2 Ŋakiro a ŋirwa 17 - Ebaibul

Kipuka Yeosapat Yudaya

¹ Abu Yeosapat lokoku ka Asa kilunyokin lokicoloŋ toruwor erwosit a Yudaya. Kitogogoŋ apukan keŋ aŋuna a Isirael.

² Kiwuak ŋasigarya keŋ lotaunio a Yudaya daadaŋ ŋulu aya ŋaduketa ŋunajiet, kiwuak ŋasigarya nakwap ka lotaunio ŋulu anakwap ke Epuraim ŋulu sek kebu papa keŋ Asa kikama.

³ Arukito Yeosapat ke Ekapolon, anerae abu iŋes kiwuap ŋakiro ŋuna sek etiyae papa keŋ ekiŋaren, abu iŋes nyelot akilip neni a Baal,

⁴ nai abu kitiyanak Akuj a papa keŋ, kiwuap Ŋakiciketa keŋ, abu nyiwuap ŋuna etiyaete ŋituŋa anakwap a Isirael.

⁵ Aŋun, abu Ekapolon kitogogoŋ apukan a akwap a Yudaya apaki ŋin ŋina epukator Yeosapat. Apotu ŋituŋa a Yudaya daadaŋ yaut ŋainakineta neni a Yeosapat, toryamu iŋes ebari ŋolo alalan nooi ka kitopolooroe iŋes nooi.

⁶ Ainakina Yeosapat alotau keŋ akiwuap ŋuna ke Ekapolon, abu daŋ iŋes tolema ŋaduketa ŋuna aya nenimukur ŋuna elipere ŋakujo, tolema alo Yudaya tari ŋipirin ŋulu arae ŋitorubei a akuj a ŋina anyaritae Asera.

⁷ Alokaru a ŋolo a ŋiuni ipukat Yeosapat Yudaya, abu kiyakiya ŋikapolok lu ŋulu epukatotor iŋes: Ben-Ail, Obadia, Sakariya, Nesanel ka Mikaia alosit akitatam ŋituŋa alotaunio a Yudaya.

⁸ Arukito ŋituŋa ŋul ka ŋilepi lu: Semaia, Nesania, Sebadia, Asael, Semiramos, Yeonasan, Adoniya, Tobiya ka Tobadoniya. Arukito ŋilepi ŋul ka ŋisacaradotin lu: Elisama ka Yeoram.

⁹ Yaasi ikes ekitaabo ŋolo a ŋikisila ke Ekapolon, kitatama ŋituŋa alo Yudaya daadaŋ, toloto lotaunio a Yudaya daadaŋ, kitatama ŋituŋa ŋikisila ŋulu ke Ekapolon.

¹⁰ Abu Ekapolon kitubul ŋituŋa a ŋakwapin a daadaŋ a ŋuna edunyatar Yudaya, aŋun, apotu ikes nyelot akitijiore Yeosapat.

¹¹ Apotu Ŋipilistin ŋice yaut ŋainakineta neni a Yeosapat, yaut esilipa daŋ erae ocur kec, yaut Ŋimarabui ŋakinei neni a Yeosapat; ŋimeesekin ŋalipyo ŋakanikaarei ka ŋamiae ŋakanikaarei, ŋikorwa ŋalipyo ŋakanikaarei ka ŋamiae ŋakanikaarei.

¹² Aŋun, abu Yeosapat togogoŋior nooi alokipukae keŋ; abu todukok Yudaya ŋaduketa ŋunajiet ka ŋitaunio ŋulu aya ŋisitowae.

¹³ Abu daŋ Yeosapat kitiya ŋiticisyo ŋulu alalak lotaunio a Yudaya. Ayakar daŋ iŋes Yerusalem ŋikilyok ŋulu adedeŋak ŋulu ayenete ejie ejok.

¹⁴ Arae lo ekimar kec a ŋatekerin: Ŋikarikok a ŋasigarya alo Yudaya a ŋuna atyakatyakatae a ŋalipyo ikes lu: Adina iŋes arae ekarikon a ŋasigarya ŋalipyo ŋamiae ŋauni;

¹⁵ Totupak Yeoanan ŋolo arae ekarikon a ŋasigarya ŋalipyo ŋamiae ŋaarei ka ŋatomonikanikauni;

¹⁶ Totupak Amasia lokoku a Sikiri ŋolo abu tocamu akitiya koŋin aŋuna ke Ekapolon iŋes arae ekarikon a ŋasigarya ŋalipyo ŋamiae ŋaarei.

¹⁷ Ŋikarikok a ŋasigarya alo Benjamin ikes lu: Eliada ŋolo erae esigarit ŋolo adedeŋan iŋes arae ekarikon a ŋasigarya ŋalipyo ŋamiae ŋaarei, ayakatar ŋasigarya keŋ ŋikaleŋeleŋe ka ŋaupala.

¹⁸ Totupak Yeosabad ŋolo arae ekarikon a ŋasigarya ŋalipyo amiat ka ŋatomonikanikauni a ŋuna ayakatar ŋiboro ŋulujiet.

¹⁹ Arae ŋul ŋikilyok ŋulu etiyaete aŋuna ke erwosit, pa imarakinitae ŋulu abu Yeosapat kiwuak lotaunio ŋulu aya ŋaduketa ŋunajiet alo Yudaya daadaŋ.