1 Sam. 8 - Ebaibul

Kiitana Ŋisirael erwosit

¹ Ani emojoŋi Samuel, abu kituruwo ŋidwe keŋ ŋulusapa ŋikapolokinitok Ŋisirael.

² Anyaritae lokoku keŋ ŋolokiyae Yoel, ido ŋolo a ŋiarei Abiya; apolokinito ikes akwap a Isirael alo Beeriseba.

³ Nai apotu ŋidwe a Samuel ŋul nyiwuapa ŋipitesyo a Samuel, apotu ikes tooliyosi alopitesyo a papa kec, kiwara aryamun ebari ŋolo kitunauna. Apotu ikes tocamut akijare ŋakaluŋuluŋui, toŋero ŋakiro ŋuna ka akiyookino.

⁴ Apotu nai ŋikasikou daadaŋ tocunakinos toloto Rama neni a Samuel,

⁵ temasi neni keŋ, “Imojoŋ iyoŋ, ido nyiwuapito ŋidwe kon ŋulusapa ŋipitesyo kon; tosekinae nai tokona iyoŋ isua erwosit ŋolo ikipukae isua, ikwapei eyakatar ŋirwosi nakwapin ŋunace.”

⁶ Nai apotu ŋun nyitalakasi Samuel elimunete ikes ebe, “Inakinae isua erwosit ŋolo ikipukae isua.” Aŋun, abu Samuel kilip neni ke Ekapolon.

⁷ Tema nai Ekapolon neni a Samuel, “Tocamu ŋakiro daadaŋ ŋuna irworosi ŋituŋa neni kon; anerae nyikiŋerito iyoŋ ŋituŋa aruwor Ekapolokiniton kec, nai ayoŋ akaŋero ŋituŋa araakau erwosit ŋolo epukat ikes.

⁸ Ikwapei etiyakiniata ikes ŋun neni kaŋ ameun akoloŋit ŋina ayaunia ayoŋ ikes alo Ijipit, akitodol nakoloŋit na, akaŋerito ikes ayoŋ, ido itiyanakinete ŋakujo ŋace, aŋun, ikiŋero ikes iyoŋ daŋ.

⁹ Itemokino iyoŋ kiira ŋuna irworosi ikes. Nai tolimok ikes tocoito ka kitoodik ikes ŋuna emaikina kitiya erwosit ŋolo ebuni akipuka ikes.”

¹⁰ Aŋun, abu Samuel tolot, tolimok ŋakiro daadaŋ ŋuna ke Ekapolon neni a ŋituŋa a ŋulu abasi iŋes inakinae erwosit.

¹¹ Tema neni kec, “Eruwor lu ŋipitesyo a erwosit a ŋolo ikipukae iyes: Eai iŋes ŋidwe kus ŋulusapa kituruwo ikes ŋiketiyak nagaari keŋ ka ŋice ŋikametok ŋaŋolei keŋ. Eruwor ikes ŋikakerak alokiŋaren ŋagaari a erwosit.

¹² Eseununui iŋes ikes toruwor ŋikapolokinitok ŋisigarya ŋalipulipui ka ŋatomonikanikani ka ŋice toruwor ŋiketak ka ŋikalemak emanikor keŋ, ŋice kitiyata ŋiboro keŋ ŋulu ke ejie ka ŋulu a ŋagaari.

¹³ Eai iŋes ŋidwe kus ŋulupesur kituruwo ŋaketiyak ŋamyeta ŋuna iosae ka eruworosi ikes ŋakepok.

¹⁴ Eai iŋes ŋimanikorin kus ŋulu ajokak ka ŋimanikorin kus ŋulu ke epiini ka ŋulu a ŋikito ka akimyet, inak neni a ŋiketiyak keŋ.

¹⁵ Eai iŋes atutubet apei anatomon a ŋikinyom a epiini kus, ido inak neni a ŋikapolok a ŋulu ipukato ka iŋes ka neni a ŋiketiyak keŋ.

¹⁶ Eai iŋes ŋipi ka ŋapi kus ka ŋaatuk kus ŋuna ajokak ta ŋisigirya kus, toruworos ikes itiyaete etic keŋ.

¹⁷ Eai iŋes atutubet apei anatomon a ŋamesekin kus, ido iruworosi iyes ŋipi keŋ.

¹⁸ Aŋuna a erwosit kus a ŋolo iseunete iyes akipuka iyes, ikalounete iyes akoloŋit ŋina ikipukaa erwosit ŋol iyes; nai mam nyikiboŋokini iyes Ekapolon akoloŋit ŋin.”

Inakinae Ŋisirael erwosit ŋolo eitanito

¹⁹ Nai apotu Ŋisirael towout akiirar ŋakiro a Samuel temasi, “Mam! Ikiitanit isua jik aryamun erwosit ŋolo ikipukae isua,

²⁰ ikotere nai isua daŋ eyai erwosit ikwapei ŋakwapin ŋunace, ikipuka isua erwosit ŋol, torik ŋajorei kosi etijioto ka isua ŋimoe kosi.”

²¹ Ani kedau Samuel akiirar ŋakiro kec daadaŋ, tolot tolimok Ekapolon ŋakiro ŋuna erworosi ŋituŋa ŋul.

²² Tema Ekapolon neni a Samuel, “Tocamu ŋakiro ŋuna iŋitasi Ŋisirael, inak ikes erwosit kipuka.” Tolimok nai Samuel Ŋisirael tema, “Toboŋosi iyes daadaŋ lorerya kus.”