2 Ŋakiro a ŋirwa 7 - Ebaibul

Kilipak Solomon Akai ka Akuj

¹ Ani irikakini Solomon akilip, totiyaun akim anakuj tonomiya ŋainakineta ka ŋamuronisya ŋuna epeyo, ido abu akica ŋina ka ayakau a Akuj kilelebun Kai ka Akuj.

² Aŋuna abunio akica a Ekapolon kilelebun Kai ka Akuj, apotu ŋisacaradotin nyepedosi alomar Kai ka Akuj.

³ Ani iŋolikinete Ŋisirael daadaŋ akim etiyaun kwap ka akica ŋina ke Ekapolon emini kidiama Akai ka Akuj, toryediko aneni enaminamitae ŋamoru, kijuuroto todolo ŋireetin kwap, ido kilipa elakara neni ke Ekapolon ebasi, “Ejok Ekapolon; anerae erubakini amina keŋ ŋina nyiryaŋiryaŋa eyai ŋikaru ka ŋikaru.”

⁴ Tosodo nai erwosit ka Ŋisirael daadaŋ tolemut ŋamuronisya inakis Ekapolon.

⁵ Inak Solomon ŋamuronisya nu neni a Ekapolon: Ŋimoŋin ŋalipyo ŋatomoniarei ka ŋiarei ka ŋamesekin ŋalipyo amiat ka ŋatomoniarei. Aŋun, apotu erwosit ka Ŋisirael daadaŋ kitaleikis Akai ka Akuj neni ke Ekapolon.

⁶ Towua ŋisacaradotin anakiboisyo kec; towua ŋilepi daŋ etiŋito ŋiboro ŋulu eeore neni ke Ekapolon, ŋiboro ŋulu sek kebu erwosit Daudi kitiyau aŋuna ka akipuror Ekapolon ka ŋulu esitiyae iŋes apaki ŋina elakaror neni ke Ekapolon ebala, “Anerae erubakinit amina keŋ eyai ŋikaru ka ŋikaru.” Ebakito ŋisacaradotin ka ŋilepi, tokusete ŋisacaradotin ŋarupepe, ido awuasi Ŋisirael ŋuluce daadaŋ.

⁷ Abu Solomon kitaleiyo kidiŋ alapatu a ŋina ayai kiŋaren Akai ke Ekapolon, ido abu inak a nen Ekapolon ŋainakineta ŋuna epeyo ka ŋasepwa a ŋainakineta a ŋuna a ekisil; etiyae iŋes ŋun a nen, anerae adidiŋ Namuroet ŋina etiyaunitae a eburonis ŋina sek keris iŋes kitiyau, pa apedorito ŋainakineta nu apenare nen; ŋainakineta ŋuna epeyo, ŋainakineta ŋuna a ŋikinyom ka ŋasepwa.

⁸ Aŋun abu Solomon kitiya ŋasuban ŋun ŋirwa ŋikanikaarei, kitiyata iŋes kaapei ka Ŋisirael daadaŋ, arae ikes atukot ŋina alalan nooi, eboiyete ŋituŋa ameun alo Leboamas tari nayonae ŋina a Ijipit.

⁹ Ani epete ŋirwa ŋikanikauni, totukokinos ikes iwapei, anerae aris kiboiyoto a nen ŋirwa ŋikanikaarei italeete Namuroet ka kedaut ŋirwa ŋice ŋikanikaarei a nen inumunumete ŋasuban.

¹⁰ Ani edoli ŋirwa ke elap ŋatomoniarei ka ŋiuni, elap ŋolo a ŋikanikaarei, kimyek Solomon ŋituŋa toloto lorerya kec elelyanete ka elakara alotai kec aŋuna ajokak aŋuna etiya Ekapolon neni a Daudi ka neni a Solomon ta neni a Ŋisirael a ŋituŋa keŋ.

Totakanu nabo Akuj neni a Solomon

¹¹ Ani irikakini Solomon akitiya ejok akiduk Akai ke Ekapolon ka akai ke erwosit ta ibore daadaŋ ŋini abu iŋes totamak akiwuakin Kai ke Ekapolon ka kai keŋ ke elope,

¹² totakanu Ekapolon neni a Solomon nakwaare. Tema neni a Solomon, “Adau ayoŋ akiirar akilip kon, adau ayoŋ aseun akibois na aŋuna kaŋ ka ikwapei Akai ŋina itiyaere ŋamuronisya.

¹³ Ani pa kacamak ayoŋ akiru kilim, kori ani kayau ayoŋ emaase kirika ŋikinyom, kori ani kayau edeke lotuŋa kaŋ,

¹⁴ ani kitiditeunosi ŋituŋa kaŋ ŋulu enyaritae a ekiro kaŋ, ido kilipa ka kiwara akiŋolikin ayoŋ, kimyekis ŋipitesyo kec ŋulu aronok, eirari nai ayoŋ anakuj ŋakiro kec, ido esyoni asecit kec ka eterereŋ akwap kec.

¹⁵ Eŋolikini nai tokona ayoŋ ka apupokini ŋuna ilipete iyes anakibois a na.

¹⁶ Adau ayoŋ aseun ka akitaleun Akai na, ikotere erubakini ekiro kaŋ eyai ŋikaru ka ŋikaru, eyoki ayoŋ ka edari akibois ŋin ŋirwa daadaŋ.

¹⁷ Ani iyoŋ Solomon, ani kiwuap iyoŋ ŋakiro kaŋ lopite ŋolo ewuapitor Daudi papa kon a epeitau ka anakiyookino, ido kitiya ŋuna daadaŋ adau ayoŋ akicik iyoŋ, kiwuap ŋikisila kaŋ ka ŋuna atubunit ayoŋ,

¹⁸ ŋun nai eturubakinia ayoŋ apukan kon alo Isirael ŋikaru ka ŋikaru, lopite ŋolo eikinitor ayoŋ papa kon Daudi abala, ‘Nyikiŋopikini iyoŋ aryamun ituŋanan ŋini ilunyokin lokicoloŋ kon, kipuka Ŋisirael.’

¹⁹ “Nai ani kikiŋer iyoŋ ayoŋ, kimyek ŋakiro ŋuna atubunit ayoŋ aŋuna kon ka ŋakiciketa kaŋ ŋuna akainak iyoŋ, ido tolot akitiyanakin ŋakujo ŋace ka kilip neni kec,

²⁰ ŋun nai akalemarya ayoŋ iyes anakwap a ŋina adau ainakin iyes ka Akai daŋ na ŋina etaleu ayoŋ aŋuna a ekiro kaŋ, alemari ayoŋ, ojoŋo akitere, toruwor ibore ŋini nyeriŋa eyai, ŋini edoŋ erae akitadapet bon, ibore ŋini ekyenatar ŋituŋa a ŋakwapin a daadaŋ.

²¹ Tari tokona kitopolooritae Akai na nooi, apaki ŋin, ituŋanan daadaŋ ŋini itori nen eumokini ka etemari, ‘Kaanukiro etiyaa Ekapolon ŋakiro nu nakwap na ka Kai na lopite lo?’

²² Eboŋokinete nai ŋituŋa temasi, ‘Erae aŋuna aŋerioto ikes Ekapolon Akuj kec ŋina ayauni atapapaa kec anakwap a Ijipit, ido acamut ikes ŋakujo ŋace, ilipete ikes neni a ŋakujo a ŋun ka itiyanakinete. Ŋakiro ŋun iŋes ayaunia Ekapolon akinyasuno na neni kec.’ ”