2 Ŋakiro a ŋirwa 13 - Ebaibul

Kipuka Abiya Yudaya

¹ Alokaru a ŋolo a ŋitomon ka ŋikanikauni ipukat erwosit Yeroboam Isirael, kisyakini Abiya akipuka Yudaya.

² Kipuka iŋes Yudaya alo Yerusalem ŋikaru ŋiuni. Arae ekiro a toto keŋ Mikaia nakoku a Uriel a ŋolo alo Gibea. Apaki ŋin, aremosi Abiya ka Yeroboam.

³ Abu Abiya tolot lojie ka ŋikilyok ŋalipyo ŋamiae ŋaomwon ŋulu apedorito ejie, kicodo Yeroboam daŋ lojie ka ŋikilyok ŋalipyo ŋamiae ŋakanikauni ŋulu apedorito ejie.

⁴ Towo Abiya alosyep a ekamukumukut a ŋolo enyaritae Semaraim, a ŋolo eyai nakwap ŋina a Epuraim ŋina a ŋikamukumukui. Tema Abiya neni a Yeroboam, “Kiirasi ŋakiro kaŋ, iyoŋ Yeroboam ka Ŋisirael daadaŋ!

⁵ Nyiyenete mono iyes atemar adau Ekapolon Akuj a Isirael anacamunet keŋ a ŋina ajik ainakin arwosiyo a Isirael neni a Daudi ka ŋipapae keŋ ŋikaru ka ŋikaru a?

⁶ Nai abu Yeroboam lokoku a Nebat ŋolo arae epei alokapolok a ŋulu ewuapito Solomon lokoku a Daudi toŋer ekapolon keŋ.

⁷ Abu Yeroboam tocunak ŋasyaanisya ŋace ŋuna koŋinae, toloto toŋero Reoboam lokoku a Solomon apaki ŋina ariŋaakar edit emam ŋuna ayeni akitepegia ikes.

⁸ “Tokona icamito iyes akitijiore apukan ŋina abu Ekapolon inak neni a ŋiletok a Daudi. Kire irae iyes ajore ŋina alalan nooi, ido iyakatar ŋitorubei a ŋitak a ŋulu itiyaunitae a egolid, ŋulu abu Yeroboam kitiyau erae ŋakujo kus.

⁹ Pa mono ipotu iyes kiritasi ŋisacaradotin ŋulu ke Ekapolon, ŋidwe ka Aron ŋulusapa kaapei ka ŋilepi, ido toseut ŋisacaradotin kus a ŋikulepek lopite ŋolo itiyaata ŋakwapin ŋunace a? Ituŋanan daadaŋ ŋini eyauni imoŋ, kori ŋimeesekin ŋikanikaarei, epedoryo akituruwor esacaradoti a ŋakujo kus a ŋun.

¹⁰ Nai ani eruwor isua, Ekapolon iŋes erae Akuj kosi, nyimyekina isua iŋes. Ikiyakar isua ŋisacaradotin ŋulu itiyaete etic ke Ekapolon, ikes ŋiletok ka Aron, ido iŋarakinito ŋilepi ikes akitiya.

¹¹ Einanakinete ikes Ekapolon a ŋinataparacu ka a ŋinataboŋ ŋainakineta ŋuna epeyo ka icunyete ekinyate. Iwuanakinete ŋamugati lomesa ŋolo asegan ŋolo ke etal ka inokanakinete ŋitaae a ŋinataboŋ anawoeta a ŋitaae aŋuna itiyaunitae ke egolid. Iwuapitae isua ŋuna ikicik Ekapolon Akuj kosi, nai imyekis iyes iŋes.

¹² Ikirukit isua ka Akuj; iŋes erae ekarikon kosi, eyakatar ŋisacaradotin keŋ ŋarupepe ŋuna ekutakinio anyaraunia ŋituŋa potu akitijiore iyes. Okoe iyes Ŋisirael, nyitijiyoto Ekapolon Akuj atapapaa kus, anerae nyilounete iyes.”

¹³ Apaki ŋina erworor Abiya ŋin, kebu Yeroboam kiyakiya ŋasigarya keŋ ŋace tomanasi yaye ŋasigarya ka Abiya, kidoŋo ŋuluce kiŋaren ŋasigarya a Yudaya.

¹⁴ Ani eŋoleŋolekinete ŋasigarya a Yudaya, kiŋolikis kirikaun ikes alokaku ka alokiŋaren. Apotu nai ikes kikalout neni ke Ekapolon, tokutakis ŋisacaradotin ŋarupepe kec.

¹⁵ Tocelut nai nooi ŋasigarya a Yudaya, apaki ŋin ŋina aceluniata ikes nooi, abu Akuj tobwaŋ Yeroboam ka Ŋisirael daadaŋ alokiŋaren Abiya ka ŋasigarya a Yudaya.

¹⁶ Apotu Ŋisirael tobwaŋas alokiŋaren ŋasigarya a Yudaya, inak Akuj ŋasigarya a Yudaya akiloun Ŋisirael.

¹⁷ Apotu Abiya ka ŋasigarya keŋ toara nooi Ŋisirael, toarae ŋulu arae ŋarwonita ŋuna ajiok ŋalipyo ŋamiae ŋakan.

¹⁸ Apotu ŋasigarya a Yudaya toreut Ŋisirael apaki ŋin, anerae ekinyomito ŋasigarya a Yudaya Ekapolon Akuj atapapaa kec.

¹⁹ Abu Abiya ka ŋasigarya keŋ kiwuapa ŋasigarya a Yeroboam, kikamasi ŋitaunio kec lu ŋice: Besel ka ŋirerya ŋulu edunyatar, Yesana ka ŋirerya ŋulu edunyatar, Epuron ka ŋirerya ŋulu edunyatar.

²⁰ Abu Yeroboam nyeryamu agogoŋu ace jik ŋinakitijikinet Abiya ŋikaru ŋuluce daadaŋ ŋulu epukator Abiya Yudaya. Ekaku, abu Ekapolon kitedyakak Yeroboam totwan.

²¹ Abu Abiya togogoŋior nooi alokipukae keŋ. Abu kiit ŋaberu ŋatomon ka ŋaomwon, touru ŋidwe ŋulusapa ŋatomoniarei ka ŋiarei ka ŋulupesur ŋitomon ka ŋikanikapei.

²² Ŋiticisyo ka Abiya ŋuluce daadaŋ ka ŋipitesyo keŋ, igiritae loemut ŋolo a Ido a ekadwaran.