2 Ŋakiro a ŋirwa 9 - Ebaibul

Apeyo a arwosit a ŋina alo Seba

¹ Ani iirari arwosit ŋina a Seba arwonu a Solomon, abu bu Yerusalem akikatakin Solomon a ŋakiŋiseta a ŋuna atyoko. Abu arwosit ŋin bu Yerusalem, erukito ka ŋituŋa ŋulu alalak, emeto ŋikaala ŋulu ewokito ŋikito ŋulu akukunyok, egolid ŋolo alalan nooi ka ŋamoru ŋuna epol egyelit. Abu arwosit ŋin bu neni a Solomon, kiyana ka iŋes ŋakiro daadaŋ ŋuna ayakar iŋes.

² Toboŋok Solomon ŋakiŋiseta keŋ daadaŋ; mam ŋakiro abu erwosit toryamu etyoko akisileerekin arwosit ŋin.

³ Ani kedau arwosit ŋina a Seba ŋin aanyun aosou a Solomon daadaŋ, akai ŋina kebu Solomon toduk,

⁴ akimuj ŋina ayai lomesa keŋ, epite ŋolo eboiyoto ŋikapolok anapukan a Solomon, epite ŋolo etiyaata ŋiketiyak ŋulu etiyanakinete Solomon, epite ŋolo anapitotor ŋiketiyak ŋul, epite ŋolo anapitotor ŋulu ayaununeete ekopo neni a Solomon ka ŋainakineta ŋuna epeyo ŋuna aayenene Solomon Kai ke Ekapolon, toumok arwosit ŋin nooi todaun ŋuna elimuni.

⁵ Tema arwosit ŋin neni a Solomon, “Iyookino ŋakiro ŋuna abu ayoŋ eira anakwap kaŋ, ŋuna a ŋiticisyo a ŋulu idau iyoŋ akitiya ka ŋuna ka aosou kon.

⁶ Nai pa abu ayoŋ onup ŋakiro ŋun akitodol ŋina abunio ayoŋ ne eŋolik a ŋakonyen kaŋ ka alope. Kire pa akalimokinitae ayoŋ tari atutubet apei a aosou kon aŋina apolon nooi, eŋolik ayoŋ ŋuna edeparito ŋuna sek aris ayoŋ keira.

⁷ Okoe, etya alakara a ŋikilyok a akwap kon ai! Okoe etya alakara a ŋikapolok anakwap kon a ŋulu irukito ka iyoŋ jwi jwi, topupete ŋuna ka aosou ŋuna irworo iyoŋ ai?.

⁸ Akipuro toyai neni ke Ekapolon Akuj kon, ŋina alakari aŋuna kon, ido ikiinak iyoŋ akiboikin lokicoloŋ ikwapei erwosit, kipuka aŋuna ke Ekapolon Akuj kon. Aŋuna ka amina ka Akuj kon Ŋisirael ka aŋuna ka acamit keŋ akiturubakin ikes eyakasi ŋikaru ka ŋikaru, ikituruwo iŋes iyoŋ erwosit kec, ikotere itubi ŋakiro anakiyookino ka kitiyae ŋuna iyookino.”

⁹ Inak nai arwosit ŋina a Seba erwosit ŋatalantae amiat ka ŋatomoniarei ŋuna ke egolid, ŋikito ŋulu ekukuny ŋulu alalak ka ŋamoru ŋuna epol egyelit. Mam apaki ace, ŋina ayaunitere neni a Solomon ŋikito ŋulu ekukuny ŋulu alalak, ŋulu etya ŋulu abu arwosit ŋina a Seba inak erwosit Solomon.

¹⁰ Apotu daŋ ŋiketiyak a Iram ka ŋiketiyak a Solomon yaut egolid alo Opir, yaut daŋ alo Opir ŋakito ŋuna alalak ŋuna enyaritae alemugim ka ŋamoru ŋuna epol egyelit.

¹¹ Abu erwosit kitiyau anakito a ŋuna ka alemugim ŋadoketa ŋuna ka Akai ke Ekapolon, ŋuna ka akai ka apukan ka ŋaduŋgui ta ŋagitae ŋuna isitiyaete ŋikaeok. Mam ŋakito ŋuna alalak ŋuna atya ŋun ŋinapei, ŋuna aponi yaunae Yudaya.

¹² Kedaun ŋun, abu erwosit Solomon inak arwosit ŋina a Seba ibore daadaŋ ŋini acamit iŋes ka ŋini eŋita iŋes, inak Solomon iŋes ŋiboro ŋulu adeparito ŋulu ayauni iŋes neni a Solomon. Abu nai arwosit ŋin toboŋo nakwap keŋ kaapei ka ŋiketiyak keŋ.

Ebari a Solomon

¹³ Aryamununui Solomon a ŋolokaru egolid ŋolo arae apotis keŋ ŋatalantae ŋamiae ŋakanikapei ka ŋatomonikanikapei ka ŋikanikapei,

¹⁴ pa imarakinitae ŋolo aryamununui iŋes aneni a ŋimucurus ikwapei ocur ka aneni a ŋirwosi a daadaŋ a ŋulu ka Arabia, ayaununeete ŋikapolok anakwap a Solomon egolid ka esilipa neni a Solomon.

