1 Yoa. 5 - Ebaibul

Anupit yok iŋes ikilounia iwon akwap

¹ Ŋini enupi atemar Yesu iŋes erae Kristo, erae iŋes ikoku ka Akuj, ŋini emina ekauruunan, emina ikoku keŋ daŋ.

² Epite lo ikiyenunia atemar ikimina iwon ŋidwe ka Akuj: Apaki ŋina eminare iwon Akuj ka ericakinito Ŋakiciketa keŋ.

³ Epite lo iŋes erae amina Akuj: akiricakin Ŋakiciketa keŋ. Nyegogoŋ Ŋakiciketa keŋ,

⁴ anerae ŋini daadaŋ erae ikoku ka Akuj, eyakar apedor ŋina kilounet akwap. Naga iŋes erae apedor ŋina elounan akwap--anupit yok.

⁵ Ŋae epedori akiloun akwap? Erae ŋini bon enupit atemar erae Yesu Lokoku ka Akuj.

Ŋisuudae ŋulu a Yesu Kristo

⁶ Abu Yesu Kristo bu a ŋakipi a ŋuna ke ebatisimu keŋ ka a ŋaokot a ŋuna ka atwanare keŋ. Nyebuno iŋes a ŋakipi bon, nai abu bu a ŋakipi ka ŋaokot. Nabo daŋ elimorit Etau elope atemar erae nu ŋuna a kire, anerae erae Etau ŋolo a kire.

⁷ Eyakasi ŋisuudae ŋiuni,

⁸ Etau, ŋakipi ka ŋaokot; elimorito ŋisuudae ŋuluuni lu daadaŋ ibore ipei.

⁹ Ikinupit akiteyenunet ŋina a ituŋanan, nai akiteyenunet ŋina ka Akuj iŋes egogoŋ nooi ka ainaki iŋes akiteyenunet ŋin aŋuna a Lokoku keŋ.

¹⁰ Ŋini enupit Lokoku ka Akuj, eyakar akiteyenunet ŋin tooma keŋ. Ŋini nyenupit Akuj, itusubunit iŋes Akuj ŋina alyokon, anerae nyenupit iŋes ŋuna alimu Akuj aŋuna a Lokoku keŋ.

¹¹ Alimoret iŋes na: Ikiinak Akuj iwon akiyar ŋina nyedaun ka ebunit akiyar na aneni a Lokoku keŋ.

¹² Ŋini eyakar Lokoku, eyakar akiyar na; ŋini nyeyakar Lokoku ka Akuj, nyeyakar akiyar.

Akiyar ŋina nyedaun

¹³ Ekegirakinit ayoŋ iyes nu daadaŋ, ikotere toyenuniata kire atemar iyakatar iyes akiyar ŋina nyedaun, iyes ŋulu inupito alokiro a Lokoku ka Akuj.

¹⁴ Ikiyakar iwon atitinyu alokiŋaren Akuj, anerae ikikinyomit iwon atemar, ani kikiŋit iwon ibore daadaŋ ŋini ejok anacamit keŋ, ikiirari iŋes iwon.

¹⁵ Ikwaŋina ikiyenia iwon atemar ikiiranari iŋes iwon ŋinapaki ikiŋisya idiobore daadaŋ, ikiyeni daŋ atemar, ikiinakini iwon ibore ŋini ikiŋita aneni keŋ.

¹⁶ Ani kiŋolik ipei lokaato keŋ eseci asecit ŋina nyikirikori natwanare, itemokino iŋes kilip neni ka Akuj aŋuna a lokaato keŋ, ido inak Akuj iŋes akiyar. Erworo ayoŋ, ikotere ŋulu nyeseca asecit ŋina ikirikori natwanare. Eyai asecit ŋina ikirikori natwanare; nyabala ayoŋ itemokino iyes kilipa ikotere ŋakiro ŋun.

¹⁷ Ŋaronisya daadaŋ erae asecit, nai eyai asecit ŋina nyikirikori natwanare.

¹⁸ Ikiyeni iwon atemar ituŋanan daadaŋ ŋini erae ikoku ŋini ka Akuj nyesecenene, anerae iyoki Lokoku ka Akuj iŋes, ka nyepedori ŋolo Aronon akiwan iŋes.

¹⁹ Ikiyeni iwon atemar ikirae iwon ŋulu ka Akuj, tari kipukat ŋolo Aronon akwap daadaŋ.

²⁰ Ikiyeni daŋ iwon atemar, adau Lokoku ka Akuj abunore ka ikiinak iwon ayenut, ikotere oyenuniata ŋolo a kire. Ikiyari iwon anakimorikina ka Akuj ŋina erae ŋina a kire ka anakimorikina ka Lokoku keŋ Yesu Kristo. Kristo iŋes Akuj ŋina a kire, iŋes akiyar ŋina nyedaun.

²¹ Ŋidwe kaŋ, tocoikisi ŋakujo ŋuna nyerae ŋuna a kire.