1 Sam. 6 - Ebaibul

Kinyakarae Asaduku Isirael

¹ Apaki ŋina ayakar Asaduku ŋina ke Ekapolon nakwap a Ŋipilistin ŋilapyo ŋikanikaarei,

² apotu Ŋipilistin kiyaketa ŋituŋa anyarare ŋisacaradotin ka ŋimurok kiŋita temasi, “Anukiro emaikina iwon etiyata aŋuna ka Asaduku a ŋina ke Ekapolon? Tolimokinae isua ibore ŋini itemokino yae kaapei ka Asaduku neni sek eyai Asaduku.”

³ Toboŋokis ikes temasi, “Ani kinyakarete iyes Asaduku ŋina ka Akuj a Ŋisirael, nyinyakasi emam ibore iyaete kaapei ka iŋes, nai ŋuna itemokino iyes kitiyata jik iŋes ainakin Akuj ainakinet adio aŋuna ke ekaile a ŋolo ka asecit kus. Ikotere nai ikitaŋaleunio ka ikilakunio, ido iyenunete ŋakiro ŋuna abunio Akuj torubakinia ikitiŋit iyes erono nooi.”

⁴ Kiŋita Ŋipilistin ŋituŋa ŋul temasi, “Ani inakinet emaikina isua inakinae neni ka Akuj aŋuna ka ekaile a ŋolo ka asecit kosi?” Toboŋokis ikes temasi, “Yaasi ŋitorubei ŋikan ŋulu a egolid ŋulu ikwaan ka ŋabusyo ka ŋitorubei ŋikan ŋulu a ŋidooi ŋulu itiyaunitae a egolid, yaasi ŋul itiriyanito ke ekimar a ŋikapolok a Ŋipilistin; anerae ipotu iyes daadaŋ kaapei ka ŋikapolok todyakakinos edeke ŋol.

⁵ Aŋun, itemokino iyes kitiyaut ŋitorubei ŋikan ŋulu ikwaan ka ŋabusyo ka kitiyaut ŋitorubei a ŋidooi a ŋulu apotu kinyasut akwap, kitopoloosi Akuj a Ŋisirael. Acepaki ejoŋoe iŋes atiŋit iyes erono nooi kaapei ka ŋakujo kus ta akwap kus.

⁶ Kaanukiro itogogoŋitotor iyes ŋakyes kus ikwa aponiata Ŋijipitian ka Parao kitiyaata? Pa mono apotu ikes kimyekis Ŋisirael toloto apaki ŋina atiŋia Akuj ikes ka aryenyeo a?

⁷ Aŋun nai, kitena agaari ŋina kitete ka ŋaatuk ŋaarei ŋuna eurito, ŋuna nyenapa ayokot. Toenikisi ayokot naatuk ŋun kiriyasi ikes agaari, nai tobuwasi a naatuk a ŋun ŋitak kec lore.

⁸ Tolemutu Asaduku ŋina ke Ekapolon kikacakis nagaari. Kiwuakisi nasaduku ace ŋiboro kus ŋulu itiyaunitae a egolid ŋulu iinakinito iyes Akuj erae ainakinet ŋina a ekaile a ŋolo ka asecit kus, ido kiwuakis nagaari kiŋaren Asaduku ŋina ke Ekapolon, kijukasi nai agaari, kimyekis iŋes bon tomek erot

⁹ nai kiteosi iŋes, ani kiyoor nakwap keŋ lowae ŋolo eyai Bes-Semes, apolou keŋ atemar Ekapolon kebu yau ŋican lu neni yok. Nai ani pa kelot nen, ikiyenuni iwon atemar meere Ekapolon abu itotiŋ iwon neni aronon nooi, kicwanyunio iwon ŋican ŋul erae akicwanyun.”

¹⁰ Apotu ŋikilyok ŋul kitiyata ŋun, tolemut ŋaatuk ŋaarei ŋuna aurito, toenikis nayokot kiriyasi agaari, ido togolokis ŋitak a ŋaatuk a ŋun lore.

