1 Sam. 7 - Ebaibul

¹ Apotu nai ŋituŋa a Kirias-Yearim totiyaunos, ido yaa Asaduku ŋina ke Ekapolon. Yaasi kiwuakis kai ka Abinadab ŋina ayai kidiama ekamukumukut. Kitaleut ikes Eleasar lokoku ka Abinadab aŋuna ka akitere Asaduku ŋina ke Ekapolon.

² Ameun akoloŋit ŋina ewuakinere Asaduku Kirias-Yearim, abu kiboi a nen ŋikaru ŋatomoniarei, ido apotu Ŋisirael daadaŋ kigworonokis ka kiitana akiwuap Ekapolon.

Samuel ikwapei ekatubon ŋakiro

³ Abu nai Samuel tolimok Ŋisirael tema, “Ani kiboŋunito iyes neni ke Ekapolon a ŋitai kus a daadaŋ, tolemasi nai alokidiŋ kus ŋakujo ŋunagelae, ikwapei Asitaros. Totama alotai kus ŋuna ke Ekapolon, kitiyanakisi iŋes bon, ido ikiuni iŋes iyes anakan a Ŋipilistin.”

⁴ Aŋun, apotu Ŋisirael kimasasi nariet ata Baal ka ata Asitaros, ido kitiyanakis Ekapolon bon.

⁵ Tema nai Samuel, “Tocunakisi Ŋisirael daadaŋ Misipa, ido elipi ayoŋ neni ke Ekapolon aŋuna kus.”

⁶ Aŋun, apotu ikes tocunakinos Misipa, tookut ŋakipi tobukosi alokiŋaren Ekapolon. Kiredakis ikes akiron akoloŋit ŋin temasi, “Ikidau isua akisec alokiŋaren Ekapolon.” Ido abu Samuel toruwor ekatubon ŋakiro ka ekarikon a Ŋisirael alo Misipa.

⁷ Ani iirarete Ŋipilistin atemar acunakin Ŋisirael Misipa, toŋaasi ŋikapolok a Ŋipilistin ajore akitijiore Ŋisirael. Ani iirarete Ŋisirael ŋakiro ka ajore a ŋin, tokuryaketa aŋuna a Ŋipilistin.

⁸ Temasi Ŋisirael neni a Samuel, “Nyijoŋ akigworonokin Ekapolon Akuj yok aŋuna yok, ido kilip ikotere itoiu iŋes iwon anakan a Ŋipilistin.”

⁹ Aŋun, abu Samuel tolemu imesek ŋini ariŋa enaki, inak neni ke Ekapolon erae ainakinet ŋina epeyo; kigworonok Samuel Ekapolon aŋuna a Ŋisirael, toboŋok nai Ekapolon akilip a Samuel.

¹⁰ Ani eriŋa Samuel itiyae ŋuna ka ainakinet a ŋin neni ke Ekapolon, toapuut Ŋipilistin neni a Ŋisirael akisiiryakin Ŋisirael; nai tocelu Ekapolon neni a Ŋipilistin akoloŋit ŋin a etoil a ŋolo apolon nooi a ŋolo ekoni agirokinet, kisibiler ikes; tobwaŋas alokiŋaren Ŋisirael.

¹¹ Tonyou ajiore a Ŋisirael alo Misipa, kiwuapak Ŋipilistin, toarasi ŋinapei a nen tari yaye Bes-Kar.

¹² Tolemu nai Samuel amoru a nen, tosipok kidiŋ Misipa ka Yesana, tolimok ekiro a amoru a ŋin Ebenesa, anerae abu iŋes tema, “Erae na esuuda ŋolo itoodiunit atemar ikiŋarak Ekapolon iwon tari tokona.”

¹³ Aŋun, apotu ikes toreut Ŋipilistin, ido apotu Ŋipilistin nyeboŋut nabo jik nakwap a Ŋisirael; atiŋit Ekapolon Ŋipilistin erono nooi ŋirwa daadaŋ ŋulu apolokinitor Samuel Ŋisirael.

¹⁴ Apotu Ŋisirael todemut Ŋipilistin ŋitaunio kec ŋulu sek ademarito Ŋipilistin ikes, ameun alo Ekiron tari Gas; todemut Ŋisirael Ŋipilistin tari ŋakiboisyo kec ŋuna sek ademaritae ikes. Toyakaun tari ekisil kidiŋ Ŋisirael ka Ŋiamori.

¹⁵ Abu Samuel torubak epolokinit akwap a Isirael ŋirwa daadaŋ ŋulu ka akiyar keŋ.

¹⁶ Erimonori iŋes lotaunio lu a ŋolokaru: Besel, Giligal ka Misipa; ido abu iŋes topolok akwap a Isirael alotaunio a ŋul a daadaŋ.

¹⁷ Nai amina iŋes aboŋonor Rama, anerae nen iŋes ayai akai keŋ, ido abu iŋes kipuka Isirael a nen ka abu todukok nen Namuroet aŋuna ke Ekapolon.