2 Ŋakiro a ŋirwa 32 - Ebaibul

Torem Senakerib Yudaya

¹ Kedau Esekia akitiya ŋakiro ŋun daadaŋ anakikinyomit Akuj, abu Senakerib erwosit ŋolo ka Asiriya bu torem Yudaya. Kisirikau ŋasigarya keŋ ŋitaunio a Yudaya daadaŋ ŋulu adukitoe ŋaduketa ŋunajiet ecamit akikamar toruwor ŋulu keŋ.

² Ani eyenuni Esekia atemar ebunit Senakerib akirem Yerusalem,

³ apotu totukut ka ŋikapolok ŋuluce ka ŋasigarya keŋ akigol ŋakipi a ŋilelyan a ŋulu alokiŋa etaun, apotu ŋituŋa ŋul kiŋarakis Esekia akitiya ŋun.

⁴ Apotu ŋituŋa ŋulu alalak nooi tocunakinos, togolo ŋakipi a ŋilelyan ka ŋayona ŋuna aleleete anakwap a ŋin. Temasi, “Kaanukiro imyekinere iwon ŋirwosi ŋulu ka Asiriya eryamunete ŋakipi ŋuna alalak a ne?”

⁵ Abu nai Esekia kisitiya ŋituŋa ka agogoŋu. Kitemonokis neni amunaara anarwatata daadaŋ, todukonokis narwatata ŋaduketa ŋuna aoyak ka todukokis arwatata ace kiŋa ŋinaŋorot sek, kititioto nabo akititis ŋina ayai lotaun a Daudi. Abu daŋ Esekia kitiyau ŋakwaaras ka ŋaupala ŋuna alalak nooi.

⁶ Toseununu ŋikapolok a ŋasigarya, tocunak ŋul neni ayai iŋes nalapatu ŋina alopuke ke etaun, kisimukek ikes a ŋakiro a nu,

⁷ “Toruworos ŋulu igogoŋ ka ititiny. Nyikuryaketa, kori nyikikadak aŋuna a erwosit ka Asiriya ka ŋasigarya ŋuna alalak nooi ŋuna eponitotor iŋes, eyakare iwon ŋini epol nooi akilo iŋes.

⁸ Eyakar iŋes apedor ŋina a ituŋanan bon, nai iwon ikiyakar Ekapolon Akuj yok ŋina ikiŋarakini iwon, ŋina eji aŋuna yok alojiesyo yok a daadaŋ.” Abu nai atitinyu min lotuŋa a ŋakiro a ŋuna erworo Esekia erwosit a Yudaya.

⁹ Ani irikakini Esekia ŋun, ariŋa Senakerib erwosit ka Asiriya eyai lotaun Lakis ka ŋasigarya keŋ, ido abu Senakerib kiyakiya ŋikapolok ŋulu a ŋasigarya keŋ Yerusalem neni a erwosit a Esekia a ŋolo a Yudaya ka neni a ŋituŋa daadaŋ a ŋulu a Yudaya a ŋulu ayakasi Yerusalem temasi neni kec,

¹⁰ “Ebala Senakerib erwosit ŋolo ka Asiriya, tolimosi ibore ŋini ikinyomito iyes, ŋini ikiinak iyes arubakin igolokino Yerusalem,

¹¹ ŋina ikilimokinia iyes erwosit Esekia atemar ikiuni iyes Ekapolon Akuj kus, ikimodikinit iŋes iyes, ecamit iŋes akoro ka akure itoarak iyes nen.

¹² Meere mono Esekia abu tolema ŋakiboisyo ka ŋamuroeta ŋuna aya nenimukur a? Meere mono Esekia abu tolimok ŋituŋa a Yudaya ka Yerusalem ebe, ‘Emaikina iyes kilipa Akuj alokiŋaren Namuroet apei bon ka topeo ŋamuronisya alokidiama Namuroet ŋin bon a’?

¹³ Nyiyenete mono iyes ŋuna apotu atapapaa kaŋ kitiyata ka ŋuna etiyat ayoŋ neni a ŋituŋa a ŋakwapin a ŋunace a? Apotu mono ŋakujo a ŋakwapin a ŋun tolakut ŋakwapin kec aneni kaŋ a?

¹⁴ Ŋae adio a ŋakujo a ŋun a daadaŋ a ŋuna a ŋakwapin a ŋuna apotu atapapaa kaŋ tomunaasi abu toiu ŋituŋa keŋ aneni kaŋ? Ikokini nai Akuj kus ikilakuni iyes anakan kaŋ ai?

¹⁵ Aŋun nai, nyicamut Esekia ikimodikini iyes, ikitabaŋaaniya iyes lopite ŋolo iyakatar tokona. Nyinupa ŋakiro keŋ, anerae mam akuj a akwap, kori a apukan ka adio ŋina alaku ŋituŋa keŋ anakan kaŋ, kori anapedor atapapaa kaŋ. Nai ŋuna a kire ikes nu, nyepedori Akuj kus ŋin alakun iyes anapedor kaŋ!”

¹⁶ Apotu ŋikapolok ŋulu eyakuunit Senakerib ŋul kirworo ŋakiro ŋace ŋuna alalak ŋuna eyanyiata Ekapolon Akuj ka Esekia eketiyan keŋ.

¹⁷ Eyanyit daŋ erwosit ka Asiriya Ekapolon Akuj a Ŋisirael anabaruwae a ŋuna egirit iŋes. Abasi ŋakiro ŋun, “Lopite ŋolopei aponiata ŋakujo a ŋituŋa a ŋuluce nyelakut ŋituŋa kec aneni kaŋ, nyelakuni Akuj a Esekia daŋ ŋituŋa a Esekia aneni kaŋ.”

