1 Tim. 5 - Ebaibul

Epite ŋolo itemokino Timoteo iyokiyo ŋituŋa ŋulu egelegelya anatukot a Ŋikristo

¹ Nyisibura ekasikout edio, nai kisiyan iŋes ikwa papa kon. Kisirwor ŋisorok ikwa ŋikaitotoi kon,

² ŋakimak ikwa atatoto kon ka ŋasorok ikwa ŋakaitotoi kon anasegis ke etau.

³ Tokerite ŋapuseru ŋuna emam kire jik ituŋanan ŋini iŋarakinit.

⁴ Nai ani keyakar apuserut ŋidwe kori ŋitatae, itemokino mono ŋidwe toyenut akitiya ŋiticisyo kec ŋulu ke edin alokalya kec a ŋilopeyek, ido alopite a lo, etacakinete ikes ŋikauruunak kec, atapapaa kec ka atatata kec, anerae ŋun ikes italakarito Akuj.

⁵ Apuserut ŋina erae iŋes bon, ŋina emam kire jik ituŋanan ŋini iŋarakinit, iŋes igeno neni ka Akuj, erubakini ilipi ka imaimai Akuj, nakwaare ka naparan.

⁶ Nai apuserut ŋina aruwor akewariton ŋuna italakarito akuwan keŋ, adau atwanare, tari keriŋa eyari.

⁷ Tolimok ikes ŋakiro ŋun, ikotere todaun ituŋanan itoroniyari ikes.

⁸ Nai ani pa kidarit ituŋanan ŋiyeneta keŋ, akilo nooi ŋituŋa ŋulu ke ekal keŋ, adau iŋes akiŋer anupit Kristo ka aroniar nooi akilo ŋini nyenupit.

⁹ Nyimarak ekiro ŋolo ka apuserut a ŋina eriŋa ŋikaru keŋ nyedepara ŋatomonikanikapei lororwa ŋulu a ŋapuseru. Itemokino iŋes torae ŋina sek eisitae akiiset apei bon

¹⁰ ka ŋina eyenitae aŋuna a ŋiticisyo keŋ a ŋulu ajokak, ŋina abu kitopolou ŋidwe keŋ ejok, ŋina abu kijaununuye ŋituŋa ŋulu gelae lore keŋ, ŋina abu kitiya ŋiticisyo ŋulu ka akitiditeuna neni a ŋituŋa a ŋulu ka Akuj, ŋina abu kiŋarak ŋituŋa alocan kec ka ŋina abu torubak itiyae ŋuna ajokak alopitesyo a daadaŋ.

¹¹ Nyigirakis ŋirorwa ŋulu a ŋapuseru a ŋuna eriŋa esorokaka lororwa a ŋunace, anerae ŋina iitaniata ikes akiitar nabo, eŋerete ikes Kristo,

¹² ido eryamunete ikes atubokino ŋina ka Akuj, aŋuna abilyata ŋuna sek ekoŋito ikes ekiŋaren neni a Kristo.

¹³ Nabo eyenikinete ikes akalanyanut anakirimit ŋakais; meere ŋun bon, eyenikinete daŋ akirworor ŋituŋa ka apanapanat emam ediotic itiyaete ta akirworo ŋakiro ŋuna nyitemokino ikes irworosi.

¹⁴ Aŋun, atami ayoŋ atemar emaikina ŋapuseru ŋuna eriŋa esorokaka kiitae, toryamut ŋidwe ka kidara ŋirerya kec, ikotere nai nyeryamut ŋimoi yok adiopaki ŋina ikitoroniyaryata iwon.

¹⁵ Anerae adaut ŋapuseru ŋace akiŋer Kristo, ewuapakis Satan.

¹⁶ Nai ani keyakar aberu ŋina erae Akristoit ŋapuseru lokal keŋ, itemokino iŋes kidar ikes, nyeinak atyonis neni ka atukot a Ŋikristo, ikotere nai atukot idarit ŋapuseru ŋuna emam kire jik ituŋanan ŋini iŋarakinit.

¹⁷ Itemokino ŋikatukok ŋulu idarito ejok atukot a Ŋikristo etacio ŋarwa ŋaarei, akilo nooi ŋulu elimonokinete, kitatamete ka alelakinit.

¹⁸ Anerae ebasi Ŋakigireta, “Nyien ŋakituka a ŋimoŋin apaki ŋina isitiyaa iyoŋ ikes aramya ŋimomwa”; nabo, “Itemokino eketiyan eropyo.”

¹⁹ Nyipupok ŋakiro ŋuna isitakinitere ekatukon, mati erae ŋisuudae ŋiarei kori ŋiuni.

²⁰ Kisibura iteete ŋituŋa daadaŋ ŋulu eseceneneete, ikotere ekerete ŋuluce akitiya ŋun.

²¹ Alokiŋaren Akuj ka Yesu Kristo ta ŋimalaikan ŋulu seuna, ekeciki ayoŋ iyoŋ ka agogoŋu atemar kiwuap ŋakiro nu tomam atubonokin eriŋa nyeripiripa ejok kori tomam atyakatyakat ŋituŋa.

²² Nyikirikirakin akidokokin ŋakan kon neni a ituŋanan a idio aŋuna ka akituruwor iŋes eketiyan ŋolo ka atukot a Ŋikristo. Nyiloma nasecisya a ŋituŋa a ŋuluce; torubak irae ŋolo iseg alotau.

²³ Tojoŋo akimat ŋakipi bon, nai tomasi epiini ediocici, ikotere iŋarakini akook kon, anerae idyakana iyoŋ.

²⁴ Ilereete ŋasecisya a ŋituŋa a ŋice, esibit iŋarenikinito ikes natubokino, nai ŋasecisya a ŋice ileereunete ekaku.

²⁵ Ikwaŋinapei, ilereete ŋiticisyo ŋulu ajokak, nai ŋulu nyilereete daŋ, nyepedoryo akiwua ekaku.