2 Ŋakiro a ŋirwa 8 - Ebaibul

Ŋiticisyo ŋulu egelegelya ŋulu abu Solomon kitiya

¹ Ekaku a ŋikaru a ŋatomoniarei, kedau Solomon akiduk Akai ke Ekapolon ka ŋina keŋ ke elope,

² abu Solomon todukok nabo ŋitaunio ŋulu ainakini Iram iŋes ka abu ya Ŋisirael kiboikinos lotaunio ŋul.

³ Abu Solomon kicodo a nen nakibois ŋina anyaritae Amas-Soba, kikama akibois ŋin.

⁴ Abu daŋ Solomon todukok etaun ŋolo anyaritae Tadimor naloŋisat kaapei ka ŋitaunio ŋulu abu iŋes todukok Amas ŋulu aya ŋisitowae.

⁵ Abu daŋ iŋes toduk Bes-Oron ŋolo ayai neni amukur ka Bes-Oron ŋolo ayai neni adipal, adukitoe ŋarwatatain ŋuna abutur lotaunio ŋul, toya ŋipukei ŋulu a ŋasuwa.

⁶ Abu daŋ Solomon todukok Baalas arwatata ŋina abutur ka ŋipukei ŋulu a ŋasuwa ka ŋitaunio daadaŋ ŋulu aya ŋisitowae ka ŋulu a ŋagaari keŋ ka ŋaŋolei keŋ ta ŋaduketa ca daadaŋ ŋuna abu Solomon totamak adukokin Yerusalem, Lebanon ka nakwap daadaŋ ŋina epukat iŋes.

⁷ Ŋipiya daadaŋ ŋulu a ŋituŋa a lu: A Ŋiitaiti, a Ŋiamori, a Ŋiperisi, a Ŋiipi ka a Ŋiyebusi, ŋulu pa arae Ŋisirael,

⁸ ŋipapae a ŋituŋa a ŋul daadaŋ ŋulu kepotu Ŋisirael nyemunyasi, abu Solomon toreik ŋul daadaŋ akitiya etic, ido eriŋa tari tokona ereikinitae ikes etic.

⁹ Nai ani eruwor Ŋisirael, pa abu Solomon kituruwo ikes ŋipi alotic keŋ; arae ikes ŋasigarya, ŋikapolok anapukan keŋ, ŋikarikok a ŋajorei keŋ ka ŋikarikok a ŋajorei a ŋuna adokito ŋagaari ka ŋaŋolei.

¹⁰ Arae lo ekimar a ŋikapolok a ŋulu apolokinito ŋiticisyo a erwosit Solomon, arae ikes ŋamiae ŋaarei ka ŋatomonikan, ikes apolokinito ŋituŋa ŋulu etiyaete.

¹¹ Abu Solomon ya nakoku a Parao alotaun a Daudi, kisiboik kai ŋina abu iŋes toduk aŋuna a nakoku a Parao, anerae abu Solomon tema, “Nyemaikina aberu kaŋ iboi alokai a Daudi a erwosit a Ŋisirael, anerae esegak ŋakiboisyo ŋuna ewuakin Asaduku ŋina ka Acamunet ke Ekapolon.”

¹² Kedau ŋun, abu Solomon inak Ekapolon ŋainakineta ŋuna epeyo a Namuroet a ŋina ke Ekapolon a ŋina abu iŋes todukok ebarasan ŋolo ayai kiŋaren Akai ka Akuj.

¹³ Etiyae iŋes ŋun ikwapei etic ŋolo amaikina iŋes kitiya a ŋinakoloŋit, lopite ŋolo ecikitor Moses ainanakin edoli akoloŋit ŋina a Sabato, ŋina elomunia elap ka ŋapakio ŋuna a ŋasuban a ŋunauni a ŋuna a ŋolokaru. Ŋasuban ŋun ikes nu: Ŋasuban ŋuna a ŋamugati a ŋuna emam ŋakinyalet, ŋasuban ŋuna a ŋikinyom a ŋulukitet ka ŋasuban ŋuna edukere ŋisakaitei.

¹⁴ Aŋuna ewuapitor Solomon ŋuna atubunit sek papa keŋ Daudi, abu iŋes toseu ŋatukon a ŋisacaradotin, inak ŋinatukot etic keŋ, tolimok ŋilepi arikit aeore ka akiŋarakinit ŋisacaradotin alotic kec a ŋolo a ŋinakoloŋit. Abu daŋ Solomon toseu ŋatukon a ŋikedarak ŋipukei, kiwuak a ŋolopuke ŋikedarak keŋ, anerae ŋuna sek kebu Daudi ituŋanan ŋini ka Akuj kicik iŋes ŋun.

¹⁵ Apotu ŋatukon ŋun nyiwuap ŋace, mati ŋuna ecikit erwosit ŋisacaradotin ka ŋilepi akiyokit ebari ka akitiya ŋiticisyo daadaŋ ŋulu amaikina ikes kitiyata.

¹⁶ Aŋun, abu etic a Solomon daadaŋ tolot kiŋaren ejok, ameun akoloŋit ŋina esyakinere adukokin Akai ke Ekapolon tari ŋina erikakinere.

¹⁷ Tolot nai Solomon Esion-Geber ka Elos nakiboisyo ŋuna aya diyete anam alo Edom.

¹⁸ Kiyakik Iram Solomon ŋameeli ŋuna arae ŋikapolok ŋulu epukatotor iŋes apolokinito, ayenete ŋikilyok ŋul anam ejok. Apotu ŋikilyok ŋul kaapei ka ŋulu a Solomon toloto Opir a ŋameeli, yaut a nen ŋatalantae ŋamiae ŋaomwon ka ŋatomonikan ŋuna ke egolid, inakis erwosit Solomon.