¹⁵ Abu erwosit Solomon kitiyau ŋaupala ŋuna apolok ŋamiae ŋaarei a egolid a ŋolo etyekitae, kitiyau iŋes ŋinaupal a egolid a ŋolo arae ŋakiloi ŋauni ka atutubet.

¹⁶ Abu Solomon kitiyau ŋaupala ŋuna cicik ŋamiae ŋauni a egolid a ŋolo etyekitae, kitiyau iŋes ŋinaupal a egolid a ŋolo aapiyarit ŋakiloi ŋaarei. Kiwuak erwosit ŋaupala ŋun kai ka apukan ŋina anyaritae Akai ŋina ka Amoni a Lebanon.

¹⁷ Kitiyau daŋ erwosit ekicoloŋ a ŋikyal a ŋitome, toburusik egolid ŋolo ajokan nooi lokicoloŋ ŋol.

¹⁸ Ayakasi lokicoloŋ ŋol ŋadoketa ŋakanikapei. Ayai lokicoloŋ neni etiyaunitae a egolid neni edokonokinio ŋakejen, atapakina nen lokicoloŋ, ido ayai ŋolowae a ekicoloŋ a ŋol neni epete ŋakan a ituŋanan iboi. Diyete neni apeneneete ŋakan a ituŋanan iboi a lokicoloŋ a ŋol, ayakasi ŋitorubei a ŋiŋatunyo ŋiarei ŋulu awuasi.

¹⁹ Awuasi daŋ ŋitorubei a ŋiŋatunyo ŋitomon ka ŋiarei anadoketa a ekicoloŋ a ŋol, epei ŋatuny epeiwae neni isalya ŋinadoket alotooma ŋadoketa ŋunakanikapei. Mam ibore etiyatae anakwap ka adio, ŋini ekwaanatar ekicoloŋ ŋol.

²⁰ Ŋiboro daadaŋ ŋulu amasya erwosit Solomon, arae ŋulu etiyaunitae a egolid ka ŋiboro daadaŋ ŋulu ayakasi kai ŋina enyaritae ŋina ka Amoni a Lebanon, arae ŋulu etiyaunitae a egolid; mam ibore etiyaunitae a esilipa, anerae arae esilipa ibore koŋin alorwa a ŋulu a Solomon.

²¹ Ayakar erwosit ŋameeli ŋuna aloseneneete Tarisis kaapei ka ŋuna a Iram. Alotooma ŋikaru ŋiuni, ayaununeete apei yaunet ŋameeli ŋun alo Tarisis egolid, esilipa, ŋikyal a ŋitome, ŋicomin ka ŋikyeny ŋulu ebusak.

²² Aŋun, abarit ka aos erwosit Solomon nooi akilo ŋirwosi ŋuluce daadaŋ anakwap.

²³ Apotu ŋirwosi anakwap daadaŋ kiwara akiryamun ka Solomon, ikotere iirarete ŋuna ka aosou keŋ a ŋina kebu Akuj kiwuak natameta keŋ.

²⁴ Ayaununui ŋinituŋanan abuni aanyun Solomon ŋiboro ŋulu arae ŋainakineta ŋulu etiyaunitae a esilipa ka a egolid. Ayaununeete ikes: Ŋilowi, ŋiboro ŋulujiet, ŋikito ŋulu ekukuny, ŋaŋolei ka ŋaŋolei-sigirya. Ayaununuyo ŋul elalak a ŋolokaru.

²⁵ Ayakar Solomon ŋakiboisyo ŋalipyo ŋaomwon ŋuna aya ŋaŋolei ka ŋagaari, arae ekimar a ŋaŋolei keŋ ŋalipyo ŋatomon ka ŋaarei. Abu Solomon kiwuak ŋagaari ka ŋaŋolei ŋun lotaunio ŋulu edaritere ikes, ŋace kiwuak Yerusalem neni eboiyo iŋes.

²⁶ Abu Solomon kipuka ŋirwosi ŋuluce daadaŋ ameun anaŋolol a ŋina enyaritae Eupurate tari nakwap a Ŋipilistin akitodol lokukoru a Ijipit.

²⁷ Abu erwosit kitepetu esilipa alo Yerusalem ikwa ŋamoru ka abu kitalala ŋikito a Cedar ikwa ŋikito ŋulu ke eki ŋulu aya Sepela.

²⁸ Agyelununui Solomon ŋaŋolei nakwap keŋ alo Ijipit ka anakwapin a ŋunace a daadaŋ.

Atwanare a Solomon

²⁹ Ŋiticisyo a Solomon ŋuluce daadaŋ, ameun ŋuna eŋarenok tari ŋuna esidyok, igiritae nakiro a ekadwaran a ŋolo anyaritae Nasan ka nakiro ŋuna abu Aija ŋolo alo Silo todwar ta nakirujaeta ŋuna abu Ido ŋolo arae eketeyenikinan kirwor aŋuna a Yeroboam alokoku a Nebat.

³⁰ Abu Solomon kipuka Isirael daadaŋ alo Yerusalem ŋikaru ŋatomoniomwon.

³¹ Abu Solomon totwana ikwapei atapapaa keŋ ka aponi tonukae lotaun a Daudi a papa keŋ, kilunyokin Reoboam lokoku keŋ lokicoloŋ toruwor erwosit.