2 Ŋakiro a ŋirwa 5 - Ebaibul

¹ Ani irikakini Solomon etic daadaŋ ŋolo adukio Akai ke Ekapolon, abu iŋes yau Kai ŋin ŋiboro ŋulu sek keris papa keŋ Daudi kitaleiyo, ŋiboro ŋul ikes lu: Esilipa, egolid ka ŋiboro ŋice daadaŋ, kiŋadak ikes lositowae ŋulu a Akai ka Akuj.

Yaunae Kai ka Akuj Asaduku ŋina ka Acamunet

² Ekaku nai a ŋun, tonyarau Solomon ŋikasikou ka ŋikarikok a ŋikabilae a Ŋisirael daadaŋ ta ŋikarikok a ŋatekerin a Ŋisirael, potu ŋul Yerusalem, ikotere yaut kiŋa alotaun a Daudi, iŋes Sion Asaduku ŋina ka Acamunet ke Ekapolon.

³ Tocunun ŋikilyok daadaŋ alo Isirael neni a erwosit Solomon apaki ŋina a ŋasuban a ŋuna a elap a ŋolo a ŋikanikaarei, a ŋolo enyaritae Esanim.

⁴ Ani kedaut ŋikasikou a Ŋisirael daadaŋ acunun, todakut ŋilepi Asaduku ŋina ka Acamunet,

⁵ ido yaut Asaduku ŋin ŋina ka Acamunet ke Ekapolon kitipeiyoreta edakito kaapei ka eema ŋolo elipyata ikes. Yaasi ikes ŋiboro daadaŋ ŋulu ke etal ŋulu aya tooma eema ŋol. Arae ŋisacaradotin ka ŋilepi etipeiyoryata ŋiboro ŋul daadaŋ.

⁶ Apaki ŋin abu erwosit Solomon ka atukot a Ŋisirael daadaŋ ŋina aris kecunakin neni keŋ towua alokiŋaren Asaduku, kisyakis akiar erae ŋamuronisya ŋamesekin ŋuna alalak ŋuna pa emarun ka ŋimoŋin ŋulu alalak ŋulu pa emarun.

⁷ Ani irikakin, todakasi ŋisacaradotin Asaduku ŋina ka Acamunet ke Ekapolon nakibois ŋina amaikina kiwuakinae alo Kai ka Akuj, nakibois ŋina Asegan nooi; kiwuakis kwap neni arounito ŋabebenuk a ŋisubuna ŋulu a ŋabebenuk.

⁸ Apetarito Ŋisubuna ŋulu a ŋabebenuk ŋabebenuk kec alokidiama akibois ŋina ewuakinitae Asaduku, aŋun, arapuwarito Ŋisubuna ŋulu a ŋabebenuk kidiama Asaduku ka ŋipirin ŋulu awuar Asaduku.

⁹ Aoyak ŋipirin ŋul nooi, atakanete ŋakyes kec anakibois a ŋina Asegan nooi iyai kiŋaren akibois ŋina ayai kidiŋ Akai ka Akuj, nai pa atakanete iyai kiŋa akibois ŋina Asegan nooi; eyakasi ŋipirin ŋul nen tari tokona.

¹⁰ Mam ibore ice ayai tooma Asaduku ŋin, ŋamoru ŋaarei bon ŋunadapal ŋuna egiritae Ŋakiciketa ayakasi tooma. Moses kiwuakini ŋamoru ŋun nen alomoru a ŋolo enyaritae Oreb (iŋes Sinai), neni kebunio Ekapolon tocamunotor ka Ŋisirael kedaut alomun alo Ijipit.

¹¹ Ekaku nai, apotu ŋisacaradotin daadaŋ tolomasi anakibois a ŋina Asegan nooi. Aris ikes daadaŋ kitaleunosi pa emisitae atyakatyaka a ŋatukon kec.

¹² Apotu ŋilepi daadaŋ ŋulu arae ŋikaeok: Asap, Eman, Yedusun ka ŋidwe kec ŋulusapa ta ŋiyeneta kec, towua alowae a ŋolo alo Kide Namuroet, enapito ŋilowi ŋulu amilimilak, toramete ŋitworoi, ŋaduŋgui ka ŋagitae. Arukito ikes ka ŋisacaradotin amiat ka ŋatominiarei ŋulu akusete ŋarupepe.

¹³ Toeikis kaapei ejok nooi ŋulu akusete ŋarupepe ka ŋikaeok ŋuluce ipurosi ka elakara neni ke Ekapolon. Ani ikeunete ikes eete eosi a ŋarupepe, a ŋitworoi ka ŋiboro ŋice ŋulu eore, apotu kipuro Ekapolon ebasi: “Ejok Ekapolon, anerae erubakinit amina keŋ ŋina nyiryaŋiryaŋa eyai ŋikaru ka ŋikaru.” Aneni pei, toburusiya adis Akai ke Ekapolon,

¹⁴ nyepedosi ŋisacaradotin akitiya ŋiticisyo kec a nen, anerae abu adis toburusiya nen, aŋuna abunio akica ke Ekapolon kilelebun Kai ka Akuj.