2 Ŋakiro a ŋirwa 4 - Ebaibul

Ŋiboro ŋulu ka Akai ka Akuj

¹ Abu Uram-Abi kitiyau ke eburonis Namuroet ŋina arae aoyau alosepyon ŋimitae ŋikanikaomwon, torae aoyau alokiŋaren ka neni iteotor ŋimitae ŋikanikaomwon ka aoyau alokwap tari kidiama ŋimitae ŋiomwon ka atutubet.

² Kitiyau a ŋasuwa etorube ŋolo ka anam a ŋina luluŋ, arae alolomu ŋimitae ŋiomwon ka atutubet ameun alokipetot ka epei tari ŋoloce, ido arae acukul ŋimitae ŋulu aapikinito ŋiarei. Arae aoyau a ekipetot akirimokin ŋimitae ŋitomon ka ŋiuni ka atutubet.

³ Kwap ŋikipetetyo ka anam a ŋin, ewuakinitae ŋitorubei a ŋimoŋin kiryam cib natutubet a emita. Arekinitae ŋitorubei a ŋimoŋin ŋul lolaino ŋiarei ŋulu aya lokipetot ka anam.

⁴ Etowoitae anam ŋin alotorubei a ŋitomon ka ŋiarei a ŋulu a ŋimoŋin, eŋoliyarito ŋimoŋin ŋul ŋiuni Kuju, ŋiuni To, ŋiuni Kwap ka ŋiuni Kide. Arapuarit anam ŋitorubei a ŋimoŋin a ŋul ameun anacir tari namuroi.

⁵ Atya abutur ka anam a ŋin akan nenidapal; etiyaunitae ŋikelyo a ŋikipetotyo etya ŋulu a ekopo, ikwaan ka akuyon a ecomocomo. Elelebunun nanam ŋin ŋakipi ŋuna a ŋabesenio a ŋalipyo a ŋaarei.

⁶ Abu daŋ Iram kitiyau ŋabesenio ŋatomon ŋunakiloset, kiwuak ŋakan lowae ŋolo alo Kwap Akai ka Akuj ka ŋakan lowae ŋolo alo Kuju. Nabesenio ŋun elailaere ŋainakineta ŋuna epeyo. Arae ŋisacaradotin bon esitiyaete akiloŋar ŋakipi ŋuna ka anam a ŋina etiyakinitae nen.

⁷ Kitiyau Uram-Abi a egolid ŋawoeta a ŋitaae ŋatomon, etiyaunitae ikes alopite a ŋolo sek kitamitere, ido abu kiwuak tooma Akai ka Akuj, ŋakan lowae ŋolo alo Kwap Akai ka Akuj ka ŋakan lowae ŋolo alo Kuju.

⁸ Abu daŋ iŋes kitiyau ŋimesae ŋitomon, kiwuak Kai ka Akuj, ŋikan lowae ŋolo alo Kwap Akai ka Akuj ka ŋikan lowae ŋolo alo Kuju. Kitiyau nabo ŋabesenio amiat ŋuna ewuasere alo Kai ka Akuj.

⁹ Todukok arwatata nawae alapatu ŋina a ŋisacaradotin ŋina ayai tooma Akai. Todukok ace nawae alapatu ŋina apolon ŋina ayai kiŋa Akai, toburusik eburonis lokekia ŋulu aya ŋalapatui ŋun.

¹⁰ Kiwuak neni asibit anam, neni ewuanakinio ŋakipi lokoona ŋolo alo Kwap-Kide Akai ka Akuj.

¹¹ Kitiyau Uram-Abi ŋamoti ka ŋikitiyoi ta ŋabakulei. Aŋun, abu Uram-Abi kirikak etic daadaŋ ŋolo ka Akai ka Akuj ŋolo etiyae iŋes aŋuna ke erwosit Solomon. Abu kitiyau ŋiboro lu:

¹² Ŋipirin ŋiarei; ŋabakulei ŋaarei, ŋakyes a ŋipirin a ŋuluarei; ŋiriko ŋiarei ŋulu emanimanitae, ŋulu esibusitere ŋakyes a ŋipirin;

¹³ ŋitorubei ŋamiae ŋaomwon ŋulu a ŋaraito a ŋuna enyaritae pomegranet ŋulu etiyaunitae ke eburonis, kiwuakinitetei a ŋilaino a ŋiarei a ŋolorikot, akisibusya ŋakyes a ŋipirin;

¹⁴ ŋawoeta ka ŋabesenio kec;

¹⁵ neni asibit anam neni ewuanakinio ŋakipi ka ŋitorubei a ŋimoŋin a ŋitomon ka ŋiarei a ŋulu aya Kwap neni esibit anam, neni ewuanakinio ŋakipi;

¹⁶ ŋamoti, ŋikitiyoi, ŋaumae ka ŋiboro ŋuluce daadaŋ, ŋulu etiyaere alo Kai ka Akuj. Ŋiboro daadaŋ ŋulu abu Uram-Abi kitiyau aŋuna a erwosit Solomon aŋuna ka Akai ke Ekapolon, arae ŋulu etiyaunitae a eburonis a ŋolo epwasitae.

¹⁷ Aponi ŋiboro ŋul daadaŋ kitiyaunae anakadipaalat a ŋina a aŋolol Yorodan, alokidiŋ Sukos ka Sereda, ikwapei alimunitor erwosit.

¹⁸ Abu Solomon kitiyau ŋiboro ŋul elalak nooi, aŋun, aponi nyeyenun apotis a eburonis a ŋolo keponi kisitiyae.

¹⁹ Aŋun, abu Solomon kitiyau ŋiboro lu daadaŋ ŋulu aya Kai ka Akuj: Namuroet ŋina etiyaunitae a egolid, ŋimesae ŋulu a ŋamugati aŋuna ka ayakau a Ekapolon,

²⁰ ŋawoeta a ŋitaae ŋuna etiyaunitae a egolid a ŋolo ajokan, kitiyau ŋitaae daŋ, ikotere enokete alo Kai ka Akuj alokiŋaren Akibois ŋina Asegan nooi, lopite ŋolo kitamitere;

²¹ ŋitorubei a ŋatur, ŋitaae ka ŋasuwa ŋunaridet ŋatotol; etiyaunitae ikes a egolid bon a ŋolo ajokan nooi;

²² ŋasuwa ŋuna kituduŋeet ŋitaae, ŋabesenio, ŋakijikoi ŋuna apolok ka ŋisipiryae ŋulu elemere ŋatotol ŋuna enokete. Etiyaunitae ŋul daadaŋ a egolid bon a ŋolo ajokan. Aburusikinitae egolid lokekia ŋulu alokiŋa Akai ka Akuj ka ŋulu a Akibois a ŋina Asegan nooi a ŋina ayai tooma Akai ka Akuj.