2 Ŋakiro a ŋirwa 23 - Ebaibul

¹ Ani edolete ŋikaru a Yoas ŋikanikaarei, kisileereu Yeoiyada ŋolo arae esacaradoti agogoŋu keŋ, tocamunos iŋes ka ŋikarikok a ŋasigarya a ŋuna atyakatyakatae a ŋamiae. Ŋirorwa a ŋikarikok a ŋul ikes lu: Asaria lokoku a Yeroam, Isimael lokoku a Yeoanan, Asariu lokoku ka Obed, Maaseia lokoku ka Adaia ka Elisapat lokoku ka a Siciri.

² Kirimosi ikes lotaunio a Yudaya daadaŋ, yaut Yerusalem ŋilepi ka ŋikapolokinitok ŋatekerin a Isirael alotaunio a Yudaya a daadaŋ.

³ Tocunakinos ŋituŋa ŋul daadaŋ Kai ka Akuj, tocamunos ka Yoas lokoku a erwosit. Tema Yeoiyada neni kec, “Lokoku a erwosit a ŋolo paaran atwani iŋes lo, emyekisi iŋes toruwor erwosit a Yudaya lopite ŋolo iikinitor Ekapolon atemar ŋiletok a erwosit Daudi ikes emaikina kipukata Yudaya.

⁴ Ŋuna emaikina iyes kitiyata nu: Iyes ŋisacaradotin ka ŋilepi ŋulu ilosete akitiya akoloŋit ŋina a Sabato, totyakas ŋatyaketa ŋauni. Emaikina atyaket kus apei tolot akitere ŋipukei ŋulu ka Akai ka Akuj,

⁵ atyaket ŋina a ŋaarei tolot akitere akai ŋina ke erwosit ka atyaket ŋina a ŋauni tolot akitere epuke ŋolo enyaritae epuke ŋolo ka Akisyakinet. Ŋituŋa ŋuluce daadaŋ, emaikina kiboiyoto analapatui a ŋuna ka Akai ke Ekapolon.

⁶ Nyicamakis ituŋanan idio elomari Kai ka Akuj, mati ŋisacaradotin ka ŋilepi bon ŋulu itiyaete akoloŋit ŋin Kai ka Akuj. Elomarete ikes nen, anerae italeunitoe ikes, nai emaikina ŋituŋa ŋuluce daadaŋ kiwuapa ŋakiro ŋuna alimu Ekapolon, kiboiyoto alokiŋa Akai a Ekapolon.

⁷ Itemokino ŋilepi kirimokis erwosit kidiŋ kec, ŋinituŋanan totiŋite ŋiboro keŋ ŋulujiet. Ituŋanan daadaŋ ŋini elomari Kai ka Akuj, emaikina toarae. Torukito ka erwosit aneni elosi daadaŋ.”

Kituruworoe Yoas erwosit a Yudaya

⁸ Apotu ŋilepi ka ŋituŋa a Yudaya daadaŋ kitiyata ŋakiro daadaŋ lopite ŋolo ecikitor esacaradoti Yeoiyada ikes. Abu ŋolokarikon yau ŋituŋa keŋ ŋulu amaikina kitiyata akoloŋit ŋina a Sabato ka ŋulu ieŋunito akitiya akoloŋit ŋin; anerae pa emyaanakini esacaradoti Yeoiyada ŋulu eeŋunito toboŋosi lotaunio kec.

⁹ Kedaut ŋasigarya ŋun aponare, abu Yeoiyada tokoranak ŋikarikok a ŋasigarya a ŋamiae ŋakwaaras ka ŋaupala ŋuna apolok ka ŋuna cicik ŋuna sek arae ŋuna a erwosit Daudi, ŋuna sek eŋadatae Kai ka Akuj.

¹⁰ Kisibak nai Yeoiyada ŋasigarya iwuakinito erwosit kidiŋ kec, etiŋit ŋinituŋanan eborosit keŋ ŋolojiet, kibaka ŋinapei alowae a ŋolo alo Kwap Akai ka Akuj akitodol lowae ŋolo alo Kuju Akai ka Akuj, kiwuak ŋice kirimokis Namuroet kidiŋ, ŋice kirimokis Akai ka Akuj kidiŋ.

