2 Ŋakiro a ŋirwa 26 - Ebaibul

Kipuka Usia Yudaya

¹ Apotu nai ŋituŋa a Yudaya daadaŋ kituruwosi Usia lokoku ka Amasia erwosit, kilunyokin lokicoloŋ a papa keŋ kipuka Yudaya. Arae ŋikaru a Usia ŋitomon ka ŋikanikapei.

² Arae Usia kebu todukok nabo etaun Elos kinyakak lotuŋa a Yudaya kedau papa keŋ atwanare.

³ Esyakini Usia akipuka Yudaya erae ŋikaru keŋ ŋitomon ka ŋikanikapei, kipuka iŋes Yudaya alo Yerusalem ŋikaru ŋatomonikan ka ŋiarei. Arae ekiro a toto keŋ Yekolia ŋina ayaunitae alo Yerusalem.

⁴ Abu Usia kitiya ŋuna eyookino alokiŋaren Ekapolon, lopite ŋolo etiyator Amasia papa keŋ.

⁵ Abu iŋes kitiyanak Akuj anakikinyomit alorwa a ŋulu a Sakariya a ŋolo abu kitatam iŋes akitopoloorit Akuj; ŋirwa daadaŋ ŋulu etiyanakinia iŋes Ekapolon, abu Akuj kiterereŋ iŋes.

⁶ Abu Usia tolot akitijikin Ŋipilistin, tobwaŋabwaŋaa ŋarwatatain ŋuna ke etaun Gas ka ŋuna ke etaun Yabine ta ŋuna ke etaun Acidod ka abu todukok ŋitaunio diyete Acidod ka iwace anakwap a Ŋipilistin.

⁷ Abu Akuj kiŋarak iŋes areun Ŋipilistin ka Ŋiarabi ŋulu eboiyete alo Gur-Baal ka areun Ŋimeuni daŋ.

⁸ Apotu Ŋiamoni yaasi ocur kec neni a Usia, ido abu arwonu keŋ todol tari lokukor ŋolo ka akwap kec ka Ijipit, anerae abu Usia togogoŋior nooi.

⁹ Abu daŋ Usia toduk ŋaduketa ŋuna aoyak Yerusalem lopuke ŋolo enyaritae epuke ŋolo ke Ekoona, lopuke ŋolo enyaritae epuke ŋolo a Akadipaalat ka neni iryamiryamyata ŋarwatatain, toduk nen ŋaduketa ŋunajiet.

¹⁰ Abu iŋes toduk ŋaduketa ŋuna aoyak naloŋisat, tobokanak ŋakare ŋuna alalak ŋuna apolok nen, anerae ayakar iŋes ŋisipanin a ŋaatuk a ŋuna alalak, ayakasi ŋisipanin ŋul Sepela ka nadipoe a ŋikamukumukui, ayakar iŋes ŋiketak ka ŋikatubok ŋikito ke epiini, eboiyete ŋul alokamukumukui ka aneni eya ŋalup ŋuna ajokak aŋuna ka akitare, anerae amina Usia akitare nooi.

¹¹ Ayakar daŋ Usia ŋasigarya ŋuna etatamitae ejok ajiore, ŋuna atenito a ŋinapaki alosit lojie alokimar a ŋolo atyakatyakatotor Yeiel ŋolo arae ekegirigiran ka Maaseia ŋolo arae ekapolon a ŋasigarya ikes; ewuapit Maaseia Anania anapolou aŋuna araakar Anania ekapolon a ŋasigarya ŋolo epukato ke erwosit.

¹² Arae ekimar a ŋikarikok a ŋasigarya imaritae a ŋinateker ŋalipyo ŋaarei ka ŋamiae ŋakanikapei.

¹³ Apolokinito ŋikarikok ŋul ŋasigarya ŋalipyo ŋamiae ŋauni ka ŋakanikaarei ka ŋamiae ŋakan ŋulu etatamitae apedorito ejie egogoŋ nooi aŋuna ka akiŋarakin erwosit kilou ŋimoe keŋ.

