2 Ŋakiro a ŋirwa 11 - Ebaibul

Todukokinae ŋitaunio ŋulujiet Yudaya ka Benjamin

¹ Ani edoluni Reoboam Yerusalem, tocunak ŋituŋa ŋulu ke ekabila a Yuda ka ŋulu ke ekabila a Benjamin, ŋituŋa ŋulu aseunitae ŋulu adolit ekimar kec ŋalipyo amiat ka ŋatomonikanikauni, ŋulu amaikina kitijioto Ŋisirael; ikotere inyakakinete apukan a Isirael neni a Reoboam.

² Nai abu akirot a Ekapolon na bu neni a Semaia a ekile a ŋolo amina Akuj, ebe,

³ “Tolimok Reoboam erwosit a Yudaya ŋolo erae lokoku a Solomon ka Ŋisirael daadaŋ ŋulu eya Yudaya ta ŋulu eya Benjamin ebe,

⁴ ‘Alimu Ekapolon ŋakiro nu: Nyitipeiyosi akitijiore ŋikaitotoi kus Ŋisirael. Apesi iyes daadaŋ lorerya kus, anerae ayoŋ alimu ŋakiro ŋun.’ ” Aŋun, apotu ikes kiirasi ŋakiro ke Ekapolon, toboŋosi lorerya kec, kimyekis alosit akitijiore Yeroboam.

⁵ Kiboi Reoboam alo Yerusalem, toduku ŋitaunio ŋulujiet Yudaya.

⁶ Ŋitaunio ŋul ikes Betelem, Etam, Tekoa,

⁷ Besur, Soko, Adulam,

⁸ Gas, Maresa, Sip,

⁹ Adoraim, Lakis, Aseka,

¹⁰ Sora, Aijalon ka Eburon. Ŋitaunio ŋul ikes abu Reoboam todukok ŋaduketa ŋunajiet alo Yudaya ka Benjamin.

¹¹ Abu iŋes toduku ŋaduketa ŋunajiet erae ŋuna agogoŋ nooi, kiwuak tooma ŋaduketa ŋun ŋikarikok a ŋasigarya, ŋisitowae ŋulu a ŋamuja, a akimyet ka a epiini.

¹² Kiwuak daŋ lotaunio ŋul daadaŋ ŋaupala ŋuna apolok ka ŋakwaaras; kituruwo ŋitaunio ŋul ŋulu pa apatana akikamar. Aŋun, abu Reoboam toruwor ekepukan a Yudaya ka Benjamin.

Toriwo ŋisacaradotin ka ŋilepi neni a Reoboam

¹³ Apotu ŋisacaradotin ka ŋilepi ŋulu a ŋakiboisyo a ŋun a daadaŋ toloto neni a Reoboam.

¹⁴ Apotu ŋilepi kimyekis tari ŋakiboisyo ŋuna adakasi ŋibaren kec, kimyekis tari ŋiboro kec, toloto Yudaya ka Yerusalem, anerae apotu Yeroboam ka ŋidwe keŋ ŋulusapa nyecamakis ikes akitiya ikwapei ŋisacaradotin ŋulu ke Ekapolon.

¹⁵ Abu Yeroboam toseu ŋisacaradotin keŋ, kiwuak nakiboisyo ŋuna adukitoe neni amukur, ikotere ilipete neni a ŋitorubei a ŋulu abu iŋes kitiyau ikwaan ka ŋikorwa ta ŋitak.

¹⁶ Apotu ŋituŋa alokabilae a daadaŋ a Ŋisirael ŋulu ekinyomito alotai kec Ekapolon Akuj a Isirael, kiwuapasi ŋilepi Yerusalem ainakin ŋamuronisya neni ke Ekapolon a Akuj atapapaa kec.

¹⁷ Apotu ikes kisimukekis apukan ŋina a Yudaya todol ŋikaru ŋiuni ipukat Reoboam lokoku a Solomon Yudaya emam ŋace, anerae apotu ikes alotooma ŋikaru ŋiuni kiwuapa ŋipitesyo a Daudi ka Solomon.

Ekal a Reoboam

¹⁸ Abu Reoboam kiit Maalas ŋina arae nakoku a Yerimos a ŋolo arae lokoku a Daudi. Arae toto a Yerimos Abiail a ŋina arae nakoku ke Eliab a ŋolo arae lokoku a Yese.

¹⁹ Abu Maalas touru ŋidwe ŋulusapa lu: Yeus, Semaria ka Saam.

²⁰ Kiit Reoboam aberu ace ŋina anyaritae Maaka, nakoku ka Abusalom, abu Maaka touru ŋidwe lu: Abiya, Atai, Sisa ka Selomis.

²¹ Amina Reoboam Maaka nakoku ka Abusalom nooi akilo ŋaberu keŋ ŋunace daadaŋ ŋuna eitit ka ŋuna pa eitit. (Arae ŋaberu keŋ ŋuna eitit ŋatomon ka ŋakanikauni ka ŋuna pa eitit ŋatomonikanikapei. Arae ŋidwe keŋ ŋulusapa ŋatomoniarei ka ŋikanikauni ka ŋulupesur ŋatomonikanikapei.)

²² Abu Reoboam toseu Abiya lokoku a Maaka apolokin ŋikaitotoi keŋ, anerae acamit Reoboam Abiya toruwor erwosit.

²³ Abu Reoboam kitiya ŋuna ka aosou, kiyakiya ŋidwe keŋ ŋuluce ŋulusapa apolokin ŋakiboisyo ŋuna alo Yudaya ka alo Benjamin ta ŋitaunio daadaŋ ŋulu aya ŋaduketa ŋunajiet. Inak ikes ŋiboro ŋulu alalak ka ŋaberu ŋuna alalak.