1 Sam. 5 - Ebaibul

Ŋipilistin ka Asaduku

¹ Ani kedemasi Ŋipilistin Ŋisirael Asaduku ŋina ka Akuj, apotu yaasi alo Ebenesa yaasi Asidod,

² todakasi a nen, kiwuakis kai ŋina ka akuj kec a ŋina anyaritae Dagon; kiwuakis diyete Dagon.

³ Ani taparacu enyounete ŋituŋa ŋulu ka Asidod toryamut Dagon imasakina kwap edot aloreet, eyai kiŋaren Asaduku ŋina ke Ekapolon. Kikeut nai ikes Dagon kiwuakis nenipei sek ayai.

⁴ Nai, ani nabo enyounete ikes ataparacu ŋinace, toryamut Dagon imasakina kwap edot aloreet, eyai kiŋaren Asaduku ke Ekapolon, ketuborosi akou ka ŋakan keŋ neni kec bon eya lopuke. Akuwan bon nenisulut edoŋit neni keŋ.

⁵ Ŋakiro ŋun iŋes nyicakiananata ŋisacaradotin a Dagon ka ŋituŋa daadaŋ ŋulu elomarete kai a Dagon epuke a akai a Dagon alo Asidod tari tokona.

⁶ Totiŋ Ekapolon ŋituŋa ka Asidod erono nooi, inak ikes ekabule. Kisican Ekapolon ŋituŋa ka Asidod ka ŋikidunyet kec a edeke a ŋolo aronon nooi a ŋolo arae ŋabusyo.

⁷ Ani nai iŋolikinete ŋituŋa ka Asidod ŋakiro ŋun, temasi, “Nyemaikina Asaduku ŋina ka Akuj a Ŋisirael erubakini eyai neni yok; anerae ikitiŋ iwon Akuj a Ŋisirael erono nooi, iwon kaapei ka akuj yok Dagon.”

⁸ Aŋun, apotu ikes kiyakiyasi ŋituŋa anyarare ŋikapolok a Ŋipilistin, temasi ikes neni a ŋikapolok, “Nyo emaikina iwon etiyata aŋuna ka Asaduku a ŋina ka Akuj a Ŋisirael?” Toboŋokis ŋituŋa ŋulu a Gas temasi, “Yautu Asaduku ŋina ka Akuj neni kosi.” Aŋun, apotu ikes yaasi Asaduku ŋina ka Akuj a Ŋisirael Gas.

⁹ Nai ekaku keyaut ikes Asaduku ŋin Gas, totiŋ Ekapolon ŋituŋa a Gas erono nooi, toyakaun ekabule nen ŋolo apolon nooi. Kisican Ekapolon ŋituŋa a etaun a ŋol, ŋulu cicik ka ŋulu emojoŋito, aŋun abu edeke ŋolo arae ŋabusyo min lotuŋa ŋul.

¹⁰ Aŋun, apotu ikes kiyakiyasi Asaduku ŋina ka Akuj a Ŋisirael yaasi Ekiron. Nai adolun Asaduku ŋina ka Akuj ŋin Ekiron bon, kikalout ŋituŋa ke Ekiron temasi, “Kaanukiro ayauniata ikes Asaduku ŋina ka Akuj a Ŋisirael neni yok akiar iwon ka ŋituŋa yok?”

¹¹ Aŋun, apotu ikes kiyakiyasi ŋituŋa anyarare ŋikapolok a Ŋipilistin daadaŋ temasi neni a ŋikapolok, “Tolemasi Asaduku ŋina ka Akuj a Ŋisirael a ne, kinyakasi nakibois keŋ, ikotere nyikiar isua ka ŋituŋa kosi.” Alimunete ikes ŋun, anerae kebu ekabule ŋolo ke etwane tolalaar nooi alotuŋa a etaun a daadaŋ aŋuna kebunio Akuj totiŋ ŋituŋa ŋul erono nooi.

¹² Tolomununut ŋabusyo a nawat a ŋituŋa a daadaŋ a ŋulu pa apotu totwaka, abu akigworo a ŋituŋa todol nakuj.