¹⁴ Abu Usia inak ŋasigarya keŋ daadaŋ ŋaupala, ŋakwaaras, ŋakopiyae ŋuna iuryarito akou nyewana, ŋarapeta, ŋikaleŋeleŋe ka ŋamoru ŋuna a ŋadoya.

¹⁵ Abu iŋes kiwuanak Yerusalem ŋiboro ŋulu etiyaunete ŋikilyok ŋulu eyenete akitiya ŋiboro ejok, ŋiboro ŋulu egumanarere ŋikaleŋeleŋe ka ŋulu imasanarere ŋamoru ŋuna aburok anaduketa a ŋuna aoyak ka alokoonae ka arwatata ejiyo. Abu arwonu keŋ todol nakwapin ŋuna alwanak, anerae eŋarakinit Akuj iŋes nooi, akitodol ŋina agogoŋioror iŋes.

Kiturokin Usia toŋer akiwuap ŋakiro ka Akuj

¹⁶ Ani eyenuni Usia atemar agogoŋior, abu kiturokin, ido abu akiturokin keŋ inak iŋes aruwor ekoŋinait. Abu iŋes toŋer akikinyomit neni ke Ekapolon Akuj keŋ, abu toloma Kai ka Akuj akicuny ekinyate a Namuroet a ŋina ecunyeneneere ekinyate.

¹⁷ Nai abu esacaradoti Asaria torukosi ka ŋisacaradotin ŋatomonikanikauni ŋulu pa akuryaka, kiwuapasi Usia Kai ka Akuj.

¹⁸ Kitepega iŋes a nen temasi, “Usia! Meere iyoŋ emaikina kicuny ekinyate neni ke Ekapolon. Erae etic ŋol ŋolo a ŋisacaradotin a ŋulu erae ŋiletok ka Aron, ŋulu adaun akitalekin akicuny ekinyate. Torotok anakibois a ŋina asegan a na, anerae itiya iyoŋ ŋuna nyiyookino, nyikiinakinete ŋun iyoŋ aruwor ŋolo ikitopoloorit Ekapolon Akuj.”

¹⁹ Apotu ŋakiro ŋun kitoŋoa Usia, ido apaki ŋin, atiŋit Usia ibore ŋini icunyere ekinyate, ani eŋoi iŋes a ŋakiro a ŋuna alimunete ŋisacaradotin, kikamu atapon ereet keŋ eriŋa ewoi alokiŋaren ŋisacaradotin alo Kai ka Akuj alodiyete Namuroet ŋina ecunyere ekinyate.

²⁰ Ani iŋolikinete Asaria esacaradoti ŋolo Apolon nooi ka ŋisacaradotin ŋuluce iŋes, kiŋolikis kikamu atapon ereet keŋ, aŋun, apotu kiwonyakiniata iŋes kiŋa atipei, ka abu iŋes daŋ elope kiwonyak alosit kiŋa atipei anerae kebu Ekapolon kitedyakak iŋes.

²¹ Torubak erwosit Usia edyaka alorwa a ŋulu ka akiyar keŋ a daadaŋ, kiboiye epakara kai keŋ bon, anerae aponi iŋes toŋeroi alo Kai ke Ekapolon. Arae Yosam lokoku keŋ iŋes apolokinit akai ŋina a erwosit ka daŋ iŋes epukat.

²² Ŋiticisyo a Usia ŋuluce daadaŋ ageun a ŋulu esyakinak tari ŋulu esidyok, abu Isaya lokoku ka Amos kigir.

²³ Abu Usia totwana, tonukae akuwan keŋ neni anukitae atapapaa keŋ, nai meere neni anukio ŋirwosi, anerae apotu ŋituŋa temasi, “Edyaka iŋes atapon.” Kilunyokin Yosam ŋolo arae lokoku keŋ lokicoloŋ keŋ kipuka Yudaya.