2 Ŋakiro a ŋirwa 10 - Ebaibul

Toremokinos Reoboam ka ŋikabilae ŋulu alo Kuju

¹ Abu Reoboam tolot Sekem, anerae acunakina Ŋisirael daadaŋ Sekem akituruwor iŋes erwosit.

² Ani iirari Yeroboam lokoku a Nebat ŋakiro ŋun, (anerae ariŋa iŋes eyai Ijipit neni abu iŋes tosi aneni a erwosit Solomon) toboŋu alo Ijipit.

³ Kiyakiyarae ŋituŋa anyarare Yeroboam, torukut Yeroboam ka atukot a Ŋisirael daadaŋ temasi, neni a Reoboam,

⁴ “Abu papa kon ikiinak isua egogos ŋolo apotyon, nai tokona, kitowowok ŋiticisyo a papa kon ŋulu atyonok ka egogos keŋ ŋolo apotyon ŋolo abu iŋes ikiinak isua. Iŋes nai ikitiyanakinia isua iyoŋ.”

⁵ Tolimok Reoboam ikes tema, “Toloto a ne kiriyata ŋirwa ŋiuni, ido nai toboŋut neni kaŋ.” Aŋun, apotu ŋituŋa toloto a nen.

⁶ Tolot nai Reoboam aanyun ŋikasikou ŋulu sek etiyato neni a Solomon a papa keŋ apaki ŋina ayarya, kiŋit ikes tema, “Anukiro ikilimokinete iyes ayoŋ, ŋuna apedori ayoŋ aboŋokin ŋituŋa?”

⁷ Toboŋokis ikes iŋes temasi, “Ani kirimaaniar iyoŋ aneni kec ka kitalaka ikes anakiro aŋuna iboŋokini iyoŋ ikes, eruwor ikes ŋiketiyak kon ŋikaru ka ŋikaru.”

⁸ Nai abu Reoboam tojamuwa ŋakiro ŋuna alimokinete ŋikasikou iŋes, tolot neni a ŋisorok a ŋulu arae ŋikesa keŋ, ŋulu etiyanakinete iŋes.

⁹ Kiŋit Reoboam ikes tema, “Anukiro ikilimokinete iyes ayoŋ, ŋuna emaikina iwon oboŋokisi ŋituŋa ŋulu akalimokis ayoŋ ebe, ‘Kitowowok egogos lo ŋolo abu papa kon ikiinak isua?’ ”

¹⁰ Toboŋokis iŋes ŋikesa keŋ ŋul temasi, “Tolimok ŋituŋa ŋulu ebasi iyoŋ, ‘Abu papa kon ikiinak isua egogos ŋolo apotyon, nai emaikina iyoŋ kitowowok aneni kosi,’ tema iyoŋ ikes, ‘Nyepataka ŋiticisyo kaŋ a ŋolo cici, iloito ŋulu a papa kaŋ.

¹¹ Abu papa kaŋ ikiinak iyes egogos ŋolo apotyon, nai eturuwori ayoŋ egogos ŋol ŋolo apotyon nooi akilo neni sek. Abu papa kaŋ ikida iyes a akulit, nai akadai ayoŋ iyes a adaset.’ ”

¹² Apotu nai Yeroboam ka ŋituŋa daadaŋ toloto neni a Reoboam epete ŋirwa ŋiuni, lopite ŋolo sek alimunitor erwosit ebe, “Toboŋutu neni kaŋ epete ŋirwa ŋiuni.”

¹³ Toboŋok erwosit ŋituŋa ŋakiro eryenyaana. Abu iŋes toŋer ŋakiro ŋuna alimokinete ŋikasikou iŋes.

¹⁴ Kirwor iŋes lotuŋa iwuapit ŋuna alimokinete ŋisorok iŋes tema, “Abu papa kaŋ ikiinak iyes egogos ŋolo apotyon, eturuwori ayoŋ egogos ŋol ŋolo apotyon nooi akilo neni sek, abu papa kaŋ ikida iyes a akulit, nai akadai ayoŋ iyes a adaset.”

¹⁵ Aŋun, abu erwosit toŋer ŋakiro a ŋituŋa, anerae arae neni ka Akuj abunitor akilocokinet ŋin, ikotere kiyookinor akirot ŋina aris Ekapolon kelimoki Yeroboam lokoku a Nebat aneni ka Aija a Esilonit.

¹⁶ Ani eyenunete Ŋisirael daadaŋ atemar nyecamit erwosit akiirar ŋakiro kec, toboŋokis ikes erwosit temasi, “Nyo mono yok tokona eyai neni a Daudi? Mam ibore emaikina eruwor ŋini yok aneni alokoku a Yese. Iyes Ŋisirael, emaikina ŋinituŋanan toboŋo lore keŋ! Okoe Daudi, kite tokona ŋituŋa a ekal kon ke elope, okoe Daudi!” Aŋun, apotu Ŋisirael daadaŋ toboŋosi lorerya kec.

¹⁷ Nai abu Reoboam kipuka Ŋisirael ŋulu eboiyete alotaunio a ŋulu aya Yudaya.

¹⁸ Ani iyakiyari Reoboam Adoram ŋolo apolokinit ŋituŋa ŋulu areikinitae akitiya etic, apotu Ŋisirael tocaka Adoram a ŋamoru toara. Nai abu erwosit Reoboam toem atipei todoka nagaari keŋ, tosi Yerusalem.

¹⁹ Aŋun, arubakis Ŋisirael ŋulu alo Kuju eŋerito ka eremokino ŋituŋa a ekal a Daudi tari nakoloŋit na.