2 Ŋakiro a ŋirwa 19 - Ebaibul

Tolimokinae Yeosapat atemar pa eyookino ŋuna etiyae iŋes.

¹ Ani eboŋuni Yeosapat erwosit a Yudaya emam ŋace kai keŋ ŋina ka apukan ŋina alo Yerusalem,

² abu eketeyenikinan ŋolo anyaritae Yeu lokoku ka Anani tolot akisiryam iŋes, kiŋit Yeu erwosit tema, “Emaikina mono iyoŋ kiŋarak ŋulu aronok ka toriwo ka ŋulu nyecamito Ekapolon a? Aŋuna itiyaa iyoŋ ŋakiro ŋun, eyakaun neni kon anyunyura ŋina ke Ekapolon.

³ Kikote neni daŋ, itiya iyoŋ ŋadi ŋuna ajokak, anerae ilema iyoŋ anakwap a Yudaya ŋipirin ŋulu eturuworito ŋituŋa akuj ŋina enyaritae Asera ka imukek alotau kon akiwuapit Akuj.”

Toseu Yeosapat ŋikatubok ŋakiro

⁴ Arae Yerusalem eboiyo Yeosapat, abu nai iŋes kirimono ŋapakio ŋuna alalak lotuŋa ameun alo Beeriseba akitodol nakwap ŋina a ŋikamukumukui ŋina enyaritae Epuraim; kinyaku ŋituŋa neni ke Ekapolon a Akuj atapapaa kec.

⁵ Abu Yeosapat toseu ŋikatubok ŋakiro alotaunio a Yudaya a daadaŋ a ŋulu aya ŋaduketa ŋunajiet.

⁶ Tema neni kec, “Totamete ejok anakiro a ŋuna itiyaete iyes, anerae nyitubete iyes ŋakiro aŋuna a ŋituŋa, nai aŋuna ke Ekapolon a ŋolo irukito ka iyes apaki daadaŋ ŋina itubioto ŋakiro.

⁷ Tocamutu tokona akitopoloorit Ekapolon alotai kus; totamete ejok anakiro a ŋuna itiyaete iyes, anerae aneni ke Ekapolon Akuj yok, emam amodyanakin kori, ariit neni a ŋice, kori ŋakaluŋuluŋui.”

⁸ Abu Yeosapat toseu alo Yerusalem daŋ ŋice alokidiŋ ŋilepi, ŋisacaradotin ka ŋikarikok a ŋikalya a Ŋisirael, akitub ŋakiro aŋuna ke Ekapolon aloikiikoe a ŋulu ebilitotor ŋituŋa ŋikisila ŋulu ke Ekapolon ka aloikiikoe a ŋulu isitatar ŋituŋa. Eboiyete ŋul daadaŋ alo Yerusalem.

⁹ Tolimok Yeosapat ikes ŋakiro nu tema, “Emaikina iyes kitiyaete ikinyomito Ekapolon ka iinakina alotai kus ka itopoloorito Ekapolon.

¹⁰ Ŋakiro daadaŋ ŋuna eyaunete ŋiyeneta, kori ŋituŋa a etaun kus neni kus akitub, ŋakiro ŋuna kerae earitor ituŋanan ŋinice, kori ebilitor ŋikisila ke Ekapolon, kori ŋakiciketa ŋuna ke Ekapolon, kori etal, kori ŋuna etubunit Ekapolon, emaikina iyes tolimokis ikes kimyekis asecenen aneni ke Ekapolon; ani pa kilimokis ikes ŋun, ebuni anyunyura ke Ekapolon neni kus ka neni a ŋiyeneta kus. Kitiyata ŋun, ikotere nyiseca.

¹¹ Ikipolokini iyes anakitub ŋakiro ŋuna ke edin Amaria esacaradoti ŋolo Apolon nooi ka ikipolokini iyes anakitub ŋakiro ŋuna ka apukan Sebadia lokoku a Isimael ŋolo erae ekarikon a ekabila a Yuda. Itiyaete ŋilepi etic kus erae ŋikapolok aneni kus. Kitiyata ka atitinyu, elipi ayoŋ Ekapolon toruko ka ŋulu itiyaete ejok.”