¹¹ Kiwuakis Asaduku ŋina ke Ekapolon nagaari ka asaduku ŋina aya ŋitorubei a ŋidooi ŋulu etiyaunitae a egolid ta ŋakaleuleui ŋuna etiyaunitae a egolid ŋuna ekwaan ka ŋabusyo ŋuna adyakasi ikes.

¹² Torotokis ŋaatuk ŋun, kidiiriyasi Bes-Semes emeto erot, erwosi erot daadaŋ. Nyeriwo ikes alorot teten, kori kedyeny, kiwuapasi ŋikapolok a Ŋipilistin ŋaatuk ŋun tari lokukoru ŋolo a Bes-Semes.

¹³ Arae apaki ŋin ŋina alemyata ŋituŋa a Bes-Semes ŋaganoi alomanikorin kec a ŋulu aya nakadipaalat. Ani eŋoleŋolekinete ikes apaki ŋina alemyata, kiŋolikis Asaduku, toloto ikes akisiryam Asaduku ŋin elelyanete.

¹⁴ Todolunioto ŋaatuk Asaduku ŋin lomanikor a Yosua ŋolo alo Bes-Semes, ido towoeta a nen. Ayai nen ataaba ŋinadapal nooi; aŋun, apotu ŋituŋa ŋul tobwaŋabwaŋaasi ŋakito ŋuna a agaari, ido toara ŋaatuk ŋuna erito agaari, topeo erae ainakinet neni ke Ekapolon.

¹⁵ Toloto ŋilepi todakakis Asaduku ŋina ke Ekapolon kwap kaapei ka asaduku ŋina ayai diyete keŋ, ŋina aya ŋiboorei ŋulu etiyaunitae a egolid. Kiwuakis ikes ŋasadukui ŋun kidiama ataaba ŋinadapal nooi ŋin. Yaut nai ŋituŋa a Bes-Semes neni ke Ekapolon akoloŋit ŋin ŋainakineta ŋuna epeyo, yaut daŋ nen ŋamuronisya.

¹⁶ Ani iŋolikinete ŋikapolok a Ŋipilistin ŋulukan ŋakiro ŋun, toboŋosi Ekiron akoloŋit ŋin.

¹⁷ Ŋitorubei ŋulu etiyaunitae a egolid ŋulu ekwaan ka ŋabusyo ŋulu apotu Ŋipilistin yaasi neni ke Ekapolon erae ainakinet ŋina a ekaile a ŋolo ka asecit kec ikes nu: Ayaunitae apei aŋuna ka Asidod, apei aŋuna a Gasa, apei aŋuna ka Asikelon, apei aŋuna a Gas ka apei aŋuna ka Ekiron.

¹⁸ Ŋitorubei a ŋidooi daŋ ayaunitae eriyan ke ekimar a ŋitaunio a daadaŋ a akwap a Ŋipilistin a ŋina epukato ŋikapolok ŋulukan, kimarakinitetei tari ŋitaunio ŋulu awuatae a ŋarwatatain ka ŋirerya ŋulu pa awuatae. Ataaba ŋinadapal nooi ŋin, ŋina eyai lomanikor a Yosua alo Bes-Semes ŋina apotu ikes kiwuakis Asaduku ke Ekapolon, iŋes erae esuuda a ŋakiro a ŋun tari nakoloŋit na.

Yaunae Asaduku Kirias-Yearim

¹⁹ Abu Ekapolon kisican ŋikilyok a Bes-Semes ŋice, toar ŋatomonikanikaarei aŋuna keponiata ikes toripiyasi tooma Asaduku ŋina ke Ekapolon, aya lokimar ŋol ŋikapolok ŋatomonikan, kigworo ŋituŋa aŋuna abunio Ekapolon tomunyarya ŋituŋa ŋulu alalak nooi.

²⁰ Temasi nai ŋituŋa a Bes-Semes, “Ŋae epedori akiwo alokiŋaren Ekapolon Akuj na ŋina Asegan? Neni a ŋae emaikina Asaduku yae aneni yok?”

²¹ Aŋun, apotu ikes kiyakiyasi ŋituŋa lotuŋa a Kirias-Yearim alimokin ikes ebe, “Enyakut Ŋipilistin Asaduku ŋina ke Ekapolon. Totiyaunos ne, ido yaa Asaduku a ne nakibois kus.”