2 Ŋakiro a ŋirwa 14 - Ebaibul

Kipuka Asa Yudaya

¹ Abu Abiya totwana ikwapei atapapaa keŋ, ido aponi tonukae iŋes lotaun a Daudi. Abu lokoku keŋ Asa kilunyokin lokicoloŋ keŋ kipuka Yudaya. Alokaru a ŋulu epukator Abiya Yudaya, abu Yudaya kiboi ŋikaru ŋitomon emam ŋituŋa itijiete.

² Abu Asa kitiya ŋuna ajokak ka ŋuna eyookino alokiŋaren Ekapolon Akuj keŋ.

³ Abu tolema ŋamuroeta ŋunagelae ka kiela ŋakiboisyo ŋuna adukitoe nenimukur neni elipyata ŋituŋa ŋakujo, toukonok kwap ŋipirin ŋulu a ŋitalyo ka ŋitorubei ka akuj a ŋina anyaritae Asera.

⁴ Kicik Asa ŋituŋa a Yudaya kiwara ŋuna ecamit Ekapolon Akuj atapapaa kec ka akiwuap ŋikisila keŋ ta Ŋakiciketa keŋ.

⁵ Abu daŋ Asa tolema alotaunio a Yudaya a daadaŋ ŋaduketa ŋuna adukitoe nenimukur neni elipyata ŋituŋa ŋakujo, tolema tari ŋamuroeta ŋuna ecunyere ekinyate, ido abu Yudaya kiboi apaki ŋin emam ituŋanan itiji.

⁶ Abu Asa toduk ŋaduketa ŋunajiet lotaunio a Yudaya apaki ŋin ŋina amamukatar ŋituŋa etijiete ikes. Amam ŋituŋa etijiete iŋes, anerae abu Ekapolon inak ekisil neni ka Asa.

⁷ Tema Asa neni a ŋituŋa a Yudaya, “Oduko ŋitaunio, ewuakisi ŋarwatatain kiryama cib ka odukokisi ŋaduketa ŋuna aoyak ŋuna kirereet ta ŋipukei ŋulu egolio a ŋasuwa. Eriŋa akwap na erae ŋina yok, anerae etiyae iwon acamit ŋina a Ekapolon Akuj yok; etiyae iwon acamit keŋ ka ikiinak iŋes iwon ekisil alowaetin a akwap yok a daadaŋ.” Aŋun, apotu ikes toduko ka toryamut ŋarereŋisyo.

⁸ Ayakar Asa ŋasigarya ŋalipyo ŋamiae ŋauni Yudaya, ayakatar ŋasigarya ŋun ŋaupala ka ŋakwaaras. Ayakar Asa ŋasigarya ŋace ŋalipyo ŋamiae ŋaarei ka ŋatomonikanikauni Benjamin ŋulu ayakatar ŋaupala ka ŋikaleŋeleŋe. Arae ŋasigarya ŋun daadaŋ ŋuna adedeŋak ka ŋuna ayenete ejie ejok nooi.

Tobwaŋae ŋimoe ŋulu aponito alo Kus,

⁹ Abu Sera ŋolo arae ekarikon a ŋasigarya a Ŋikusi tolot akirem Yudaya, ayakar iŋes ŋasigarya amilion ka ŋagaari ŋamiae ŋauni. Apotu ikes toloto tari lotaun ŋolo anyaritae Maresa alo Yudaya.

¹⁰ Abu erwosit Asa ŋolo a Yudaya tosuto ka ŋasigarya keŋ lojie, kicodosi anakadipaalat a ŋina enyaritae Sepasa, a ŋina alodiyete Maresa.

¹¹ Kilip Asa neni ke Ekapolon Akuj keŋ tema, “Okoe Ekapolon, nyityakatyakat iyoŋ ŋituŋa akiŋarakin ŋulu ejioko ka ŋulu nyejioko, kiŋarakinae isua, okoe Ekapolon Akuj kosi, anerae neni kon ikiyarikinit isua, aponi isua alokiro kon akitijiore ŋituŋa ŋulu alalak lu. Okoe Ekapolon, irae iyoŋ Akuj kosi; nyicamak ituŋanan idio ikilouni iyoŋ.”

¹² Aŋun, abu Ekapolon kilou Ŋikusi alokiŋaren Asa ka ŋasigarya a Yudaya, tobwaŋas Ŋikusi toema.

¹³ Apotu Asa ka ŋasigarya keŋ kiwuapa ikes todolo tari lotaun ŋolo enyaritae Gerar. Tomunyarae Ŋikusi akitodol ŋina adaunor ipei daŋ eyari, anerae aponi ikes tobwaŋae alokiŋaren Ekapolon ka ŋasigarya keŋ. Apotu ŋasigarya a Yudaya toŋatasi ŋiboro ŋulu alalak nooi.

¹⁴ Apotu ŋasigarya a Yudaya kilout ŋituŋa a ŋitaunio a daadaŋ a ŋulu edunyatar Gerar, anerae abu tobul ŋituŋa a ŋitaunio a ŋul aŋuna a Ekapolon. Toŋatasi ŋasigarya a Yudaya ŋiboro a ŋitaunio a ŋul a daadaŋ, alalak nooi ŋiboro ŋulu arae ŋiŋatara a nen.

¹⁵ Apotu daŋ ŋasigarya a Yudaya toremo ŋauyoi a ŋulu alomito nen, tomyaasi ŋakinei ŋuna alalak nooi kaapei ka ŋikaala, tosodi toboŋosi nai Yerusalem.