¹⁸ Apotu ŋikapolok ka Asiriya ŋul tocelut irworosi ŋakiro ŋun a Ŋaburaniyae neni a ŋituŋa a Yerusalem a ŋulu awuasi alokidiama arwatata, acelasi ikes aŋuna acamitotor akitubul ka akitukuryaniyar ŋituŋa a Yerusalem, ikotere ikes ikamarete etaun.

¹⁹ Apotu ikes kirworo ŋakiro a Akuj a Yerusalem esibit irworosi ŋakiro a ŋakujo a ŋituŋa a ŋakwapin a ŋunace, a ŋakujo a ŋuna erae ituŋanan itiyaunit.

Kilounae Senakerib ka toarae daŋ

²⁰ Apotu nai erwosit Esekia ka ekadwaran Isaya lokoku ka Amos kilipa neni ka Akuj, kigworonokis Akuj akiŋarakin ikes anakiro a Senakerib.

²¹ Abu nai Ekapolon kiyakiya emalaika ŋolo abu toar ŋasigarya ŋuna ajiok daadaŋ ka ekapolon kec ta ekarikon kec aneni eboiyoto ŋasigarya ka Asiriya. Apotu ŋun kitoboŋosi Senakerib nakwap keŋ pa elakara. Ani elomari Senakerib kai ka akuj keŋ, apotu ŋidwe keŋ ŋice ŋulusapa toara iŋes a nen a ekileŋ.

²² Aŋun, abu Ekapolon tolaku Esekia ka ŋituŋa a Yerusalem aneni a Senakerib a erwosit ka Asiriya ka aneni a ŋimoe keŋ a daadaŋ. Abu Ekapolon kisieŋa ikes ejie alowaetin kec a daadaŋ.

²³ Apotu ŋituŋa a Yudaya ŋulu alalak yaut ŋainakineta kec Yerusalem neni ke Ekapolon ka yaut neni ka Esekia a erwosit ŋiboro ŋulu apol egyelit. Akisyakin nai apaki ŋin, apotu ŋituŋa a ŋakwapin kitopoloosi Esekia nooi.

Todyakakin Esekia

²⁴ Ŋirwa ŋul, abu Esekia todyakakin edeke ŋolo adikino eari. Abu iŋes kilip neni a Ekapolon, ido abu Ekapolon toboŋok akilip keŋ, kitiya akujuwuanut, kitaŋaleu iŋes.

²⁵ Nai abu Esekia tojamuwa ŋun alotau keŋ, abu nyitoodiu alakara neni ke Ekapolon aŋuna ka aŋaleun keŋ, aŋun, abu anyunyura ŋina ke Ekapolon min neni a Esekia ka Yudaya ta Yerusalem.

²⁶ Abu nai Esekia toki alotau ŋuna sek abu iŋes tojamuwa, tokiwa ŋituŋa a Yerusalem daŋ ŋun; aŋun, abu anyunyura ŋina ke Ekapolon nyebu neni kec alorwa a ŋulu araakar Esekia erwosit.

Ebari a Esekia ka ŋuna abu kitiya

²⁷ Ayakar Esekia ebari ŋolo alalan nooi ka etopolooritae iŋes nooi. Abu iŋes todukonok neni iŋadao esilipa keŋ, egolid keŋ, ŋamoru keŋ ŋuna apol egyelit, ŋikito ŋulu ekukuny, ŋaupala ka ŋiboro keŋ ŋulu apol egyelit daadaŋ.

²⁸ Abu daŋ iŋes todukonok ŋisitowae ŋulu iŋadao ŋikinyom, epiini, akimyet ka ŋatamanawusyo a ŋaatuk a ŋuna agelegelya daadaŋ ta ŋanokin a ŋamesekin.

²⁹ Abu Esekia todukonok ŋitaunio keŋ ŋice ka abu toryamu ŋamesekin ka ŋaatuk ŋuna alalak nooi, anerae abu Akuj inak iŋes ebari ŋolo alalan nooi.

³⁰ Arae Esekia pei abu togol ŋakipi a elelya Gion, tobok akitelosit ŋina etorit kwap ŋalup ŋina acilarit ŋakipi lowae ŋolo alo To etaun a Daudi. Abu Esekia kitiya ŋiticisyo keŋ daadaŋ ejok emam atwaniyar.

³¹ Ani tari iyakuunete ŋikepukak a Babilon ŋituŋa kec neni a Esekia akiŋit iŋes akujuwuanut ŋina abu kitiyakin nakwap keŋ, abu Akuj tocamak iŋes akitiya ŋuna acamit aŋuna ka akikatakin iŋes, anerae acamit Akuj aanyun ŋakiro daadaŋ ŋuna ayakasi lotau a Esekia.

³² Ŋiticisyo ke Esekia ŋuluce daadaŋ ka ŋuna ajokak daadaŋ ŋuna etiyat iŋes, igiritae nakitoodyanakineta a ekadwaran a Isaya alokoku ka Amos ŋuna eya lokitaabo ŋolo a ŋakiro a ŋirwosi a Yudaya ka Isirael.

³³ Abu Esekia totwan, tonukae nadokaret lomukura neni anukitae ŋiletok a Daudi. Ani etwani Esekia, apotu ŋituŋa a Yudaya ka Yerusalem potu neni keŋ itoodiunito akitopoloorit kec iŋes. Kilunyokin Manase ŋolo arae lokoku keŋ lokicoloŋ keŋ kipuka Yudaya.