2 Ŋakiro a ŋirwa 16 - Ebaibul

Toŋeroi ŋakiro ŋuna ariyoto Yudaya ka Aram

¹ Alokaru a ŋolo a ŋatomoniuni ka ŋikanikapei ipukat Asa Yudaya, abu Baasa erwosit a Isirael kitipeiyo ejie ka Yudaya, toduk aduketait ŋinajiet Rama aŋuna ka akiretakin ituŋanan idio nyelomu, kori nyeloma nakwap ka Asa a erwosit a Yudaya.

² Aŋun, abu Asa ya esilipa ka egolid ŋolo eŋadatae Kai ka Akuj ka ŋolo eŋadatae kai ke erwosit, kiyakiya neni a Benadad a erwosit ka Aram a ŋolo eboi alo Damasko. Tema Asa neni a Benadad,

³ “Oriwo iyoŋ ka ayoŋ, lopite ŋolo ariitotor papa kaŋ ka papa kon; ekeyakikinit ayoŋ iyoŋ ŋainakineta ŋuna a esilipa ka egolid. Toŋer tokona ariit ka Baasa erwosit ŋolo a Isirael, ikotere iŋes eboŋori nyeketijik ayoŋ.”

⁴ Kiira Benadad ŋakiro ka Asa a erwosit, ido kiyakiya ŋikarikok a ŋajiorei keŋ akirem ŋitaunio ŋulu a Isirael. Toreut ikes ŋitaunio lu: Ijon, Dan, Abel-Maim ka ŋitaunio a Naputali daadaŋ ŋulu eŋadatae ŋiboro.

⁵ Ani iirari Baasa ŋakiro ŋun, tojoŋo akiduk Rama, kimyek etic keŋ ŋol.

⁶ Abu nai erwosit Asa ya ŋikilyok ŋulu alo Yudaya daadaŋ akiwokun ŋamoru ka ŋakito alo Rama ŋuna sek adukio Baasa. Abu Asa kisitiya ŋamoru ka ŋakito ŋun adukio Geba ka Misipa.

⁷ Apaki ŋin, abu eketeyenikinan ŋolo anyaritae Anani tolot neni ke erwosit Asa tema, “Aŋuna ibunio iyoŋ toyarikinia neni ke erwosit ka Aram, meere neni ke Ekapolon Akuj kon, asiwa ŋasigarya ka Aram aneni kon.

⁸ Pa mono alalak nooi ŋasigarya a Ŋikusi ka Ŋilibiyae, ido pa mono ayakatar ikes ŋagaari ŋuna alalak ka ŋikametok ŋaŋolei ŋulu alalak a? Abu Ekapolon ikiinak iyoŋ akiloun ikes, anerae ibu iyoŋ toyarik neni keŋ.

⁹ Ite Ekapolon akwap daadaŋ ka einakini agogoŋu neni a ŋulu eyarikinito neni keŋ. Itiya iyoŋ ŋuna ka abaŋao, ageun tokona tari moi jik, erubakinete ŋimoe ikitijiete iyoŋ.”

¹⁰ Aŋakiro a ŋun, abu Asa toŋoik Anani eketeyenikinan; toŋo Asa nooi, kiwuak eketeyenikinan ŋol mabus. Apaki ŋinapei, kisyak Asa aryenyaanikin ŋituŋa ŋice.

Adyaka ka atwanare ka Asa

¹¹ Ŋiticisyo ka Asa ageun a ŋulu eŋarenok tari ŋulu esidyok, igiritae lokitaabo ŋolo a ŋakiro a ŋirwosi a Yudaya ka Isirael.

¹² Alokaru a ŋolo a ŋatomoniuni ka ŋikanikaomwon ipukat Asa Yudaya, abu Asa todyakakin ŋakejen, toroniar nooi adyaka keŋ, nyemitak Asa tari akiwar Ekapolon kitaŋaleu iŋes, nai abu kiwar akitaŋaleuno aneni a ŋimurok.

¹³ Totwana nai Asa ikwapei atapapaa keŋ, atwani iŋes alokaru a ŋolo a ŋatomoniomwon ka epei ipukat iŋes Yudaya.

¹⁴ Tonukae iŋes neni sek keris iŋes kebok aŋuna keŋ tooma etaun a Daudi. Apotu ŋituŋa kiperikis akuwan keŋ neni asibit ekitaada, neni ewuakinitae ŋikito ŋulu akukunyok ka ŋamyeta ŋuna akukunyok. Kinokakis ikes akim ŋina apolon nen apaki ŋina egworotor aŋuna keŋ.