1 Sam. 4 - Ebaibul

Todemarae Ŋisirael Asaduku a Ekapolon.

¹ Alorwa a ŋul, kepotu Ŋisirael toloto akitijiore Ŋipilistin. Kebu ajore a Ŋisirael kiboikin epeiwae neni enyaritae Ebenesa, kiboikin ajore a Ŋipilistin neni enyaritae Apek.

² Kisicodosi Ŋipilistin ajore kec akisiiryakin Ŋisirael, ani iryamete ŋajorei ejikin, apotu Ŋipilistin toreut Ŋisirael, toara alokiryam ŋikilyok ŋulu aapikinit ekimar kec ŋalipyo ŋaomwon.

³ Ani eboŋunete ŋajorei a Ŋisirael neni sek eboikino ikes, temasi ŋikasikou a ŋisirael ebe, “Kaanukiro emyekinia Ekapolon Ŋipilistin ikilounete iwon nakoloŋit na? Apena oyautu alo Silo Asaduku ŋina ka Acamunet ke Ekapolon, ikotere ebuni Ekapolon kidiŋ yok itoiu iwon anagogoŋu a ŋimoe yok.”

⁴ Aŋun, aponi kiyakiyarae ŋituŋa Silo, yaut ŋul alo Silo Asaduku ŋina ka Acamunet ke Ekapolon a ŋolo Etiron, a ŋolo anupito Ŋisirael atemar eyai kidiŋ ŋitorubei ŋulu a Ŋisubuna a ŋulu eya ŋabebenuk a ŋulu aya Nasaduku. Ayakasi apaki ŋin ŋidwe ke Eli ŋulusapa, Opini ka Pineas, neni ayai Asaduku ŋina ka Acamunet ka Akuj.

⁵ Ani edolunere Asaduku ŋina ka Acamunet a Ekapolon neni eboiyoto Ŋisirael, tocelut Ŋisirael daadaŋ nooi, kituruturokin akwap.

⁶ Ani iirarete Ŋipilistin ecelet ŋol, temasi, “Nyo apolou a ecelet a ŋol, a ŋolo ecelasi Ŋiburaniyae?” Ani nai eyenunete ikes atemar keyaun Asaduku ŋina ke Ekapolon neni eboiyoto Ŋisirael,

⁷ tokuryaketa Ŋipilistin; anerae apotu ikes temasi, “Apotu ŋakujo neni iboiyoto Ŋisirael.” Temasi nabo ikes, “Okoe ikiloma iwon locan! Nyetakanuna ŋakiro ŋuna ikote nu ŋinapei.

⁸ Woitakoi! Ŋae ikilakuni iwon anakan a ŋakujo a nu a ŋuna agogoŋok? Erae ikes ŋakujo ŋunakoloŋ apotu toara Ŋijipitian analoŋisat a ŋidekesyo a ŋulugelegelya.

⁹ Totitinyokiata, iyes Ŋipilistin, ikotere nyikiruwor ŋipi a Ŋiburaniyae lopite ŋolo sek araakatar ikes ŋipi yok. Toruworos ŋikilyok ŋulu ititiny, ido tojioto.”

¹⁰ Aŋun, apotu Ŋipilistin kitijioto Ŋisirael toreut. Tobwaŋas Ŋisirael, toem ŋinituŋanan lore keŋ. Totwaka Ŋisirael ŋulu alalak nooi ŋulu alosete a ŋakejen ŋulu adolit ekimar kec ŋalipyo ŋatomoniuni.

¹¹ Todemarae Ŋisirael Asaduku ŋina ka Akuj, toarae daŋ ŋidwe ke Eli ŋulusapa ŋuluarei, Opini ka Pineas.

Atwanare a Eli

¹² Akoloŋit ŋin, kebu ekile epei ŋolo a ekabila a Benjamin, toem alojie, tolot Silo, todol iŋes Silo ekoris ŋilowi ka ileleba apuwa nakou.

¹³ Apaki ŋina adolio iŋes nen, eboi Eli alokicoloŋ keŋ alodiyete erot eteorit lowae ŋolo a Misipa, anerae kebu etau keŋ tomaran aŋuna ka Asaduku a ŋina ka Akuj. Ani elomuni ekile ŋol lotaun, tolimo ŋakiro a ejie, kikalou etaun daadaŋ.

¹⁴ Ani iirari Eli ŋituŋa igworosi, tema, “Anikiolol na?” Bu nai ekile ŋol atipei neni ke Eli tolimok Eli ŋakiro.

¹⁵ Apaki ŋin, arae Eli ŋikaru ŋatomonikanikaomwon ka ŋikanikauni, ido aris ŋakonyen keŋ kemumu, pa apedorit iŋes akitere ejok.

¹⁶ Tema ekile ŋol neni ke Eli, “Adolun ayoŋ napei na alojie, amotun ayoŋ alojie akoloŋit napei na.” Kiŋit Eli iŋes tema, “Abu ejie tolot ikwaani ikoku kaŋ?”

¹⁷ Toboŋok ekayaunan ŋakiro ŋol tema, “Asurosi Ŋisirael alokiŋaren Ŋipilistin, ido etwakito ŋituŋa ŋulu alalak anajorei yok; aari tari ŋidwe kon ŋulusapa ŋuluarei Opini ka Pineas. Ademar Ŋisirael Asaduku ŋina ka Akuj.”

¹⁸ Ani elimuni iŋes Asaduku ŋina ka Akuj, kimasar Eli ekaukau, alokicoloŋ keŋ a ŋolo eboiyo iŋes kimasakin diyete epuke, tobila emosiriŋ keŋ, totwana Eli, anerae aris iŋes kemojoŋ, ido ayai apotis nakuwan keŋ. Keris iŋes kitiya erae ekatubon ŋakiro alo Isirael ŋikaru ŋatomoniomwon.

¹⁹ Apaki ŋin, kepoti nateran keŋ, aberu a Pineas, kedolit akidoun. Ani iirari iŋes atemar ademar Ŋisirael Asaduku ŋina ka Akuj, ido atwaka papa alokile keŋ ka lokile keŋ, abu iŋes kijuuru toryedik, kidou; anerae abu aryeba ŋina ka akidoun kilopiya iŋes.

²⁰ Ani iŋolikini akesidounon keŋ atemar elosi aberu ŋin akiridakin, tolimok akesidounon iŋes tema, “Nyikuryaniar, anerae idou iyoŋ isapat.” Nai abu iŋes nyeboŋok ŋun, kori nyemitak akiirar.

²¹ Tolimok iŋes ekiro a ikoku Icabod, apolou a ekiro a ŋol iŋes na ebe, “Alot apolou ŋina ka Akuj aneni a Ŋisirael,” anerae ademar ikes Asaduku ŋina ka Akuj ka atwaka papa alokile keŋ ka lokile keŋ.

²² Tolimu iŋes tema, “Alot apolou ŋina ka Akuj aneni a Ŋisirael, anerae ademar ikes Asaduku ŋina ka Akuj.”