1 Tim. 6 - Ebaibul

¹ Itemokino ŋulu eryamunito ŋican aŋuna eraakatar ŋipi toyenete atemar ejok ikes akerit ŋikapolok kec, ikotere nai emam ituŋanan ŋini itoroniyari ekiro ŋolo ka Akuj ka akitatam yok.

² Nyejok ŋipi ŋulu erae ŋikapolok kec Ŋikristo ejamuwarito ikes, aŋuna eraakatar ŋikepukak kec ŋikaitotoi alotooma Kristo. Nai akilo, itemokino ikes kitiyanakis ikes ejok nooi, anerae ŋulu itiyanakinio eraakasi ŋikanupak ŋuluminan.

Akitatam ŋina ka alyokonu ka ebari ŋolo a kire

³ Itemokino iyoŋ kitatam. Ituŋanan daadaŋ ŋini itatami ŋakiro ŋuna egelaaka ka ŋini nyecamunit ŋakiro ŋuna a kire ŋuna ke Ekapolon yok Yesu Kristo ka ŋuna ikitatami iwon alodin yok,

⁴ erae iŋes ŋini elal akituro ka emam ibore eyeni. Eyakar iŋes ekibure ŋolo aronon ŋolo ka apega ka ŋolo kiburaet, ido eyaunete ŋun: arakao, ŋiburasyo, akiyany ŋuluce ka atamakinit ŋakiro ŋuna aronok neni a ŋuluce,

⁵ ŋipegeta ŋulu nyedaun alotuŋa a ŋulu nyisitiyaete ŋatameta kec, ŋulu nyeriŋa eyakatar ŋakiro ŋuna a kire. Etamete ŋituŋa ŋul atemar edin iŋes erot ŋolo eryamunere ebari.

⁶ Kire, einakini edin ituŋanan aryamun epoida erae kecamu iŋes akimwonikina a ibore a ŋini eyakar.

⁷ Nyo aponi iwon yaunae nakwap? Emam ipei daŋ! Nyo ikipedori iwon akiya anakwap? Emam ipei daŋ!

⁸ Aŋun, ani kikiyakar iwon akimuj ka ŋilowi, itemokino emwonikina aŋuna kec.

⁹ Nai ikes ŋulu ecamito aruwor ŋikabarak elomarete nakitemyo ka ikamunete ŋaloketa ŋuna ke ekibure a ŋolo ka abaŋao a ŋolo awanan, ŋuna isibusokinete ikes toryamut ŋican ka akinyasuno.

¹⁰ Anerae amina ŋisiliŋa iŋes erae akisyakinet ŋina a ŋakiro a ŋuna aronok a daadaŋ. Erae ekibure ŋol iŋes etooliyo ŋice ananupit kec ka etalalata ŋican ŋulu ka akiyaloloŋ alotai kec.

Ŋakiro ŋuna erae ŋuna a Timoteo bon

¹¹ Nai iyoŋ ŋolo ka Akuj, toŋer ŋakiro ŋun daadaŋ. Toŋirik ka agogoŋu akiyookino, akiyar ŋina ecamit Akuj, anupit, amina, atitinyikinit ka akiyapara.

¹² Tojiye ejiye ŋolo ajokan ŋolo ka anupit, ikotere iryamuni akiyar ŋina nyedaun, ŋina abu Akuj ikinyarak iyoŋ apaki ŋina iserakinia iyoŋ alokiŋaren ŋisuudae ŋulu alalak anupit kon Kristo.

¹³ Alokiŋaren Akuj ŋina einanakini akiyar neni a ŋinibore daadaŋ ka alokiŋaren Yesu Kristo ŋolo abu kisera anupit keŋ alokiŋaren Ponitio Pilato, ekecikakini ayoŋ iyoŋ

¹⁴ akiwuap ŋakiro ŋun alopite a ŋolo ajokan a ŋolo nyepedorya idiotuŋanan akitoronia iyoŋ Akoloŋit ŋina etakanunia Ekapolon yok Yesu Kristo.

¹⁵ Eyauni Akuj atakanun ŋina a Yesu Kristo anapaki a ŋina itemokino, Akuj ŋina erereŋ ka ŋina erae iŋes bon erae Ekapolon, Erwosit ŋolo a ŋirwosi ka Ekapolon ŋolo a ŋikapolok.

¹⁶ Iŋes bon erae ŋolo nyetwani jik; iboi iŋes anakica a ŋina emam ituŋanan eapikini. Emam ituŋanan aanyuwa iŋes; emam ŋini epedori aanyuwar iŋes. Toyai neni keŋ akerit ka apedor ŋina nyedaun! Amen.

¹⁷ Tolimok ŋituŋa ŋulu ebarito a ŋiboro a ŋulu ka akiyar a na nyiturokinosi, nyiwuakis akigeno kec lobari ŋolo nyeropari, nai kigenos neni ka Akuj, a ŋina ikiinanakini iwon ibore daadaŋ anarimao, ikotere ikilakara iwon.

¹⁸ Tolimok ikes kitiyata ŋuna ajokak, tobarito aloticisyo a ŋulu ajokak ka totenito akimor ŋiboro kec ka ŋuluce anarimao.

¹⁹ Alopite a lo, iŋadakinete ikes aŋuna kec ebari ŋolo a kire ŋolo a rwanu, ido eryamunete akiyar ŋina erae akiyar kire.

²⁰ Timoteo, kidar ejok ŋuna ikicikakin iyoŋ akidar. Toŋer ŋakiro ŋuna nyecamakina aneni ka Akuj ŋuna koŋinae ka ŋipegeta ŋulu enyarito ŋituŋa ŋice atemar “Aosou.”

²¹ Anerae ebasi ŋice ikiyakatar ikes aosou ŋin, ŋuna nai atakanut ikes nu, aoliyosi ikes ananupit Kristo. Toyai neni kus ajokis ŋina ka Akuj.