵ Ŋarwa ŋauni aponi ekebuŋae ayoŋ a ŋibelae; apeirwait aponi ekemasamasae a ŋamoru. Ŋarwa ŋauni, abu ameeli ŋina adokit ayoŋ tobuburikin nanam; apeirwait abu eriya anakipi apaaran jwii ka akuwar kya.

²⁶ Analosit kaŋ ŋarwa ŋuna alalak, abu omin kidiŋ aronis ŋina a ŋaŋololin a ŋuna aleleete ka aronis ŋina a ŋikademanarak, aronis ŋina a Ŋiyudayan a ŋulu pei erae ŋikaatuŋa ka ŋina a ŋituŋa a ŋulu nyerae Ŋiyudayan; ayai aronis lotaunio, nariet, aronis ŋina a ŋanamyo ka aronis ŋina a ŋikonei a ŋulu alyokonok.

²⁷ Alal etic ka ŋatyokisyo; ŋarwa ŋakalalak pa ajotoonor ayoŋ; abu akoro ka akure okonyam, ŋarwa ŋuna alalak, amam akimuj ŋina etemokino, amam neni perot, kori ŋilowi ŋulu napan.

²⁸ Akilo akimar ŋuluce daadaŋ, ayakar ayoŋ jwi jwi atamatam nooi ŋuna ka akiŋarakin ŋatukon a Ŋikristo daadaŋ.

²⁹ Ani epalag idiotuŋanan, ayoŋ daŋ apalagagi; ani kiteseci idiotuŋanan, eyaloloŋi ayoŋ daŋ.

³⁰ Ani kemaikina ayoŋ akiturokin, itemokino eturokin a ŋiboro a ŋulu itoodiunito atemar apalag ayoŋ.

³¹ Eyeni Akuj, Papa ke Ekapolon Yesu--ŋolo ipuritoe ŋikaru ka ŋikaru atemar nyerworo ayoŋ alyokonu.

³² Ani ayai ayoŋ Damasko, abu ekawuoikiniton etic ke erwosit a ŋolo enyaritae Aretas kiwuak ŋisigarya lokekia ŋulu ke etaun akikamun ayoŋ.

³³ Nai aponi ekeyooliyor ayoŋ a ebukit, ekesitori loole ŋolo ayai narwatata ka abu osi aneni keŋ.