¹¹ Yau nai Yeoiyada Yoas lokoku a erwosit kiŋa, kitanap, inak ŋakiro ŋuna ka Acamunet keŋ ka ŋituŋa a Yudaya, kiserata ŋituŋa atemar erae Yoas erwosit, ido apotu Yeoiyada ka ŋidwe keŋ ŋulusapa kiosa Yoas a akimyet, kituruwosi erwosit; tocelut ŋituŋa daadaŋ temasi, “Ikigasi isua torubak erwosit eyari!”

Toarae Asalia

¹² Ani iirari Asalia ecelet ŋolo a ŋituŋa ka iŋolikini ŋituŋa ekerete ka ipurosi erwosit, abu iŋes tolot Kai ka Akuj neni aya ŋituŋa.

¹³ Ani edoli iŋes nen, kiŋolik erwosit ŋolo ariŋa eseunio ewoi alopir a ekek a Akai ka Akuj lopite ŋolo sek ewoenenea erwosit a nen, ewuasi alodiyete keŋ ŋikarikok a ŋasigarya, ŋikakutak ŋarupepe ka ŋituŋa daadaŋ ŋulu a Yudaya elelyanete ta ŋikaeok etiŋito ŋiboro kec ŋulu eotor, iŋarenikinito ŋituŋa anasuban a ŋun. Abu arwosit Asalia tocilicili ŋilowi keŋ, kiworou tema, “Erae ibore en aruruma ŋinademaret arwosit apukan! Erae ibore en aruruma ŋinademaret arwosit apukan!”

¹⁴ Abu nai esacaradoti Yeoiyada yau ŋikarikok a ŋasigarya tema neni kec, “Yautu iŋes kidiŋ ŋasigarya, toara ituŋanan daadaŋ ŋini iwarit aiun iŋes.” Arae ŋun anerae aris Yeoiyada kelimu ebe, “Nyiarakis Asalia tooma Akai ka Akuj.”

¹⁵ Kikamut nai ikes iŋes apaki ŋina adolio iŋes lopuke ŋolo enyaritae epuke ŋolo a ŋaŋolei alotooma ere a erwosit, ido toara ikes iŋes a nen.

¹⁶ Abu nai Yeoiyada esacaradoti kiwuak Acamunet kidiŋ keŋ ka ŋituŋa daadaŋ kaapei ka erwosit ikotere ikes eruworosi ŋituŋa a Ekapolon.

¹⁷ Apotu nai ŋituŋa daadaŋ tolemasi akuj ŋina enyaritae Baal, toukosi Baal, tobwaŋabwaŋata ŋamuroeta keŋ ka ŋitorubei keŋ. Aponi Matan ŋolo arae esacaradoti a Baal toarae alokiŋaren ŋamuroeta.

¹⁸ Kiwuak nai Yeoiyada ŋilepi ŋulu arae ŋisacaradotin akitere Akai ka Akuj. Arae ŋilepi ŋul ŋulu sek keris Daudi kiwuak akitere Akai ka Akuj ka aayenen ŋainakineta ŋuna epeyo neni ke Ekapolon lopite ŋolo igiritere lokisila a Moses. Amaikina ŋilepi ŋul erae ŋulu elelyanete ka ŋulu eosi apaki ŋina eyaeta ŋainakineta neni ke Ekapolom ikwapei alimunitor Daudi.

¹⁹ Abu daŋ Yeoiyada kiwuak ŋituŋa akitere ŋipukei ŋulu ka Akai ka Akuj, ikotere nyeloma Kai ka Akuj ituŋanan idio ŋini nyitaleuno.

²⁰ Torukosi nai Yeoiyada ka ŋikarikok a ŋasigarya, ŋikapolok ka ŋikepukak ta ŋituŋa a Yudaya daadaŋ, totiyaunotor erwosit alo Kai ka Akuj, toloto kai ŋina ke erwosit kitorere lopuke ŋolo ayai neni amukur, ido kisiboikis erwosit lokicoloŋ ŋolo a apukan.

²¹ Tolelyana ŋituŋa ka akwap a ŋin daadaŋ, bu ekisil lotaun keari Asalia a ekileŋ.